Спёка ў Пакістане. Загінула каля 600 чалавек, моргі перапоўненыя
Тысячы чалавек трапілі ў бальніцы і некалькі сотняў памерла ў выніку спякоты ў Пакістане. Асабліва шмат пацярпелых у Карачы, найбуйнейшым горадзе краіны.
Фота EPA-EFE
Тэмпература паветра ў горадзе перавысіла 40°C, але праз высокую вільготнасць спякота адчувалася як 49-50°C.
Фэйсал Эдхі, кіраўнік Фонду Эдхі, які кіруе найбуйнейшай у краіне службай хуткай дапамогі, заявіў, што ў пачатку тыдня іх машыны даставілі ў моргі дзясяткі целаў ахвяр цеплавога ўдару.
Як правіла, штодня ў гарадскі морг Карачы паступаюць ад 30 да 40 цел. Але за апошнія шэсць дзён іх колькасць вырасла да 568, з іх 141 было сабрана толькі ў аўторак. Ён таксама адзначыў, што «большасць з іх былі з бедных раёнаў горада».
Тры моргі фонду ў Карачы ўмяшчаюць у агульнай складанасці 264 целы. І ўсе яны запоўненыя цалкам.
«Мы вымушаныя трымаць па тры целы на адной паліцы. Нам таксама прыйшлося тэрмінова пахаваць 22 незапатрабаваныя целы, пратрымаўшы іх значна менш, чым звычайна, каб вызваліць месца. І з недахопам месцаў сутыкаюцца ўсе моргі горада, нават пры мячэцях і жалобных залах», — распавядае Фэйсах Эхдзі.
Пакуль яшчэ нельга з упэўненасцю сказаць, што ўсе яны памерлі менавіта ад цеплавога ўдару, але высокія тэмпературы, безумоўна, былі адной з прычын.
Загадчык аддзялення неадкладнай дапамогі ў грамадзянскай бальніцы Карачы Імран Сарвар Шэйх распавёў агенцтву Associated Press, што ў перыяд з нядзелі па сераду па дапамогу звярнуліся 267 чалавек з цеплавым ударам, 12 з якіх пазней памерлі.
«Большасць людзей, якія звярнуліся ў бальніцу, былі ва ўзросце 60-70 гадоў. Але некаторым было каля 45 і нават некалькі 20-гадовых, — распавёў ён Бі-бі-сі. — Многія з тых, каму мы аказалі дапамогу, працавалі на вуліцы. Мы параілі ім піць як мага больш вады і насіць лёгкую вопратку, што неабходна пры такіх высокіх тэмпературах».
Сімптомы цеплавога ўдару ўключаюць ваніты, дыярэю і высокую тэмпературу.
Глядзіце таксама
Хваля спёкі накрыла Пакістан у мінулыя выходныя. Улады адкрылі спецыяльныя цэнтры ў надзеі аказаць дапамогу людзям, якія пакутуюць ад спёкі.
На жаль, далёка не ўсе, хто мае патрэбу ў дапамозе, здолелі яе атрымаць.
Напрыклад, 56-гадовы ахоўнік Васім Зафар страціў прытомнасць, прыйшоўшы дадому пасля 12-гадзіннай начной змены.
Да таго часу, калі сям'я Васіма давезла яго да бальніцы, было ўжо занадта позна. Лекары сказалі, што ён памёр, хутчэй за ўсё, ад сардэчнага прыступу.
Сітуацыю пагаршаюць перабоі з падачай электраэнергіі ў Карачы, што прыводзіць да рэгулярных адключэнняў кандыцыянераў і вентылятараў, адзінай магчымасці выратавацца ад спякоты.
Сярод тых, хто пацярпеў ад часовага адключэння электразабеспячэння, быў 40-гадовы Мухамед Амін. У Пакістане ўлады даволі часта часова адключаюць электразабеспячэнне, каб хоць неяк рэгуляваць недастатковыя магутнасці.
Сваяк Мухамеда сказаў, што ў іх кватэры электрычнасць адключалі пастаянна. Як ён распавёў, Мухамеду раптам стала дрэнна, і праз кароткі час ён памёр. Прычына смерці афіцыйна не ўстаноўлена, хоць яго сям'я падазрае, што памёр ён менавіта праз спякоту.
Паводле звестак газеты Dawn, хуткая дапамога падабрала на вуліцах целы 29 чалавек. Паліцэйскі лекар Сумайя Сайед адзначыла, што многія з іх, магчыма, злоўжывалі наркотыкамі.
«На іх целах не было ніякіх слядоў траўмаў. Але іх знешні выгляд і тое, што іх целы былі заўважаныя кіроўцамі хуткай дапамогі на ходніках і абочынах дарог, кажа пра тое, што, хутчэй за ўсё, яны былі наркаманамі», — патлумачыла яна, дадаўшы, што ўлады сталі лічыць верагоднай прычынай іх смерці цеплавы ўдар.
Паводле яе слоў, у морг для афармлення юрыдычных фармальнасцяў, то бок для правядзення ўскрыцця, каб вызначыць дакладную прычыну смерці, перадаюцца толькі тыя памерлыя, асобу якіх не ўдалося ўстанавіць.
Глядзіце таксама
Метэаролагі кажуць, што хваля спякоты ў Карачы працягнецца да будучага тыдня, хоць тэмпературы, паводле прагнозаў, будуць крыху ніжэйшымі.
Гэта далёка не першая хваля спякоты, якая накрыла Пакістан сёлета. Паводле даных агенцтва Reuters, у мінулым месяцы ў правінцыі Сінд, сталіцай якога з’яўляецца Карачы, была адзначана амаль рэкордная тэмпература ў 52,2°C.
Ад спёкі пакутуюць і найбліжэйшыя суседзі Пакістана. Напрыклад, у сталіцы Індыі Дэлі назіраецца беспрэцэдэнтна працяглая спякота. Пачынаючы з траўня, дзённая тэмпература перавышае 40°C, часам набліжаючыся да 50°C.
Эксперты сыходзяцца ў меркаванні, што падобныя экстрэмальныя з'явы становяцца ўсё больш частымі і інтэнсіўнымі ў выніку змены клімату.
Акрамя таго, метэаролагі кажуць, што сезон мусонаў сёлета наступіць раней, чым звычайна, і прынясе ў паўтара раза больш ападкаў.
Паводле заявы, апублікаванай Нацыянальным упраўленнем па барацьбе са стыхійнымі бедствамі Пакістана, у гэтым годзе мусоны пачнуцца ў ліпені і могуць выклікаць паводкі, ад якіх пацерпяць 200 000 чалавек.
Аднак афіцыйныя асобы заяўляюць, што дажджы сёлета будуць не такімі моцнымі, як у 2022 годзе, калі разбуральныя паводкі забралі жыцці 1739 чалавек, разбурылі 2 мільёны дамоў і ў нейкі момант пакрылі амаль траціну краіны, прынёсшы шкоду ў больш чым 30 млрд долараў ЗША.
Улады Пакістана кажуць, што нягледзячы на тое, што краіна нясе адказнасць менш чым за 1% выкідаў вуглякіслага газу ў свеце, яна перажывае асноўны цяжар наступстваў кліматычных катастроф.
Спякота аказвае прамы негатыўны ўплыў на сельскую гаспадарку, паколькі губіць пасевы і зніжае ўраджайнасць. Пры гэтым яна ўскосна ўплывае і на іншыя сферы, напрыклад, на адукацыю: праз спякоту ў некаторых раёнах прыйшлося зачыняць школы.
Паводле BBC.