Вуліца Першая Ленінская ў Дзяржынску
Паводле яе слоў, калі ў лістападзе мінулага года яна звярнулася ў райвыканкам, каб падпісаць новы тэхнічны пашпарт на дом, дык атрымала адмову на той падставе, што прыватныя домаўладанні вуліцы запланавана пад знос для будаўніцтва шматпавярховак. Чыноўнік прапанаваў жанчыне зноў звярнуцца ў райвыканкам пасля грамадскага абмеркавання генеральнага плана рэканструкцыі горада, якім прадугледжаны знос сядзібнай забудовы на шэрагу вуліц райцэнтру, у тым ліку і на Першай Ленінскай.
Дарэчы, грамадскае абмеркаванне было прызначана на 29 красавіка а 16.00, калі многія зацікаўленыя гараджане былі на працы, і таму не змаглі прысутнічаць на гэтай важнай для кожнага домаўладальніка сустрэчы. Тым не менш, у грамадскім абмеркаванні ўдзельнічалі каля 100 гараджанаў, з якіх амаль добрая палова — жыхары Першай Ленінскай. Падчас гэтай сустрэчы з гараджанамі чыноўнікі запэўнілі людзей у тым, што ад аўтараў праекта нічога не залежыць, бо яны толькі выконвалі ўказанне Міністэрства архітэктуры і будаўніцтва.
Аўтары праекту матывавалі запланаваны знос сядзібнай забудовы неабходнасцю рассялення жыхароў сталіцы ў гарады-спадарожнікі Мінска, у тым ліку і ў Дзяржынск, а таксама тым, што вуліца Першая Ленінская непрыгожая і забудаваная, у асноўным, старымі драўлянымі трухлявымі дамамі. Дарэчы, з гэтымі доказамі цяжка пагадзіцца, бо вуліца Першая Ленінская даволі ўтульная: шырокая, зялёная, заасфальтаваная і мае ходнікі, а дамы на ёй амаль усе добра дагледжаныя. Так, дом спадарыні Алены, якому 109 гадоў, выглядае вельмі прыстойна, бо гаспадыня клапатліва і своечасова даглядае сваё жыллё. “Дарэчы, калі мянялі вокны ў маёй хаце, дык свёрлы ламаліся аб яшчэ моцную драўніну. Так што мая сядзіба яшчэ стагоддзе прастаіць. Аднак чыноўнікі лічаць, што ўсе дамы на нашай вуліцы з’яўляюцца трухлявымі і ступень іх зносу незалежна ад года ўзвядзення вызначылі ў 65 адсоткаў. Пры гэтым абследаванне нашага жылля ніхто не праводзіў”, — сказала Алена Лаўрова.
Сама яна жадае і далей жыць у доме сваёй бабулі і на зямлі, а не ў шматпавярховіку. Тым больш, што жыхарам Першай Ленінскай ніхто так і не даў адказ на галоўнае пытанне: а дзе ж яны будуць жыць пасля зносу іх домаўладанняў? А паколькі людзі не могуць атрымаць дакладны адказ на гэтае важнае пытанне, дык карыстаюцца чуткамі, з якіх вынікае, што гараджанаў могуць перасяліць у пасёлак Энергетыкаў ці ў цэнтр сельсавету, вёску Станькава (абодва ў Дзяржынскім раёне). “Хоць чыноўнікі запэўніваюць, што з горада нас ніхто не выселіць. Аднак у Дзяржынску нічога не будуецца. Таму мы больш верым чуткам”, — зазначыла Алена Лаўрова.
Алена Лаўрова
Яна звярнула ўвагу на тое, што на вуліцы жыве шмат людзей сталага веку. “А сарваць іх з месца — значыць пахаваць. У кожнага гаспадара — невялікі прысядзібны ўчастак зямлі з гародам, дзе вырошчваецца экалагічна чыстая садавіна, гародніна і зеляніна. А заробкі і пенсіі ў нас не настолькі вялікія, каб ўсё гэта купляць на рынку. Апроч таго, нашыя дзеці і ўнукі не лайдачаць, а працуюць з намі на сваёй зямлі. І гэта вельмі важна для іх працоўнай загартоўкі і выхавання. Пасля ж пераезду ў шматпавярховікі замест працы на зямлі ім застанецца інтэрнэт і піва”, — падкрэсліла спадарыня Алена.
Для абароны сваіх маёмасных правоў жыхары Першай Ленінскай збіраюць подпісы пад зваротамі да дэпутатаў розных узроўняў і да старшыні Мінскага аблвыканкама. “Мы разумеем, што калі самі не будзем настойліва і сістэматычна абараняць свае правы, нас ніхто не абароніць”, — падкрэсліла Алена Лаўрова.
Яна выказала падзяку актывістам грамадскай ініцыятывы “Еўраперспектыва” Дзянісу Кобрусеву і Віктару Яўмененку за падтрымку жыхароў вуліцы Першай Ленінскай у адстойванні сваіх маёмасных правоў.
