У «справе Баўмгертнэра» намеціўся круты паварот

Палітыка

Крэмль нарэшце падаў голас з нагоды арышту генеральнага дырэктара «Уралкалія». У сваю чаргу, афіцыйны Мінск працягвае гуляць на абвастрэнне.



povorot30.jpg

Цалкам відавочна, што, арыштоўваючы генеральнага дырэктара «Уралкалія» Уладзіслава Баўмгертнэра, беларускія ўлады разлічвалі як мінімум на нейтралітэт Уладзіміра Пуціна. Больш за тое, Мінск па сутнасці прапаноўваў клану расійскага прэзідэнта адабраць прадпрыемства у алігарха Сулеймана Керымава.

На магчымасць такога развіцця падзей намякаў яшчэ 19 жніўня генеральны дырэктар «Беларуськалія» Васіль Кірыенка, калі кінуў на прэс-канферэнцыі фразу, што аднаўленне саюза з расійскім прадпрыемствам магчыма, калі ў яго з'явіцца іншы ўласнік. А пасля праўладныя эксперты пачалі актыўна тыражаваць ідэю, што трэба ствараць сумесную калійную кампанію,  дамаўляючыся з расійскай дзяржавай, а не з прыватнымі структурамі. Натуральна, падобны сцэнар таксама прадугледжваў змену ўласніка «Уралкалія».


Але надзеі беларускіх уладаў, што каманда Уладзіміра Пуціна вырашыць скарыстацца сітуацыяй, якая склалася , каб перахапіць прынадны кавалак, пакуль не апраўдваюцца. Да апошняга часу за Уладзіслава Баўмгертнэра заступаліся толькі прадстаўнікі клана Дзмітрыя Мядзведзева. Аднак 30 жніўня, акурат у дзень нараджэння Аляксандра Лукашэнкі, загаварыў і Крэмль. Памочнік прэзідэнта РФ Юрый Ушакоў заявіў: «Прайшло пяць дзён з моманту арышту ў Мінску нашага грамадзяніна. Мы патрабуем неадкладнага яго вызвалення і разлічваем, што беларускі бок у бліжэйшы час гэта зробіць».

Гэта азначае, што Масква на дадзеным этапе выступае адзіным фронтам. І гэта чаравата вялікімі праблемамі для Аляксандра Лукашэнкі.


Пакуль афіцыйны Мінск дэманструе гатоўнасць ісці на абвастрэнне . 30 жніўня Следчы камітэт Беларусі пацвердзіў намер у бліжэйшы час прад'явіць абвінавачванне Сулейману Керымаву і аб'явіць яго ў міжнародны вышук.
Але ёсць сумневы, што Аляксандр Лукашэнка гатовы да поўнамаштабнага канфлікту з расійскім кіраўніцтвам. Занадта ўжо дорага можа абысціся біццё талерак. Расспажыўнагляд ужо забараніў імпарт свініны з Беларусі. Віцэ -прэм'ер РФ Аркадзь Дварковіч паабяцаў зрэзаць пастаўкі нафты ў Беларусь, а таксама актывізаваць расследаванне кантрабанды нафтапрадуктаў пад выглядам «растваральнікаў». І гэта далёка не ўсе рычагі , якія Масква можа пусціць у ход.
Аднак выканаць патрабаванні расійцаў і вызваліць Уладзіслава Баўмгертнэра для Аляксандра Лукашэнкі азначае, як мінімум, часткова згубіць твар. Бо ў Беларусі ўжо разгорнута маштабная прапагандысцкая кампанія пад лозунгамі «Перад законам усе роўныя» і «Абаронім народную ўласнасць ад брудных лап расейскіх алігархаў».
Цяпер Аляксандру Лукашэнку, падобна, трэба будзе зрабіць нялёгкі выбар: плюхнуць бензіну ў агонь, як ён паступае звычайна, або акуратна заліць пажар вадзіцай. Пакуль кіраўнік Беларусі «знік з радараў»: апошняе на дадзены момант паведамленне аб мерапрыемстве з яго удзелам датавана 27 жніўня. 
gazetaby.com