Рэвалюцыя дальнабойшчыкаў. Дасье ў карыкатурах

Сталіцу Канады фактычна захапілі кіроўцы грузавікоў, што пры вялізнай народнай падтрымцы пратэстуюць супраць новых антыкавідных нормаў. Чым скончыцца пратэст — пакуль незразумела, але, падобна, новая форма народнага абурэння пачынае распаўсюджвацца па ўсім свеце.

Рух, які, па меркаванні шэрагу каментатараў на Захадзе, можа змяніць свет, пачаўся з-за жадання канадскіх уладаў забараніць перасячэнне мяжы для грузавых аўто, кіроўцы якіх не маюць т. зв. кавід-пашпартоў або не прайшлі вакцынацыю. Канадскія дальнабойшчыкі павінны прад'явіць адмоўны ПЛР-тэст, атрыманы на працягу 72 гадзін пасля прыбыцця на мяжу, і адправіцца ў каранцін пасля прыбыцця. Правілы набылі моц 15 студзеня 2022 года.

Многія, у тым ліку карыкатурысты, папярэджвалі, што для ліберальнага прэм'ера Джасціна Трудо гэта рызыкоўны ход. На гэтую тэму малюнак Малькольма Мауеса (Malcolm Mayes).

1_527.jpg

Новыя нормы выклікалі абурэнне кіроўцаў па ўсёй краіне, паколькі практычна адразу ў шмат каго пачаліся праблемы. Некаторыя з шафёраў, якія правялі па 16 гадзін за стырном, затрымаліся на мяжы, і адразу выявіўся недахоп ПЛР-тэстаў. А нязгодных з новымі правіламі пачалі штрафаваць. У адказ на гэтыя крокі дальнабойшчыкі пачалі акцыі пратэсту ў выглядзе руху калоны машын у сталіцу — «Канвой свабоды». На некаторых участках калона расцягвалася на 70 кіламетраў. Увогуле акцыя ўжо стала самай буйной у гісторыі Канады. Што тычыцца мастакоў, то яны выяўлялі пратэст у выглядзе ДТЗ з удзелам прэм’ера і грузавіка.  

2_486.jpg


Наўрад рух атрымаў такі маштаб без народнай падтрымкі. Улады спрабавалі забараняць людзям вітаць канвой на ўзбочынах дарог пад пагрозай штрафу памерам да 500 долараў у эквіваленце. Насельніцтва ігнаравала забароны, сустракала дальнабойшчыкаў сцягамі і транспарантамі, карміла іх падчас прыпынкаў. Прадстаўнікі некалькіх аддзяленняў федэральнай паліцыі падтрымалі кіроўцаў.

У гэтым плане можна казаць, што цяперашні пратэст — гэта не бзік антываксёраў. Гэта найперш пратэст супраць абмежаванняў, якія ўводзяць нікім не абраныя і не адказваючыя перад народам чыноўнікі і іх дарадцы з ліку медыкаў і навукоўцаў. Гэтую сітуацыю выданне Rebel news адлюстравала з дапамогай алюзіі на вядомую фатаграфію часоў пратэстаў на пекінскай плошчы Цяньаньмэнь.


3_435.png


Між тым 29 студзеня каля 70 000 чалавек «узялі ў аблогу» будынак парламента Канады ў Атаве, вынікам якой стала паніка ў адміністрацыі прэм'ера. З меркаванняў бяспекі Джасцін Трудо і яго сям'я былі эвакуіраваныя ў невядомае месца ў сталіцы краіны. Як жартуюць карыкатурысты, Джасцін Трудо збег у музей васковых фігур мадам Цюссо, дзе экспанатамі служаць фігуры былых палітыкаў ці поп-зорак.

4_407.jpg


Пакуль сітуацыя патавая. Аблога парламента працягваецца. Кіраўнік урада хаваецца. Адначасова ліберальныя СМІ спрабуюць перайграць пратэст у інфармацыйнай сферы. Пратэстоўцаў выяўляюць як папулістаў і ворагаў дэмакратыі.

5_375.jpg

6_265.jpg


І нават як расістаў і фашыстаў. Дарэчы, такія асацыяцыі не спадабаліся Ілону Маску, які падтрымаў пратэстоўцаў.

7_185.jpg


Важны нюанс — за пратэстамі актыўна назіраюць у суседніх ЗША. Падзеі ў Канадзе натхнілі мясцовых крытыкаў вакцынацыі, якія ўваходзяць у лагер рэспубліканцаў. Амерыканскія кіроўцы заяўляюць аб намеры выкарыстаць канадскі досвед. Калі імаверныя пратэсты ў ЗША набудуць такі ж размах, як у Канадзе, адміністрацыі Байдэна прыйдзецца не салодка. Не дзіўна, што карыкатуры выданняў, блізкіх да дэмакратаў, пужаюць электарат такім сцэнаром. На адным з малюнкаў «Канвой свабоды» вітае чалавек у адзенні ўдзельніка спробы захопу Кангрэса ў студзені мінулага года.

8_130.jpg


Ініцыятывы стварыць свой аналаг «Канвою свабоды» таксама фіксуюцца ў Аўстраліі, Эстоніі, Даніі і іншых краінах свету. Зрэшты, ці змогуць яны стаць такім жа масавым рухам, як у Канадзе — вялікае пытанне. Але самая вялікая загадка — як маглі стваральнікі мультыплікацыйнага серыяла «Сімпсаны» яшчэ ў 1999-м так дакладна прадбачыць тое, што адбываецца цяпер? Пераканайцеся самі!