Інтэрпол адмовіўся абвяшчаць у вышук былога польскага суддзю Шміта, які ўцёк у Беларусь
Інтэрпол «не дазваляе перадаваць па сваіх каналах дадзеныя адносна дзеянняў супраць бяспекі дзяржавы, якія вызначаюцца як палітычныя злачынствы».
Томаш Шміт (Фота: Tomasz_Szmydt / Telegram)
Былы суддзя Томаш Шміт, які папрасіў прытулку ў Беларусі, не будзе ўключаны ў спіс асоб, якія адшукваюцца Інтэрполам з «чырвоным апавяшчэннем», паведаміла агенцтву PAP прэс-сакратар Галоўнага ўпраўлення паліцыі Польшчы Катажына Новак.
Паводле яе слоў, рашэнне звязана з тым, што Інтэрпол «не дазваляе перадаваць па сваіх каналах дадзеныя адносна дзеянняў супраць бяспекі дзяржавы, якія вызначаюцца як палітычныя злачынствы», піша «Позірк».
Да такіх дзеянняў, адзначыла Новак, Інтэрпол, паводле арт. 3 свайго статута, адносіць шпіянаж.
Глядзіце таксама
22 траўня Галоўнае ўпраўленне паліцыі Польшчы атрымала патрабаванне пракуратуры ўключыць Шміта ў спіс асоб, якія адшукваюцца Інтэрполам з «чырвоным апавяшчэннем».
Новак анансавала тэхнічную праверку заяўкі з боку ўпраўлення міжнароднага паліцэйскага супрацоўніцтва. Сярод іншага, як заяўлялася, будзе праверана, ці змяшчае запыт усе неабходныя элементы — інфармацыю аб прад'яўленых абвінавачваннях, абранай меры ўтрымання, часовым арышце, абгрунтаванне, фатаграфію. Пасля гэтага паліцыянты ўнясуць заяўку ў базу дадзеных Інтэрпола.
У міжнароднага ведамства будзе 30 дзён на праверку заявы, пасля чаго «чырвонае апавяшчэнне ўступіць у сілу», заявіла Новак. Пры гэтым яна сказала, што працэдуры Інтэрпола, як паказвае практыка, «звычайна доўжацца да пяці дзён».
Глядзіце таксама
Інтэрпол апісвае «чырвонае апавяшчэнне» як« запыт да праваахоўных органаў краін свету аб вызначэнні месцазнаходжання і папярэднім арышце асобы ў чаканні экстрадыцыі, выдачы або аналагічнага прававога дзеяння».
У сярэдзіне траўня Варшаўскі акруговы суд задаволіў хадайніцтва пракуратуры аб завочным арышце Шміта на тры месяцы. Паведамлялася, што пасля гэтага наглядны орган абвесціць экс-суддзю ў вышук на тэрыторыі Польшчы і будзе дамагацца выдачы еўрапейскага ордэра на ягоны арышт.
Інфармацыя аб тым, што суддзя 2-га аддзялення Ваяводскага адміністрацыйнага суда Варшавы Шміт «пакуль неафіцыйна» папрасіў «статус палітычнага ўцекача» у Беларусі, з'явілася 6 мая ў тэлеграм-канале, створаным на тры дні раней ад яго імя на польскай і рускай мовах.
Паводле публікацыі, Шміт вымушана пакінуў Польшчу «з прычыны нязгоды з палітыкай і дзеяннямі ўладаў». Ён нібыта «падвяргаўся пераследу і пагрозам за самастойную палітычную пазіцыю».