«Інфармацыі пра арышт няма»: Святлана Алексіевіч пра пагрозы забраць кватэру
Прапагандысты ўкідваюць у грамадства ідэі забраць у палітычна нелаяльных усё — і падзяліць. І глядзяць, якая будзе рэакцыя. Улада сама не можа пра гэта сказаць, лічыць Святлана Алексіевіч.
Святлана Ціханоўская сёння, 20 снежня, у сацыяльнай сетцы Х паведаміла, што беларускія ўлады пагражаюць адабраць кватэру ва ўладальніцы Нобелеўскай прэміі па літаратуры Святланы Алексіевіч.
З пісьменніцай, якая цяпер жыве ў Германіі, паразмаўлялі журналісты «Люстэрка» і даведаліся падрабязнасці таго, што адбываецца.
Святлана Алексіевіч расказала, што інфармацыі пра арышт яе кватэры пакуль няма. Паводле словаў пісьменніцы, да нерухомасці маюць доступ яе давераныя асобы.
— Кватэра не апячатаная, нічога такога няма, — кажа нобелеўская лаўрэатка. — Пакуль толькі размовы пра гэта ходзяць, сябры дасылалі мне відэа [Рыгора] Азаронка, дзе ён прапануе аддаць маю кватэру шматдзетнаму амапаўцу. З імі не засумуеш! Мне здаецца важным, што не ўлада такія моманты агучвае, а прапагандысты. Я думаю, гэта спробны камень, яны ўкідваюць у грамадства такія мячы і глядзяць, якая будзе рэакцыя. Улада сама не можа пра гэта сказаць. Хоць, вядома, для мяне іх логіка неспасцігальная.
Глядзіце таксама
Святлана Алексіевіч кажа, што магчымая канфіскацыя мінскай кватэры будзе ёй непрыемная, але ніякіх каштоўнасцяў там няма. Нобелеўскі медаль яна забрала з сабой у Германію яшчэ падчас ад’езду з Беларусі ў 2020 годзе.
— У кватэры засталіся толькі мае асабістыя рэчы: кнігі, адзенне — усё, што складае чалавечае жыццё, — з сумам у голасе сказала нобелеўская лаўрэатка. — Жудасна ўсё гэта. Кватэра — гэта ж свет чалавека, у мяне там ніякіх багаццяў няма, акрамя майго свету. Гэта маё прынцыповае стаўленне да жыцця — толькі кнігі і рэчы, якія дарагія мне як памяць.
Паводле пісьменніцы, інфармацыйная кампанія пра неабходнасць канфіскацыі яе мінскай кватэры пачалася паралельна з хваляй ператрусаў і арыштаў нерухомасці людзей, звязаных з Каардынацыйнай радай. 1 снежня 2023 года сілавікі паведамілі, што па гэтай справе правялі больш за 200 ператрусаў па ўсёй Беларусі. Нагадаем, у жніўні 2020 года Святлана Алексіевіч увайшла ў прэзідыум Каардынацыйнай рады, пасля чаго была вымушаная пакінуць Беларусь.