Pfizer абвясціў аб стварэнні прэпарата ад каронавіруса, але вакцынавацца трэба

Pfizer абвясціў аб стварэнні пакславіда — прэпарата, які лечыць каронавірус. Але ні завяршэння пандэміі, ні адмены вакцынацыі гэта не азначае.

Эфект прэпарата Pfizer, распрацаванага для прадухілення стварэння копій віруса, аказаўся настолькі моцным, што ўжо ў сярэдзіне даследавання незалежны камітэт, які назірае за клінічным выпрабаваннем, рэкамендаваў спыніць яго як мага раней. Эксперты палічылі, што кампанія-вытворца ўжо можа звяртацца ў FDA — амерыканскае ўпраўленне па кантролі за якасцю харчовых прадуктаў і медыкаментаў па афіцыйны дазвол на прэпарат у ЗША і да іншых міжнародных рэгулятараў, каб лекі маглі пастаўляцца паўсюль у свеце.
Навіна стала галоўнай у Амерыцы, дзе каронавірус забраў жыцці больш за 750 тысяч чалавек. З пачатку пандэміі даследчыкі ва ўсім свеце спяшаліся знайсці таблетку для лячэння COVID-19, якую можна было б прымаць дома, каб аблегчыць сімптомы, паскорыць выздараўленне і зберагчы людзей ад шпіталізацыі.
Урад ЗША знаходзіцца ў працэсе закупкі таблетак для 1,7 мільёна курсаў лячэння ў Pfizer, па словах высокапастаўленага чыноўніка адміністрацыі, які размаўляў з газетай "Вашынгтон пост" на ўмовах ананімнасці, таму што не быў упаўнаважаны абмяркоўваць куплю. Будзе дадатковая магчымасць набыць яшчэ 3,3 мільёны ўпаковак, кожная з якіх забяспечвае поўны курс лячэння. Вялікабрытанія і Аўстралія закупляюць новы прэпарат Pfizer, дзясяткі іншых краін вядуць перамовы. Генеральны дырэктар кампаніі Альберт Бурла заявіў амерыканскаму ТБ, што кампанія падасць даныя рэгулюючым органам да свята Дня падзякі, які ў гэтым годзе адзначаецца 25 лістапада.
Як паведамляюць СМІ, кампанія ўклала ў вытворчасць таблетак 1 мільярд долараў, не чакаючы дазволу FDA.
Да канца года Pfizer збіраецца вырабіць больш за 180 тысяч упаковак таблетак. Кампанія працуе над хуткім павелічэннем вытворчасці прынамсі да 21 мільёна упаковак у першай палове наступнага года, пры гэтым агульны аб'ём вытворчасці складзе 50 мільёнаў упаковак у 2022 годзе.
Цікава, што кампанія Pfizer не стала першай, хто прадставіў міру антыкавідныя таблеткі. Канцэрн Merck ужо запытаў у FDA дазвол для свайго прэпарата — малнупіравіра. Вялікабрытанія стала першай краінай свету, якая афіцыйна абвясціла аб дазволе для гэтага прэпарата — роўна за дзень да аб'яўлення аб новых леках ад Pfizer. Як паведаміла крыніца ў Белым доме, ЗША заключылі пагадненне з Merck аб закупцы 1,7 мільёна курсаў лячэння малнупіравірам за 1,2 мільярда долараў. Эфектыўнасць гэтай таблеткі падчас выпрабаванняў склала 50%. У красавіку вытворца абвясціў аб добраахвотных ліцэнзійных пагадненнях з вытворцамі джэнерыкаў у Індыі для паскарэння даступнасці малнупіравіра ў больш чым 100 краінах з нізкім і сярэднім узроўнем даходаў, як толькі лек атрымае неабходныя дазволы.
Генеральны дырэктар Pfizer Альберт Бурла паведаміў, што для краін з высокім узроўнем даходаў кампанія разлічвае ўстанавіць цану на лячэнне, блізкую да той, якую ўстанавіла за свае лекі Merck. Кошт кантракту Merck у ЗША складае каля 700 долараў за пяцідзённы курс тэрапіі. Па словах Бурла, для краін з нізкімі даходамі Pfizer разглядае некалькі варыянтаў, з тым каб "не было перашкод для іх доступу да лекаў". Трэба разумець, што ў рэальнасці ў ЗША кошт лекаў будзе вызначацца і ўрадавымі праграмамі, і страхавымі кампаніямі, і спонсарамі-дабрачынцамі (калі спатрэбіцца), а не толькі "вялікай фармай" — так называюць канцэрны-гіганты, вытворцы лекаў, прыхільнікі тэорыі змоў.
Але і Merck не стварыла першыя антыкавідныя лекі. Раней ЗША ўхвалілі яшчэ адзін супрацьвірусны прэпарат ад COVID-19 — рэмдэсівір, створаны кампаніяй Gilead Sciences. Гаворка ідзе пра дарагое лячэнне антыцеламі, якія дапамагаюць імуннай сістэме пацыента змагацца з вірусам. Прэпарат уводзіцца нутравенна або ін'екцыйна ў бальніцах або клініках.
Эксперты ў галіне грамадскай аховы здароўя лічаць, што ў доўгатэрміновай перспектыве спатрэбіцца некалькі супрацьвірусных прэпаратаў для стварэння кактэйляў і камбінаваных метадаў лячэння, якія гарантуюць, што каронавірус, які пастаянна развіваецца, не знойдзе спосабу абысці яго.
Pfizer апублікавала папярэднія вынікі даследавання 775 дарослых. Пацыенты прымалі 30 таблетак на працягу пяці дзён. Двойчы ў дзень на працягу курса лячэння яны прымалі дзве таблеткі пакславіда і адну таблетку іншага супрацьвіруснага прэпарата, рытанавіра. Па словах кампаніі, даданне рытанавіра дапамагае запаволіць распад прэпарата Pfizer, падаўжаючы яго працягласць, што дапамагае змагацца з вірусам. Позняя стадыя даследавання пачалася ў ліпені, і ў яго былі ўключаны людзі з высокай рызыкай сур'ёзнага захворвання COVID-19. Каля паловы з іх атрымлівалі прэпарат і нізкую дозу рытанавіра, у той час як іншыя ўдзельнікі даследавання атрымлівалі плацэба, гэта значыць пустышку.
У пацыентаў, якія атрымлівалі пакславід неўзабаве пасля з'яўлення сімптомаў COVID-19, праз месяц камбінаваная частата шпіталізацыі або смерцяў знізілася на 89% у параўнанні з пацыентамі, якія прымалі пустышку.
Менш за 1% пацыентаў, якія прымалі прэпарат, мелі патрэбу ў шпіталізацыі, і ніхто не памёр.
У групе параўнання 7% былі шпіталізаваны, і было сем смяротных выпадкаў. "Мы спадзяваліся, што ў нас ёсць нешта экстраардынарнае, але рэдка можна ўбачыць выдатныя лекі з амаль 90% эфектыўнасцю і 100% абаронай ад смерці", — сказаў у інтэрв'ю доктар Мікаэль Долстэн, галоўны навуковы супрацоўнік Pfizer. Удзельнікі даследавання не былі вакцынаваны, хварэлі COVID-19 ад лёгкай да ўмеранай ступені цяжкасці і лічыліся пацыентамі з высокай рызыкай шпіталізацыі з-за праблем са здароўем, такіх як атлусценне, дыябет ці хваробы сэрца. Лячэнне пачалося на працягу трох-пяці дзён пасля з'яўлення першых сімптомаў і працягвалася пяць дзён. Пацыенты, якія атрымлівалі прэпарат раней, паказалі крыху лепшыя вынікі, што падкрэслівае неабходнасць больш хуткага тэсціравання і лячэння.
У той час як цяжарныя жанчыны былі выключаны з даследавання Merck з-за патэнцыйнай рызыкі прыроджаных дэфектаў, прэпарат Pfizer не меў падобных абмежаванняў. Прэпарат Merck працуе, умешваючыся ў генетычны код каронавіруса, што з'яўляецца новым падыходам да знішчэння віруса. Прэпарат Pfizer з'яўляецца часткай сямейства супрацьвірусных прэпаратаў, вядомых як інгібітары пратэазы. Яны зрабілі рэвалюцыю ў лячэнні ВІЧ і гепатыту С. Гэтыя прэпараты блакуюць ключавы фермент, неабходны вірусам для размнажэння ў арганізме чалавека. Упершыню прэпарат быў знойдзены падчас ўспышкі атыповай пнеўманіі, якая ўзнікла ў Азіі ў 2003 годзе. У мінулым годзе даследчыкі кампаніі вырашылі "адрадзіць лекі" і вывучыць іх на COVID-19, улічваючы падабенства паміж двума каронавірусамі.
Вакцынацыя застаецца галоўнай зброяй супраць пандэміі, таблеткі могуць працаваць разам з прышчэпкай, але не замест яе. Таблетка не спыняе распаўсюджванне віруса. Каб яна эфектыўна спрацавала, неабходна пры з'яўленні першых сімптомаў COVID-19 адразу ж зрабіць тэст.
Паводле «Новой газеты»