Новы антырэкорд — за суткі 8231 чалавек захварэлі на каронавірус
Міністэрства аховы здароўя паведаміла новую лічбу хворых за апошнія суткі — 8231 чалавек.
Міністэрства аховы здароўя за апошнія суткі выявіла 8231 выпадак каронавіруса, 16 пацыентаў з COVID-19 памерлі. Прынамсі такія лічбы вынікаюць з афіцыйнай статыстыкі.
Такім чынам, 5 лютага мы маем новы сутачны рэкорд у Беларусі, што перакрыў рэкордныя мінулыя суткі 4 лютага — калі Мінздароўя паведаміла пра 7350 выпадкаў заражэнняў.
Нагадаем, з 1 лютага Міністэрства аховы здароўя дазволіла медыкам ставіць дыягназ «каронавірус» без правядзення ПЦР-тэсту, калі на тое былі ў наяўнасці «клінічныя і / або рэнтген-тамаграфічныя даныя», а міністр аховы здароўя Дзмітрый Піневіч падпісаў указ, які дазваляе студэнтам 6 курса медуніверсітэтаў афармляць бальнічныя лісты ў паліклініках.
Прычым ужо сёння, 5 лютага, і далей — «да нармалізацыі эпідэміялагічнай абстаноўкі і ўзроўню захворвання на ВРВІ і COVID-19 у абласцях і Мінску» — прыём пацыентаў у паліклініках будзе весціся ў суботнія і нядзельныя дні. У тым ліку гэта тычыцца выкліку дактароў да хаты да хворага.
