Качанава абмяркоўвае, як пазбаўляць грамадзянства «экстрэмістаў» за мяжой

Старшыня Савета Рэспублікі Наталля Качанава збірала экспертны савет. Як паведамляе прэс-служба СР, на пасяджэнне быў вынесены праект зменаў закона «Аб грамадзянстве Рэспублікі Беларусь».


«Адной з прапанаваных экспертамі навацый з'яўляецца ўвядзенне нормы аб страце грамадзянства ў сувязі з наяўнасцю прысуду суда Рэспублікі Беларусь, які ўступіў у законную сілу, які пацвярджае ўдзел асобы ў экстрэмісцкай дзейнасці або прычыненне ім цяжкай шкоды інтарэсам дзяржавы, калі такая асоба знаходзіцца за межамі Рэспублікі Беларусь», — гаворыцца ў паведамленні прэс-службы.

У Савеце Рэспублікі лічаць, што такая норма накіравана на забеспячэнне нацыянальнай бяспекі, стабільнасці грамадска-палітычнай сістэмы і канстытуцыйных асноў дзяржаўнага ладу, піша REFORM.by.

У канцы 2020 года закон аб грамадзянстве ўжо быў абноўлены. У ім з'явілася норма аб магчымасці страты грамадзянства асобамі, якія прызнаныя судом вінаватымі ў экстрэмісцкай дзейнасці або прычыненні імі цяжкай шкоды інтарэсам Рэспублікі Беларусь. Аднак яна распаўсюджваецца толькі на паўналетніх грамадзян, якія набылі грамадзянства Беларусі ў выніку прыёму ў грамадзянства, у парадку рэгістрацыі, з прычыны аднаўлення ў грамадзянстве або па падставах, прадугледжаных міжнароднымі дамовамі. Такім чынам, яна не тычыцца грамадзян Беларусі па нараджэнні.

У канцы 2021 года начальнік ГУБАЗіК палкоўнік міліцыі Андрэй Паршын у інтэрв'ю выказаўся за пазбаўленне «экстрэмістаў» грамадзянства незалежна ад спосабу яго набыцця. У лютым гэтага года з удзелам Лукашэнкі абмяркоўвалася тая прапанова, роўна як і завочная крымінальная вытворчасць, паведамляў дзяржсакратар Савета бяспекі Аляксандр Вольфавіч.

Нядаўна Палата прадстаўнікоў і Савет рэспублікі прынялі папраўкі ў Крымінальна-працэсуальны кодэкс, якія прадугледжваюць з'яўленне інстытута спецвытворчасці, які дазваляе завочна весці расследаванне крымінальнай справы і перадаваць такія справы ў суд. Прадугледжана, што спецвытворчасць будзе магчымая па артыкулах аб злачынствах супраць міру і бяспекі чалавецтва, супраць дзяржавы, іншых злачынстваў, якія ўяўляюць пагрозы нацбяспецы. Завочнае расследаванне і суды будуць магчымыя, калі абвінавачаны ўхіляецца ад яўкі ў вядучы расследаванне орган, у яго выдачы адмоўлена, альбо на працягу шасці месяцаў не атрыманы адказ на запыт аб выдачы.

Трэба адзначыць, што закон аб зменах КПК яшчэ афіцыйна не апублікаваны.



Хочаце ведаць больш? Сачыце за нашымі публікацыямі ў Telegram і Facebook!

  • Апошняе на сайце
,
Больш цікавага на «Новым Часе»: