Пачынаюць судзіць выкладчыцу Наталлю Дуліну. Сярод абвінавачванняў — інтэрв'ю «экстрэмісцкаму» медыя
Сёння ў Мінскім абласным судзе пачынаюць судзіць былую выкладчыцу МДЛУ Наталлю Дуліну, паведамляюць праваабаронцы. Яе абвінавачваюць паводле ч. 1 арт. 361-4 («Садзейнічанне экстрэмісцкай дзейнасці»), ч. 1 арт. 342 («Арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх») Крымінальнага кодэкса.
Наталля Дуліна была затрымана на пачатку кастрычніка 2022 года ў межах крымінальнай справы за ўдзел у пратэстах (арт. 342 КК).
Затрымлівалі яе мінімум шэсць сілавікоў. Да гэтага цягам
года Наталлю затрымлівалі чатыры разы і судзілі паводле палітычна матываваных
адміністрацыйных артыкулаў.
У сярэдзіне лістапада 2022 года стала вядома, што Наталлю
абвінавачваюць у садзейнічанні экстрэмісцкай дзейнасці паводле арт. 361-4 КК.
Апошні артыкул — гэта яўна пра інтэрв'ю «экстрэмісцкім» медыя. Менавіта за гэта лукашэнкаўцы асудзілі ўжо двух палітвязняў — ваеннага аналітыка Ягора Лебядка (пяць гадоў калоніі) і жонку блогера Ігара Лосіка (таксама палітвязня) Дар'ю Лосік (два гады).
Наталля Дуліна летась размаўляла з карэспандэнтам «экстрэмісцкага» «Еўрарадыё». Хутчэй за ўсё, менавіта тое інтэрв'ю ёй цяпер і ставяць у віну, праз што педагогу пагражае да шасці гадоў зняволення.
«Беларусам трэба пазбавіцца ад дзвюх рэчаў, каб стаць звычайнай еўрапейскай дзяржавай. Еўрапейскай не толькі з пункту гледжання геаграфіі, але і ўсярэдненага менталітэту, звычак, традыцый. Гэтыя рэчы — так званы «савок» і Расія, — казала тады Наталля. — Мы не ўсведамляем, што нават у паўсядзённым жыцці мы пастаянна прывязаныя, дэманструем гэтую спадчыну і ўплыў.
Гэта выяўляецца
нават у нейкіх дробязях: як святкуем падзеі, выпіваем, збіраемся разам.
Нездарма ж ёсць клішэ, што Беларусь — гэта апошні астравок Савецкага Саюза. Што
тычыцца Расіі, то гэты «рускі свет» — ён таксама ўсюды.
Мы можам колькі
заўгодна крычаць, што мы Беларусь, а не Беларусія, але гэта нічога не зменіць,
пакуль мы не памяняем адносіны нават да простых рэчаў. Напрыклад, калісьці я
сказала, што ў Беларусі павінна быць адна дзяржаўная мова — беларуская.
Было шмат
каментароў, у адным з якіх чалавек напісаў: "Я абсалютна з вамі ва ўсім згодны,
акрамя рускай мовы. За яе я парву". Але ж адзіная дзяржаўная мова не забараняе
грамадзянам гаварыць на іншых мовах.
Яшчэ адно
далікатнае пытанне, якое вырашае, наколькі хутка мы можам перайсці да
дэмакратыі — гэта пытанне смяротнага пакарання. Многія людзі, якія лічаць сябе
дэмакратамі, загразлі ў старых і кансерватыўных уяўленнях. Гэта ў тым ліку
ўплыў Расіі. Паглядзіце, як там ставяцца да чалавечага жыцця».
Былая выкладчыца
таксама ўспомніла, што ў 2022 годзе яе тройчы затрымлівалі. У сувязі з гэтым
яна дала беларусам некалькі парад.
«Я хачу сказаць беларусам, якія знаходзяцца ў Беларусі: не трымайце дома сімволікі і не рабіце рэпостаў. Пратэставаць з дуляй у кішэні — гэта важна для самога чалавека. Але давайце сімволіка будзе ў нас унутры, тым больш мы ўжо зразумелі, хто мы ёсць, — сказала Наталля. — Я думаю, што трэба напісаць кнігу або зняць фільм, які будзе прысвечаны затрыманням. Гэта будзе бестселер. Адна мая сукамерніца сядзела за тое, што ў яе на ўнутраным баку дзвярэй быў БЧБ-квадрат.
Думаю, што калі
ўжо і сядзець, то за канкрэтныя дзеянні. Напрыклад, былі затрыманні падчас
рэферэндуму ў лютым. Але ў тым ліку дзякуючы нашым дзеянням Лукашэнка не
адправіў беларускія войскі на вайну».
Наталля Дуліна — былая дацэнтка кафедры італьянскай мовы МДЛУ, сябра Каардынацыйнай рады. Яна падтрымала забастоўку і пратэсты студэнтаў.