Палітолаг: У 2016 годзе апазіцыя наўрад ці будзе ўяўляць рэальную пагрозу для ўлады

Развіццё ўнутрыпалітычнай сітуацыі ў Беларусі ў 2016 годзе будзе залежаць ад таго, ці будзе ўлада бачыць пагрозу для сябе з боку апазіцыі. Такое меркаванне выказаў у прагнозным каментары БелаПАН палітолаг Валер Карбалевіч.



"Калі ўзнікнуць сацыяльныя пратэсты, працоўныя канфлікты, забастоўкі на прадпрыемствах, патрабаванні павысіць зарплату, і на гэтым фоне апазіцыя пачне актыўнічаць (напрыклад, Мікалай Статкевіч стане заклікаць людзей выходзіць на вуліцу), тады трэба чакаць узмацнення рэжыму ўнутры краіны", — лічыць палітолаг. Цяперашні ўзровень вулічнай актыўнасці, калі на акцыі збіраюцца каля 100 чалавек, сур'ёзнай пагрозы ўладзе не нясе, дадаў ён. 
Паводле прагнозаў Карбалевіча, з улікам таго, што адбываецца размарожванне адносінаў Беларусі з Захадам, істотных зменаў ва ўнутранай палітыцы краіны чакаць не даводзіцца. 
Нават пагаршэнне эканамічнай сітуацыі наўрад ці прывядзе да пратэстаў, лічыць палітолаг. У пацвярджэнне гэтаму ён прывёў вынікі снежаньскага даследавання Незалежнага інстытута сацыяльна-эканамічных і палітычных даследаванняў (НІСЭПД, Літва), якія паказваюць: сацыяльнае незадавальненне ў беларускім грамадстве не нарастае, а, хутчэй, адаптуецца да пагаршэння ўзроўню жыцця.
Старшыня Аб'яднанай грамадзянскай партыі (АГП) Анатоль Лябедзька, прагназуючы развіццё ўнутрыпалітычнай сітуацыі ў Беларусі ў гэтым годзе, адзначыў, што актыўным удзельнікам падзей стане эканамічны і фінансавы крызіс. 
"Крызіс становіцца асноўным апанентам і выклікам беларускіх уладаў. Пакуль, мяркуючы па праекце бюджэту, Лукашэнка ніякіх дзейных рэцэптаў па пераадоленні крызісу не прапаноўвае", — сказаў палітык. 
На яго думку, падобная сітуацыя "стварае вялікія магчымасці для прыхільнікаў перамен, бо ўлады, каб атрымаць крэдыты міжнародных фінансавых арганізацый, вымушаныя будуць максімальна ўстрымлівацца ад шчыра жорсткіх рэпрэсій".
Адной з асноўных палітычных падзей 2016 года лідар АГП назваў парламенцкія выбары, якія пройдуць восенню. "Прыхільнікам перамен неабходна выступіць з моцным палітычным і сацыяльна-эканамічным пасланнем. Калі гэта адбудзецца, падтрымка прадстаўнікоў улады на выбарах складзе ад 15 да 20%. Хаця выніковыя лічбы галасавання ўлады, канешне ж, могуць напісаць любыя", — адзначыў Лябедзька.
Паводле прагнозаў экс-кандыдата ў прэзідэнты, былога палітзняволенага Мікалая Статкевіча, развіццё сітуацыі ўнутры краіны сёлета будзе залежаць ад узроўню палітычнай напружанасці ў грамадстве. "Да нейкага моманту ўлада будзе сябе стрымліваць, але як толькі ўзровень напружанасці ў грамадстве пачне зашкальваць і прарывацца на вуліцу, усе намёкі на лібералізацыю знікнуць", — лічыць Статкевіч.
Паводле БелаПАН