Мігранты працягваюць штурмаваць межы Польшчы і Літвы з боку Беларусі

У суботу, 19 лістапада, 43 чалавекі спрабавалі незаконна перасекчы беларуска-польскую мяжу, паведамляюць у сваім Twitter польскія памежнікі. Тым часам Памежны камітэт нашай краіны паведамляе, што на беларуска-польскай мяжы 19 лістапада знайшлі труп мужчыны. Як сцвярджае ведамства, ён знаходзіўся «недалёка ад брамкі ў польскай загародзе».

У раёне памежнага пункта «Белавежа» перасекчы мяжу спрабавалі 23 мігранты, але ў выніку яны вярнуліся ў бок беларускай мяжы. На памежным пункце «Крынкі» трое мігрантаў паспрабавалі патрапіць у Польшчу праз Свіслач, яны апынуліся грамадзянамі Камеруна і Сірыі.

За дапамогу мігрантам у пераходзе мяжы палякі затрымалі двух грамадзян Грузіі.

У Літве за мінулыя суткі літоўскія памежнікі разгарнулі 38 мігрантаў, паведамляе delfi.lt са спасылкай на літоўскую дзяржаўную памежную службу.

Тым часам Памежны камітэт Беларусі паведамляе, што на беларуска-польскай мяжы 19 лістапада знайшлі труп мужчыны. «Пры сабе ў загінулага знойдзеныя дакументы грамадзяніна Ірака, — перадае ведамства. — Для ўстанаўлення абставін здарэння і прычын смерці на месца выклікана следча-аператыўная група. Праводзяцца следчыя дзеянні».

Тым часам Украіна будуе сцяну на мяжы з Беларуссю, паведаміў у сваім тэлеграм-канале намеснік кіраўніка офіса прэзідэнта Украіны Кірыл Цімашэнка.

«Цяпер на поўдні нашы людзі сустракаюць нашых вайскоўцаў, а на поўначы кіпіць іншая праца — тут узводзяць сцяну на мяжы з Беларуссю. Роў, насып, жалезабетонны плот з калючым дротам — гэта інжынерныя загароды, якія будуюць на Валыні», — напісаў ён.

Па словах Цімашэнкі, ужо «добраўпарадкавана» каля 3 кіламетраў мяжы, і працы працягваюцца.

«Таксама работы вядуцца і ў Ровенскай і Жытомірскай абласцях. Узводзяць фартыфікацыйныя збудаванні і ўладкоўваюць мяжу таксама і ў рэгіёнах, якія мяжуюць з тэрыторыяй Расіі. Нашы памежнікі 24/7 адсочваюць сітуацыю, маюць усё неабходнае абсталяванне для таго, каб убачыць ворага далёка ў тыле», — напісаў украінскі чыноўнік.

Ён адзначыў, што над уладкаваннем мяжы сістэмна працуе абласная ўлада і мясцовы бізнес. «Мы ўсе хочам абароны, мы робім усё, каб спыніць нават гіпатэтычнае прасоўванне ворага», — адзначыў ён.

Нагадаем, што пасля «мігранцкага крызісу» 2021 года сцены на мяжы з Беларуссю ўзвялі Літва і Польшча. Сёлета пабудаваць плот на мяжы з нашай краінай вырашыла Латвія. А цяпер — і Украіна.

Пакуль што без плоту застаецца мяжа з Расіяй.

Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: