Сіндром дысперсіі пігмента ператварыў вочы пацыента ў «Вока Саўрона»
Медыкі апісалі выпадак даволі рэдкага захворвання вачэй — сіндром дысперсіі пігмента, які надаў вачам хворага падабенства з Вокам Саўрона з серыі фільмаў «Уладар пярсцёнкаў». Лекары правялі пацыенту тэрапію, але пакуль невядома, ці набылі яго вочы нармалёвы выгляд.
Злева: вока пацыента з сіндромам дысперсіі пігмента. Справа: Вока Саўрона, кадр з фільма «Уладар пярсцёнкаў»
Сіндромам дысперсіі пігмента называецца захворванне, пры якім пігментныя клеткі вясёлкавай абалонкі адлучаюцца ад яе і пачынаюць плаваць у вадкасці, якая запаўняе камеры вочы. Паступова яны пагаршаюць адток вадкасці ўнутры вачэй. Гэта прыводзіць да росту ціску ўнутры вачэй і развіццю пігментнай глаўкомы. Часцей за ўсё сіндром дысперсіі пігмента сустракаецца ў мужчын еўрапеоіднай расы ва ўзросце 20-40 гадоў, якія пакутуюць блізарукасцю. На развіццё захворвання могуць уплываць і генетычныя фактары.
У лякарню пры Тэхаскім універсітэце ў Осціне звярнуўся 44-гадовы мужчына. Ён нядаўна пераехаў у новы раён і прыйшоў да лекара на першасны агляд. У чальцоў яго сям’і была глаўкома — падвышаны ціск у вачах, які можа прывесці да атрафіі глядзельнага нерва. У пацыента таксама стаў расці ціск унутры вачэй, таму ён пачаў кансультавацца ў афтальмолага. Лекар, які назіраў яго раней, прапісаў кроплі, што паніжалі ціск, таму ён у мужчыны практычна нармалізаваўся. Але пры гэтым вясёлкі вачэй у яго нагадвалі Вока Саўрона з фільма «Уладар пярсцёнкаў»: яны былі цёмнага колеру і акружаны аранжавым кольцам.
Медыкі Ланс Лайанс (Lance Lyons) і Алек Амрам (Alec Amram), якія працуюць у Медыцынскім аддзяленні Тэхаскага універсітэта агледзелі пацыента і паставілі яму дыягназ сіндром дысперсіі пігмента ў абодвух вачах. Лекары правялі лазэрную працэдуру, якая дазваляе палепшыць адток вадкасці ўнутры вачэй і ўжываецца для лячэння глаўкомы. У той жа час ён працягнуў капаць кроплі, каб рэгуляваць ціск. Аднак аўтары не паведамляюць, ці набылі вочы пацыента нармалёвы выгляд ці ён па-ранейшаму падобны на фантастычнага персанажа.
Раней амерыканскія афтальмолагі апісвалі, што можа адбыцца са зрокам у выпадку злоўжывання віяграй. Адзін з пацыентаў, які прыняў занадта вялікую дозу сілдэнафіла (дзеючага рэчыва гэтага прэпарата) стаў бачыць свет у чырвоным колеры. А ў другога ў вачах з’явіліся сляпыя плямы ў форме пончыкаў.
Паводле nplus1.ru