У Гомелі хлопца абвінавацілі ва ўдзеле ў мітынгу, а суд яго апраўдаў
У Гомелі ўчора разглядалі справу ў дачыненні да 22-гадовага веласіпедыста Мікіты Бярнадскага, якога міліцыянты абвінавацілі ва ўдзеле ў несанкцыянаванай акцыі. А ён на ёй не быў — і з гэтым пагадзіўся суд, які перад гэтым дзве гадзіны ўдумліва разбіраўся, ці можна лічыць віну хлопца даказанай.
Учора ў судзе Савецкага раёна Гомеля разглядалі справу па, бадай, самым распаўсюджаным у апошні час адміністрацыйным артыкуле 23.34 (Парушэнне парадку арганізацыі або правядзення масавых мерапрыемстваў). Судзілі 22-гадовага Мікіту Бярнадскага. Хлопца позна ўвечары затрымаў АМАП: спачатку — за БЧБ-сцяг у заплечніку, а затым, ужо ў РАУС, на яго склалі пратакол за ўдзел у незаконным масавым мерапрыемстве — мітынгу ля будынка адміністрацыі Савецкага раёна.
Наогул мітынгам тое, што ў апошні час ладзіць моладзь у Гомелі, назваць складана. Гэта больш нагадвае перформанс або фотасесію — ад сілы хвіліны на тры. Моладзь выпроствае бел-чырвона-белыя сцягі, фатаграфуецца на іх фоне — і разбягаецца ў розныя бакі, пакуль не «забралі». Фота ўдзельнікі акцыі затым размяшчаюць у сацсетках.
Выглядае гэта прыкладна так.
Але ў гомельскай міліцыі абвясцілі рашучую вайну «партызанам»: усе іх перформансы імкнуцца маментальна спыняць, ладзяць сапраўдныя аблавы з засадамі, аперамі і АМАПам.
Так было і ўвечары 21 кастрычніка — з фота з БЧБ ля будынка адміністрацыі Савецкага раёна.
Але Мікіта ў судзе сцвярджае: ніякага дачынення асабіста ён да гэтага фота не мае, віну сваю катэгарычна не прызнае. Кажа, проста катаўся па горадзе з прыяцелем Мацвеем — а потым з'явіўся АМАП.
Хлопец, прыкметна хвалюючыся, падрабязна распавядае суддзі Аляксандру Мохараву, як усё было.
21 кастрычніка ў шэсць вечара ён сустрэўся з Мацвеем у ГЦ «Мандарын». Яны каталіся на роварах па Рэчыцкім праспекце, затым з'ехалі за горад да хімзавода, бліжэй да 21.00 вярнуліся на «Фестываль». У «Двух гусях» купілі ежы, паелі, пасядзелі на лаўцы, пагаварылі, бліжэй да адзінаццаці вечара вырашылі раз'язджацца па хатах. Стаялі на скрыжаванні каля ПК «Фестывальны» — і тут з'явіўся мікрааўтобус з АМАПам.
— Падышлі, спыталі: забароненае што-небудзь ёсць? Адкрывайце партфелі. У Мацвея нічога не было, а ў мяне быў БЧБ-сцяг. Праедзем, кажуць, у аддзяленне міліцыі, ровар прышпіліце каля ПК, — успамінае, як усё было, Мікіта.
— Ну чаго вы яго [БЧБ] узялі? — пытаецца суддзя.
— Планавалі на хімзаводскія горы, там хацеў яго сфатаграфаваць.
— А вам патлумачылі, за што вас затрымалі? — цікавіцца суддзя.
— Тыпу за сцяг.
— Вы сапраўды думаеце, што вас затрымалі за тое, што ў вас сцяг знайшлі?
— Так.
— Але вам ставіцца ў віну, што вы нібыта былі каля дома № 6 на праспекце Рэчыцкім. Вы ведаеце што гэта за будынак? — удакладняе суддзя.
— Так, гэта адміністрацыя Савецкага раёна.
— А адкуль вы ведаеце, што па гэтым адрасе адміністрацыя размешчана?
— Так казалі ў РАУС. Сказалі, што там быў мітынг.
— Вы ў ім удзел не прымалі?
— Я фізічна не мог у ім удзельнічаць. Я туды не даехаў нават. У мяне ёсць веласіпедны дадатак, які запісвае ў рэальным часе мой трэк. Там усё бачна — дзе я быў і калі. Але тэлефон цяпер у РАУС, яго канфіскавалі з гадзіннікам.
— Ці правільна суд разумее, што 21 кастрычніка да 23.00 вас наогул не было ля адміністрацыі Савецкага раёна? І гэта недарэчнасць? — удакладняе суддзя.
— Так.
— Ці правільна суд разумее, што вы не былі ў тым месцы, мітынг у якім вам ставіцца ў віну?
— Так.
— Увогуле вы ведалі, што 21 кастрычніка ля адміністрацыі мітынг плануецца?
— Калі б ведаў, мы б наогул у гэтым раёне ня спыняліся.
— Чаму?
— Ну, у заплечніку сцяг забаронены...
— А з чаго вы ўзялі, што ён забаронены? — не стрымаў усмешкі суддзя.
— Ну, мне так у РАУС сказалі.
Падтрымаць Мікіту ў суд прыйшлі сябры з веласупольнасці. Адзін з іх, той самы Мацвей, з якім ён катаўся, выступіў у судзе сведкам — і яго паказанні пацвярджалі словы Мікіты.
— Нас спыніў АМАП, у Мікіты гэты сцяг з «Аліэкспрэса», ён яшчэ запакаваны быў... Калі яны [міліцыянты] дасталі яго, то спыталі: «Вы што, падтрымліваеце нацыстаў?» — распавядае суду Мацвей.
— А для вас было нядзіўна, што Мікіту затрымліваюць за сцяг? — спытаў суддзя.
— Ну, гэта было дзіўна!
Пасля Мацвея ў зале суда з'явіўся яшчэ адзін сведка — оперупаўнаважаны Андрэй Капітанаў. Ён распавёў, што ў той вечар з двума калегамі ажыццяўляў ахову грамадскага парадку ў адміністрацыі Савецкага раёна, таму што была інфармацыя, што тут будзе праходзіць несанкцыянаваны мітынг. Паводле яго слоў, калі ён з калегамі падышоў да людзей са сцягамі, яны сталі разбягацца. Сярод іх быў і Мікіта, ён паехаў на ровары, кажа міліцыянт.
Суддзя паказвае Капітанаву фота і просіць апазнаць на ім Бярнадскага. Потым суддзя звяртаецца да Мікіты:
— Вы сябе апазнаеце?
— Дык мяне там не было, як я магу сябе там апазнаць! У мяне нават у куртцы капюшона не было. А там нехта ў капюшоне.
— А можа быць такое, што вы ў частцы апісання не памыліліся, а ў частцы асобы — памыліліся? — удакладняе ў міліцыянта суддзя.
— Не думаю, што я памыліўся, — кажа Капітанаў.
Але ў суда ўсё роўна ёсць пытанні: напрыклад, чаму тады Мікіту затрымалі, а Мацвея не? Разбіральніцтва працягваецца.
Праз дзве гадзіны суд прыняў рашэнне: вытворчасць па адміністрацыйнай справе ў дачыненні да Бярнадскага спыніць — у сувязі з недаказанасцю віны.
Зала запляскала суддзі Аляксандру Мохараву.
