Польскія памежнікі атрымалі права ўжываць зброю на польска-беларускай мяжы
Польскія памежнікі, якія нясуць службу на польска-беларускай мяжы, атрымалі зброю — пакуль гладкаствольную, і права яе ўжываць. І ўжо ўжылі яе пры нападзе групы мігрантаў, паведаміў намеснік міністра МУС Польшчы Чэслаў Мрочак.
«Памежнікі ў патрулях атрымалі гладкаствольную зброю. У чацвер яго ўпершыню ўжылі да групы мігрантаў. Гэта мела эфект, мігрантам давялося адступаць», — цытуе Rzeczpospolita намесніка міністра МУС Польшчы Чэслава Мрочака.
Паводле яго слоў, з лютага бягучага года памежнікі адзначалі, што мігранты больш не рэагуюць на папераджальныя стрэлы, бо ведаюць, што польскія службы не могуць страляць у іх.
«Такіх папераджальных стрэлаў жаўнеры зрабілі сёлета блізу 1,2 тысяч», — удакладніў Мрочак, адзначыўшы, што з пачатку года з боку Беларусі мігранты спрабавалі прарваць мяжу 17 тысяч разоў.
З 4 чэрвеня на польска-беларускай мяжы працуюць 370 паліцэйскіх. Такім чынам, памежная групоўка (з улікам супрацоўнікаў дарожнай паліцыі, кінолагаў і контртэрарыстычных падраздзяленняў) на гэтым участку вырасла больш чым у шэсць разоў. Да нядаўняга часу тут неслі службу 60 чалавек.
Забеспячэнне зброяй польскіх памежнікаў і сілавікоў, якія нясуць службу на польска-беларускай мяжы, пачалося пасля таго, як тут атрымаў раненне, а пазней памёр польскі вайсковец. Да гэтага часу паліцыянты хадзілі з пустымі кабурамі. Толькі пасля трагічнага інцыдэнту і ў выніку агульнай эскалацыі ў апошнія тыдні было прынята рашэнне, што яны павінны насіць зброю.
Акрамя таго, прыцягнутыя інструктары цяпер будуць навучаць вайскоўцаў і памежнікаў «спраўляцца з натоўпам». У гэтай сувязі выданне згадвае, што на мяжу прывезена цяжкая паліцэйская тэхніка — спецыяльныя браневікі.
Глядзіце таксама
Са слоў Мрочака, памежнікі, паліцыянты і жаўнеры «сутыкаюцца з такімі праблемамі на польска-беларускай мяжы, з якімі яны ніколі раней не сутыкаліся».
«Не ведаеш, з якога боку нападуць, пасыплецца град камянёў, металічных шарыкаў з самаробных рагатак, выпушчаных з нацягнутых паміж дрэвамі гумовых стужак, якія могуць забіць цябе», — прыводзіць выданне словы аднаго з афіцэраў.
Улічваючы не толькі фізічныя, але і эмацыйныя нагрузкі, якія даводзіцца несці падчас службы на гэтым участку мяжы, дзяржава плаціць памежнікам 540 злотых з памежнага забеспячэння, а жаўнерам — 400 адсоткаў ад іх забеспячэння за поўны дзень, гэта значыць 180 злотых.
Плюс да гэтага, каб знізіць наступствы ад пастаяннага напружання, вайскоўцам забяспечана ратацыя: пасля двух тыдняў службы на мяжы іх змяняюць.
Раней паведамлялася, што паранены 28 траўня польскі вайсковец памёр у вайсковым медыцынскім інстытуце ў Варшаве.
Паводле Reform.news