Альтэрнатыўныя сцягі. Графічнае дасье

У Расіі апазіцыя прыдумала новы варыянт нацыянальнага сцяга. Чым не нагода, каб пагаварыць пра такую ​​з'яву, як альтэрнатыўныя сцягі!
Расійскія апазіцыянеры прапануюць у якасці альтэрнатывы трыкалору бела-сіні-белы сцяг. Асноўнае адрозненне ад расійскага сцяга — адсутнасць чырвонай паласы, якая, як сцвярджаецца, пасля ўварвання ва Украіну асацыюецца з вайной і крывёй. Масавае выкарыстанне бела-сіне-белага сцяга якраз і пачалося ў лютым 2022-га, калі ён стаў сімвалам антываеннага пратэсту.

Не паспеў новы сцяг з’явіцца, як паўсталі пытанні наконт аўтарства. Сцяг з такой расфарбоўкай быў даўно на ўзбраенні прыхільнікаў рэстаўрацыі дзяржаўнасці Ноўгарада. Падобныя колеры таксама меліся на сцягу фантомнай краіны Вейшнорыя.

Безумоўна, ні расійская апазіцыя, ні аўтары Вейшнорыі не піянеры ў такой галіне, як стварэнне альтэрнатыўных сцягоў. Насамрэч, гэта вельмі папулярная з'ява ў тым ліку сярод аматараў альтэрнатыўнай гісторыі. У інтэрнэце можна знайсці самую незвычайную сімволіку. Напрыклад, нехта фантазуе на тэму, як бы выглядаў сцяг старажытнага Рыма, калі б там перамагла сацыялістычная рэвалюцыя.

Жарт жартам, аднак за альтэрнатыўнымі сцягамі могуць стаяць сур'ёзныя палітычныя праекты. Напрыклад, у Іспаніі практычна ўсе левыя сілы выкарыстоўваюць сцяг Другой іспанскай рэспублікі (1931-1939).
Актывісты многіх правых партый Германіі выходзяць на вуліцы са сцягам германскай імперыі (1871-1918). Пры гэтым многія з іх не з'яўляюцца паслядоўнікамі Бісмарка ці прускай дынастыі. Проста выбару няма — уся сімволіка трэцяга Рэйха ў ФРГ, дзякуй Богу, забаронена.
Постсавецкія абшары таксама не пазбеглі моды на альтэрнатыўныя сцягі. Так, у Малдове левая апазіцыя даўно ўжо прасоўвае ў грамадстве сцяг, які, на яе думку, выкарыстоўвалі ў часы князя Стэфана Вялікага. Гэты сцяг, як лічыць апазіцыя, дазволіць падкрэсліць малдаўскую аўтэнтычнасць у процівагу румынскай.

Якія шанцы ў альтэрнатыўнага сцяга стаць афіцыйным? Як не дзіўна, яны ёсць. Вельмі часта апазіцыя пасля прыходу да ўлады мяняе сцяг, каб падкрэсліць маштабнасць падзеі. Напрыклад, так зрабіў у 2004-м Міхаіл Саакашвілі: сцягам Грузіі стаў сцяг яго партыі «Адзіны нацыянальны рух». Праўда, трэба адзначыць, што дызайн сцяга быў вядомы яшчэ з ХІV стагоддзя.

Ну, а днямі дзяржаўным сцягам Афганістана стаў сцяг руху Талібан.

Лёс альтэрнатыўнай сімволікі часта непрадказальны.

Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: