Афіцыйны Мінск назваў сустрэчу Савета бяспекі ААН па сітуацыі ў Беларусі нелегітымнай

Нефармальная канферэнцыя СБ ААН па сітуацыі ў Беларусі з'яўляецца нелегітымнай і супярэчыць статуту ААН. Пра гэта заявіў пастаянны прадстаўнік Беларусі ў ААН Валянцін Рыбакоў.

- Мы паважаем Савет бяспекі як галоўны орган ААН з галоўнай функцыяй, цытую, «падтрымліваць міжнародныя мір і бяспеку». Аўтарытэт і рэпутацыя Савета бяспекі такім чынам, павінны шанавацца і абараняцца. Будучы адкрытымі для шырокага і канструктыўнага дыялогу, мы ніколі не прымем спробы іншых краін-членаў злоўжываць паўнамоцтвамі Савета бяспекі, у тым ліку праводзячы неафіцыйныя сустрэчы, як сёння, каб набраць палітычныя ачкі, ужываючы выбарчы падыход, - заявіў беларускі дыпламат.
Па словах Валянціна Рыбакова, такія спробы парушаюць палажэнні статута арганізацыі, а пытанні парушэння правоў чалавека павінны разглядацца адпаведнымі органамі ААН, якія маюць паўнамоцтвы на ажыццяўленне падобнай дзейнасці.
- Будучыня Беларусі, і мы падкрэсліваем гэта, будзе вырашацца яе уласным народам, як мы гэта неаднаразова даказвалі на працягу нашай гісторыі. Беларускія ўлады не пацерпяць знешняга ўмяшання. Мы заклікаем нашых замежных партнёраў прадэманстраваць мудрасць і бесстароннасць. Умяшанне ў нашы ўнутраныя справы, санкцыі ці нацыянальныя абмежавальныя меры ў дачыненні да Беларусі нанясуць шкоду ўсім. Мы заклікаем усе краіны выконваць нормы міжнароднага права і базавыя правілы міжнародных адносін, а таксама прынцыпы статута ААН, - заявіў Рыбакоў.

«Таго, хто кліча ўмяшальніцтва замежных сіл»

Намеснік пастаяннага прадстаўніка Расіі ў ААН Дзмітрый Палянскі заявіў, што сітуацыя ў Беларусі не павінна абмяркоўвацца на пасяджэннях Савета бяспекі, так як не ўяўляе пагрозы міру і з'яўляецца ўнутранай справай краіны. Ён таксама адзначыў, што беларускія ўлады не адмаўляюць выпадкі гвалту, якія адбыліся, паводле яго слоў, падчас разгону агрэсіўных натоўпаў, якія ставілі пад пагрозу захаванне закона і падтрыманне парадку ў краіне. Ён параўнаў беларускія пратэсты з французскім рухам «жоўтых камізэлек», нядаўнімі дэманстрацыямі ў Берліне, ЗША і Балгарыі, па якіх не было якіх-небудзь пасяджэнняў Савета бяспекі ААН, а лідарам гэтых пратэстаў не давалі пляцоўку для выступу. Таксама ён паставіў пад сумнеў выказванні Святланы Ціханоўскай.
- Мы ўважліва слухалі Святлану Ціханоўскую. Мы чулі заяву, што яна выйграла выбары. Але хто гэта пацвердзіў? Гэта новая рэальнасць, дзе любы можа абвясціць сябе абраным прэзідэнтам?
Палянскі заявіў, што на дадзены момант для Беларусі існуе пагроза замежнага ўмяшання, якую і варта абмяркоўваць.
- Фактычна існуе адна тэма для абмеркавання сёння, калі ўжо ўсе мы тут сабраліся - абуральнае ўмяшанне замежных сіл, перш за ўсё заходніх і паўднёвых суседзяў Беларусі, ва ўнутраныя справы з выразнай мэтай змены рэжыму. Гэтыя маніпуляцыі і ціск пачаліся нават да правядзення выбараў. У канцы ліпеня прэзідэнт Польшчы Анджэй Дуда загадаў мабілізаваць вайсковыя падраздзяленні і нават заявіў, што Польшча будзе гатова ўзяць пад кантроль пэўныя рэгіёны Беларусі, якія калісьці належалі Польшчы.
Расійскі дыпламат заявіў, што вялікая колькасць агрэсіўных дзеянняў супраць Беларусі зыходзіць ад Украіны, а ў іх удзельнічаюць прадстаўнікі нацыяналістычных і неанацысцкіх груп, у тым ліку «Трызуб» і «Правы сектар». Паводле яго слоў, гэтыя групы актыўна правакавалі радыкальную актыўнасць у Мінску і іншых гарадах, фінансавалі падобныя мерапрыемствы і, паводле інфармацыі расійскага боку, для падрыхтоўкі іх чальцоў працуюць трэніровачныя лагеры на Валыні і ў Днепрапятроўскай вобласці. Ён таксама нагадаў аб наяўных у Расіі дадзеных аб дзейнасці ў Беларусі 200 украінскіх баявікоў.
tut.by