Некамплект даходзіць да 60% ад штатнай колькасці. У якім стане беларуская армія?

У выпадку паўнавартаснага ўступлення падраздзяленняў УС РБ у баявыя дзеянні на баку РФ рэжыму Лукашэнкі неабходна будзе праводзіць частковую мабілізацыю для даўкамплектавання ў першую чаргу падраздзяленняў Сухапутных войскаў.

На сайце Міністэрства абароны РБ раз у паўгода абнаўляюцца звесткі аб наяўнасці воінскіх пасад салдат і сяржантаў для іх замяшчэння вайскоўцамі, якія праходзяць ваенную службу па кантракце. «Экстрэмісцкі» тэлеграм-канал журналіста, якога ўсе просяць аб дапамозе, звярнуў увагу на гэтыя лічбы.

Апошняе абнаўленне інфармацыі было 25 студзеня 2023 года. Канал прааналізаваў інфармацыю аб вакансіях, каб высветліць, у якіх частках і па якіх пасадах існуе найбольшы дэфіцыт. Становішча ў войску, насамрэч, гаротнае.

Некалькі важных удакладненняў

1. Бралі пад увагу толькі пасады з колькасцю вакантных месцаў ад 5 і вышэй;
2. Пры вызначэнні штатнай колькасці падраздзяленняў аўтары кіраваліся дапаможнікам па арганізацыйнай структуры падраздзяленняў механізаваных брыгад ад 2016 года. Па гэтай прычыне могуць быць некаторыя хібнасці з працэнтным налічэннем некамплекта падраздзяленняў (напрыклад, па снайперах, бо ў механізаваных брыгадах у 2020 годзе былі сфарміраваны ўзводы снайпераў);
3. Колькасць вакансій можа не адлюстроўваць рэальнага ўкамплектавання частак УС РБ спецыялістамі (у рэальнасці некамплект можа быць яшчэ большым). Колькасць вакансій паказвае толькі, якая колькасць вайскоўцаў в/ч гатова прыняць для праходжання ваеннай службы па кантракце;
4. Інфармацыя аб вакансіях прадстаўлена МА РБ на 25 студзеня. Адпаведна частка з іх ужо можа быць запоўнена.

У якіх частках адчуваюць самы востры дэфіцыт кадраў?

6-я асобная механізаваная брыгада (в/ч 05733, Гродна):

• 7 снайпераў (18% для механізаванага батальёна);
• па 8 кулямётчыкаў і гранатамётчыкаў (77% для кулямётчыкаў і 89 – для гранатамётчыкаў адной мотастралковай роты);
• 9 наводчыкаў-аператараў БМП-2 (24% для механізаванага батальёна);
• 11 механікаў-кіроўцаў БМП-2 (29% для механізаванага батальёна).

202-гі асобны механізаваны батальён 6-й АМБР (в/ч 09155):

• 24 снайперы (некамплект снайпераў у батальёне складае 62%);
• па 8 наводчыкаў-аператараў і механікаў-кіроўцаў БМП-2 (некамплект па пасадах складае 21%).

Танкавы батальён 6-й АМБР (в/ч 97109):

6 камандзіраў, 10 наводчыкаў і 8 механікаў-кіроўцаў танкаў Т-72Б, што адпавядае двум танкавым узводам. Пры гэтым асобна наводчыкаў танкаў шукаюць на цэлую танкавую роту. Агульны некамплект танкавых экіпажаў па батальёне складае 20%; па механіках-кіроўцах — 24%; па наводчыках — 32%.

78-мы асобны механізаваны батальён 6 АМБР (в/ч 04108):

• 6 снайпераў (некамплект снайпераў у батальёне складае 16%);
• 5 намеснікаў камандзіраў узводаў-камандзіраў аддзяленняў (56% ад штатнай колькасці механізаванага батальёна);
• па 9 наводчыкаў і кіроўцаў БТР-82А (некамплект 23%).
• у 350-й групе артылерыі 6 АМБР (в/ч 14310) шукаюць 8 кіроўцаў.

11-я асобная механізаваная брыгада:

• 20 снайпераў (52% ад штатнай колькасці механізаванага батальёна);
• 12 камандзіраў і па 15 наводчыкаў і механікаў-кіроўцаў танкаў Т-72Б (39% і па 49% адпаведна для танкавага батальёна);
• па 25 камандзіраў, наводчыкаў-аператараў і механікаў-кіроўцаў БМП-2 (некамплект па 64% адпаведна для механізаванага батальёна);
• 6 камандзіраў зенітнай гарматы (100% некамплект для зенітнай батарэі комплексу «Тунгуска» — 2К22 са складу асобнага зенітнага ракетна-артылерыйскага дывізіёна брыгады);
• 7 камандзіраў гарматы 2С1 (39% для гаўбічнага дывізіёна групы артылерыі механізаванай брыгады);
• 6 камандзіраў машыны БМ-21 «Град» (33% для рэактыўнага дывізіёна групы артылерыі механізаванай брыгады);
• 10 механікаў-кіроўцаў МТ-ЛБ і 74 кіроўцы-электрыкі.

Каго яшчэ шукаюць у іншых частках?

2-я Інжынерная брыгада: 8 сапёраў.

5-я асобная брыгада спецыяльнага прызначэння: 10 разведчыкаў.

30-я асобная чыгуначная брыгада: 5 электрыкаў.

Кіналагічны цэнтр УС РБ (Калодзішчы): па 5 важатых службовых сабак і стралкоў.

4970-я база інжынерных боепрыпасаў: 12 такелажнікаў.

228-мы асобны полк радыёэлектроннай барацьбы: 6 механікаў.

10-ты асобны батальён радыёэлектроннай барацьбы: 11 аператараў станцыі перашкод.

Асобна варта адзначыць запатрабаванасць кіроўцаў і механікаў-кіроўцаў. Усяго мы знайшлі 329 вакансій кіроўцаў і 95 механікаў-кіроўцаў з колькасцю вакантных месцаў 5+. Усяго ж вакансій кіроўцаў (-электрыкаў, -санітараў, -зваршчыкаў, -кранаўшчыкоў, -хімікаў і інш.) незалежна ад іх колькасці мы знайшлі не менш за 470, а механікаў-кіроўцаў — каля 120.

Больш за ўсё кіроўцаў і механікаў-кіроўцаў шукаюць (акрамя в/ч, названых вышэй):

2-я Інжынерная брыгада;

814-ты цэнтр тэхнічнага забеспячэння;

3620-я артылерыйская база ўзбраення;

83-ці цэнтр радыёсувязі (спецыяльнага прызначэння);

30-я асобная чыгуначная брыгада;

110-ты асобны полк матэрыяльнага забеспячэння;

49-я радыётэхнічная брыгада;

8-я брыгада радыяцыйнай, хімічнай і біялагічнай абароны (адразу 39 кіроўцаў);

16-ты асобны полк радыёэлектроннай барацьбы з самалётнымі сродкамі (адразу 19 кіроўцаў);

111-я артылерыйская брыгада;

74-ты асобны полк сувязі;

2285-ты асобны радыётэхнічны батальён;

1146-ты зенітна-ракетны полк;

103-я паветрана-дэсантная брыгада;

231-я артылерыйская брыгада;

377-мы зенітна-ракетны полк (адразу 27 кіроўцаў);

228-мы асобны полк радыёэлектроннай барацьбы;

10-ты асобны батальён радыёэлектроннай барацьбы;

51-я артылерыйская брыгада (адразу 20 кіроўцаў).

Асноўныя высновы

Найбольшы недахоп УС РБ адчуваюць у кіроўцах. Сярод усіх вакансій, прапанаваных для службы па кантракце, менавіта кіроўцы (у самых розных варыяцыях) займаюць першай месца. Ні для каго не сакрэт, што ў любой в/ч маецца вялікая колькасць аўтамабіляў рознага прызначэння, што стварае вялікі попыт на такіх спецыялістаў.

І гэта ў сітуацыі, калі, напрыклад, у механізаваных брыгадах па штатах мірнага часу ўкамплектаваны толькі асобныя падраздзяленні, якія ўваходзяць у склад сіл неадкладнага рэагавання (астатнія падраздзяленні ўкамплектаваны часткова або кадраваныя).

Гэты факт пацвярджаецца мерапрыемствамі баявой падрыхтоўкі, якія праводзяцца УС РБ. Магчымая прычына сітуацыі з кіроўцамі ва УС РБ заключаецца ў невысокай і неканкурэнтаздольнай заработнай плаце для кіроўцы-кантрактніка ў параўнанні з магчымасцю заробку «на грамадзянцы» (у таксі, кіроўцам-міжнароднікам і інш.).

Паводле інфармацыі МА РБ, кіроўца-кантрактнік зможа зарабляць у войску блізу 900 BYN ($322). Праблему з недахопам кіроўцаў спрабуюць вырашаць, у тым ліку праз аўташколы пры ДТСААФ, у якіх правы кіроўцы могуць атрымаць прызыўнікі.

Звяртае на сябе ўвагу і неўкамплектаванасць падраздзяленняў механізаваных брыгад Сухапутных войскаў. Гледзячы па вакансіях, прадстаўленых на сайце МА РБ, значную патрэбу ў спецыялістах адчувалі толькі 6-я і 11-я механізаваныя брыгады (абедзве ўваходзяць у склад Заходняга аператыўнага камандавання УС РБ). Пры гэтым вакансій для службы ў 19-й і 120-й мехбрыгадах не падавалася.

У цэлым па некаторых пазіцыях некамплект можа даходзіць да 60% ад штатнай колькасці падраздзялення (у сярэднім некамплект можа складаць траціну або чвэрць).

Гэты факт, у тым ліку, сведчыць, што ў выпадку паўнавартаснага ўступлення падраздзяленняў УС РБ у баявыя дзеянні на баку РФ рэжыму Лукашэнкі неабходна будзе праводзіць частковую мабілізацыю для даўкамплектавання ў першую чаргу падраздзяленняў Сухапутных войскаў.