Прапаганда страціла мову?
Рэжым яшчэ не адрэагаваў на магчымае забойства кіраўніка расійскіх баевікоў Яўгена Прыгожына і яшчэ дзевяцярых чалавек, якія ляцелі з ім на борце «Embraer», і прапаганда вымушаная цяпер угадваць, якая рэакцыя будзе адпаведнай.
Ілюстрацыйнае фота «НЧ»
У дзяржаўных медыя Беларусі па-ранейшаму стрымана асвятляюць авіякатастрофу ў Цвярской вобласці Расіі і гібель кіраўніка ПВК «Вагнер» Яўгена Прыгожына. У навінавых выпусках дзяржТБ і ў стужках праўладных выданняў, у асноўным, кароткая інфармацыя ад афіцыйных крыніц, заўважыла «Media IQ».
Толькі на тэлеканале АНТ выйшаў сюжэт з падрабязнасцямі пра інцыдэнт. Але і тут танальнасць была нейтральнай, а інфармацыя была пададзеная на аснове афіцыйных паведамленняў. Праўда, не абышлося без вось такога каментара аўтара:
«Безумоўна, вакол катастрофы ў Цвярской вобласці будзе шмат канспіралогіі. Усё здарылася ў жніўні — традыцыйна нешчаслівым месяцы для расеійскай авіяцыі, "перыяд катастроф" — яшчэ называюць яго ў Расіі. Плюс і сама фігура Яўгена Прыгожына была занадта неадназначнай».
Глядзіце таксама
Таксама на сайце АНТ працытавалі допіс грамадскага дзеяча Аляксандра Сасноўскага, які заявіў:
«Парадаксальна, але гібель Прыгожына адсоўвае дыверсію на "Паўночным патоку" ад англасаксонска-ўкраінскага следу. Заходнія эксперты будуць выкарыстоўваць довад, маўляў, "калі рускія забілі Прыгожына, то і дыверсія на ПП – іх рук справа". Зразумела, што версія рускага следу стане для іх адзінай. Такога роду псіхалагічны ход абсалютна ў духу старой брытанскай школы».
Больш у афіцыйных дзяржмедыя Беларусі пра тэорыі і версіі адносна гучнай авіякатастрофы пакуль практычна не гавораць. Толькі на тэлеканале СТБ у перадачы Рыгора Азаронкапрагучала заява праўладнага палітолага Аляксея Дзерманта:
«Разганяецца тэма, што кіраўніцтва "Вагнера" ліквідавалі ў выніку канфлікту, які быў у Прыгожына з вайсковым кіраўніцтвам. Думаю, гэта глупства. На мой погляд, па-першае, была заява Буданава, украінскага тэрарыста, кіраўніка ГУР, які сказаў: глядзіце, у бліжэйшыя дні будуць нейкія падзеі. Пайшла версія, што выбуховае рэчыва было закладзена ў адсек шасі, быў выбух менавіта ў небе. Гэта быў тэрарыстычны акт. Выбухоўка была закладзена на зямлі, а выбух выраблены ўжо ў небе.
Каму гэта выгадна? Адразу скажу, што ні Уладзіміру Пуціну, ні вышэйшаму ваенна-палітычнаму кіраўніцтву гэта нявыгадна, таму што гэта выставіла б іх у святле непрывабным. Але ўкраінскім спецслужбам гэта выгадна, таму што абвінавачанні пасыпаліся б якраз у бок расійскага кіраўніцтва».
Глядзіце таксама
Далей Дзермант працягнуў прасоўваць версію наконт дачынення да інцыдэнту Украіны і Захада, «каб паставіць на дыбкі Расію, каб узнік канфлікт паміж людзьмі, арміяй, прэзідэнтам»:
«Я думаю, спецыяльна і планавалі гэтую акцыю, каб выклікаць гэтыя супярэчнасці ўнутры Расіі. Але мне здаецца, гэта не атрымаецца. Думаю, ніхто не паверыць, што кіраўніцтва Расіі да гэтага датычнае, у тым ліку простыя людзі, просты народ, расійскі народ».
Акрамя таго, падобныя тэзісы прасоўваў яшчэ адзін праўладны палітолаг – Андрэй Лазуткін. Яго публікацыю ў «Мінскай праўдзе» пабачыла «Радыё Свабода». Лазуткін таксама выказаўся супраць версіі, што да гібелі Прыгожына могуць быць датычныя расійскія ўлады.
Глядзіце таксама
Акрамя як на афіцыйных медыя, прапагандысты выказваліся на іншых пляцоўках, — у прыватнасці, у Telegram-каналах. Праўладны палітолаг Аляксандр Шпакоўскі паспрабаваў растлумачыць, чаму гарантыі Аляксандра Лукашэнкі перад Прыгожыным аказаліся нявыкананымі:
«Беларускія гарантыі аб'ектыўна могуць распаўсюджвацца толькі на тэрыторыю нашай краіны. Усе "вагнераўцы", у розны час дыслакаваныя ў Беларусі, уключаючы Прыгожына і Уткіна, знаходзіліся ў поўнай бяспецы. Уся дзейнасць Прыгожына па-за межамі Беларусі знаходзілася па-за полем зроку і сферай адказнасці беларускай дзяржавы».
Падобныя тлумачэнні прасоўвалі і іншыя праўладныя Telegram-каналы, заўважыла «Зеркало».