Моцныя пратэсты прымусяць улады лічыцца з ІП

Дыктатар зводзіць асабістыя рахункі з прадпрымальнікамі.



Сёння адбудзецца першае пасяджэнне рабочай групы ў пытаннях дзейнасці індывідуальных прадпрымальнікаў, створанай у Міністэрстве эканомікі.

Прадстаўнікі ўрада і бізнэс супольнасці абмяркуюць праблемы захавання патрабаванняў аб сертыфікацыі прадукцыі, нагадвае “Заўтра тваёй краіны”.

Сасноў: Класавая нянавісць мацнейшая

Ці гатовыя ўлады пайсці на саступкі “іпэшнікам”?

— Гэта толькі спосаб зацягнуць пытанне, каб у далейшым знішчыць прадпрымальніцтва, — мяркуе былы міністр працы Аляксандр Сасноў. — У нас у краіне ўсё залежыць ад аднаго чалавека. Астатняе антураж: выпусціць пар, пагаварыць, пачакаць, каб гэтая праблема рассмакталася.

Эксперт нагадвае, што ў 1995 годзе Аляксандр Лукашэнка заяўляў, што беларускіх бізнэсоўцаў “трэба стрэсці, як вашывых блох!”

На думку экс-міністра, кіраўніка Беларусі не спыніць той факт, што прадпрымальнікі плацяць грошы ў бюджэт, не патрабуюць ад дзяржавы дапамогі.

— У гэтым выпадку класавая нянавісць мацнейшая, — перакананы Аляксандр Сасноў.

Кіраўнікоў краіны не хвалюе далейшы лёс “іпэшнікаў”

Палітолаг Валерый Карбалевіч адзначае, што галоўнае патрабаванне прадпрымальнікаў — скасаванне прэзідэнцкага ўказу №222, які абавязвае “іпэшнікаў” рэалізоўваць прадукцыю, увезеную з краін Мытнага саюза, толькі з суправаджальнымі дакументамі. А паколькі пастаўшчыкі адмаўляюцца выдаваць дакументы аб паходжанні прадукцыі альбо даюць фіктыўныя, то беларускіх прадпрымальнікаў штрафуюць.

Са слоў экспэрта, урадавыя чыноўнікі самі не могуць развязаць гэтую праблему.

— Так, указ №222 можна адтэрмінаваць яшчэ на паўгода, як гэта ўжо рабілася двойчы. Але потым праблема паўстане зноў. Зноў жа, каб адтэрмінаваць, трэба пастанова прэзідэнта. А чыноўнікі могуць толькі абяцаць, што не будуць паўгода правяраць прадпрымальнікаў, або што штрафы будуць невялікія. На ўсё астатняе ў іх няма паўнамоцтваў, — падкрэслівае аналітык.

Ён мяркуе, што ў беларускіх уладаў ёсць некалькі прычын для незадаволенасці індывідуальнымі прадпрымальнікамі.

— Па-першае, ІП ўвозяць тавар з-за мяжы, а ўрад шмат гадоў вядзе барацьбу з імпартам. Лукашэнка яшчэ летась сказаў, звяртаючыся да ІП, што “вы знішчаеце лёгкую прамысловасць Беларусі”, увозіўшы тавар з-за мяжы, што стварае канкурэнцыю айчыннай лёгкай прамысловасці, — нагадвае экспэрт.

Аднак галоўная прычына негатыўнага стаўлення ўладаў да “іпэшнікаў”, на думку Валерыя Карбалевіча, у тым, што самім сваім існаваннем прадпрымальнікі парушаюць патэрналісцкую мадэль дзяржавы.

— Беларускія ўлады спачатку вялікай лыжкай адбіраюць ва ўсіх, а потым дзеляць. ІП не ўпісваюцца ў гэтую мадэль, яны ні ў каго нічога не просяць. Затое ствараюць пастаянныя праблемы, перыядычна пратэстуюць, мітынгуюць. У Лукашэнкі асабістыя рахункі з гэтым сацыяльным пластом, і цяпер ён іх зводзіць, — кажа палітолаг.

Аналітык мяркуе, што кіраўніка краіны не хвалюе далейшы лёс індывідуальных прадпрымальнікаў.

Ён нагадвае, што пастанова была прынятая яшчэ гады два-тры таму, калі сітуацыя ў краіне была больш-менш нармальнай. Цяпер улады не хочуць прызнаваць, што памыліліся, і скасаваць указ №222.

— Для Лукашэнкі прадпрымальнікі — чужыя людзі. Вось зачыняць дзяржпрадпрыемствы і звальняць людзей, якія працуюць там, для яго праблема, —  мяркуе экспэрт.

Тым не менш, на думку палітолага, у “іпэшнікаў” ёсць шанец дамагчыся скасавання ўказу №222.

— Калі будуць дастаткова моцныя і актыўныя пратэсты, і яны будуць нарастаць, то, магчыма, улады пойдуць на саступкі. Інакш усё застанецца як ёсць, — прагназуе Валерый Карбалевіч.

Паводле: Хартыя 97