Сустрэчы на Карэйскім паўвостраве: пра што маўчыць Кітай?

Пакуль расійскі кіраўнік Пуцін наведваў КНДР, каб паказаць сябе свету і падпісаць пагадненне аб стратэгічным партнёрстве, у суседняй Паўднёвай Карэі адбылася сустрэча з прадстаўнікамі Кітая. Ці звязаныя гэтыя дзве падзеі, высвятляў korrespondent.net.

Да чаго прыйшлі «два плюс два»?

Такім чынам, Пуцін і лідар Паўночнай Карэі Кім Чэн Ын сустрэліся ў аўторак, 18 чэрвеня. Яны нагаварылі адзін аднаму кампліментаў і запэўнілі ў падтрымцы (Кім, у прыватнасці, гэта сказаў пра вайну РФ ва Украіне), а ў сераду, 19 чэрвеня, два дыктатары ўжо правялі ў Пхеньяне афіцыйныя перамовы, абмеркаваўшы магчымасці вывесці двухбаковыя сувязі на новы ўзровень.

«Расія і Паўночная Карэя ўмацоўваюць вайсковыя сувязі, прычым Паўночная Карэя абвінавачваецца ў пастаўцы Расіі боепрыпасаў для выкарыстання Масквой у вайне ва Украіне ў абмен на дапамогу і на меркаваную тэхналагічную дапамогу для яе касмічнай праграмы. Паездка Пуціна ў Паўночную Карэю — першая за 24 гады — адбылася на фоне абвастрэння напружанасці на Карэйскім паўвостраве праз правакацыйныя дзеянні Паўночнай Карэі, такія як запускі праз мяжу паветраных шароў са смеццем і спробаў парушыць працу GPS-сігналаў вакол паўночна-заходняй мяжы поўдня вострава за апошнія тыдні», — паведамляе Korea Times.

Тым часам Паўднёвая Карэя і Кітай правялі ў Сеуле дыялог бяспекі ў фармаце «два плюс два» (МЗС і Мінабароны абедзвюх краін).

Ён адбыўся пад старшынствам намеснікаў міністраў замежных спраў Карэі Кім Хон Кюна і Кітая Сунь Вейдуна, адпаведна. Карэйскі бок падчас размовы выказаў занепакоенасць з нагоды візіту Пуціна ў Паўночную Карэю і папрасіў Кітай адыграць канструктыўную ролю, заявіўшы, што напружанасць, выкліканая ўзмацненнем ваеннага супрацоўніцтва паміж Масквой і Пхеньянам, не на карысць Пекіну.

«Мы выказалі глыбокую занепакоенасць тым, што візіт прэзідэнта Расіі Пуціна ў Паўночную Карэю адбываецца ў той час, калі Паўночная Карэя абвастрыла напружанасць на Карэйскім паўвостраве з дапамогай шэрагу правакацый, — гаворыцца ў заяве МЗС Рэспублікі Карэя. — Мы папрасілі Кітай адыграць канструктыўную ролю ў забеспячэнні міру, стабільнасці і дэнуклеарызацыі (памяншэнні або ліквідацыі ядзернай зброі. — Рэд.), паколькі напружанасць на Карэйскім паўвостраве, якая ўзнікае з прычыны ўмацавання ваеннага супрацоўніцтва паміж Расіяй і Паўночнай Карэяй, супярэчыць інтарэсам Кітая».

Таемны візіт у Пхеньян. Навошта Лукашэнка збліжаецца з Паўночнай Карэяй?

Паўднёвакарэйскія чыноўнікі таксама папрасілі Кітай спрыяць таму, каб Паўночнакарэйскіх перабежчыкаў, якія аказваюцца ў Паднябеснай, не вярталі сілком назад у КНДР, каб яны маглі адправіцца ў жаданыя месцы прызначэння. Бо як ключавы хаўруснік Пхеньяна Кітай не прызнае перабежчыкаў з Паўночнай Карэі ўцекачамі і рэгулярна рэпатрыіруе іх на радзіму, дзе ім пагражае суровае пакаранне.

У адказ Кітай пацвердзіў, што яго палітыка ў адносінах да Карэйскага паўвострава застаецца нязменнай, і што ён мае намер адыграць канструктыўную ролю ў вырашэнні ўсіх праблем паўвострава.

У МЗС таксама заявілі, што бакі абмеркавалі пытанні Украіны і кітайска-амерыканскіх адносін, але ніякіх падрабязнасцяў з гэтай нагоды не апублікавалі.

«У адным акопе»: Кім Чэн Ын прыбыў у Расію на сваім бронецягніку

Дарэчы, двухбаковыя абмеркаванні пытанняў бяспекі і дыпламатыі Паўднёвая Карэя і Кітай з удзелам высокапастаўленых службовых асоб праводзілі ў 2013 і 2015 гадах, але затым іх адносіны астудзіліся, зносіны паставілі на паўзу. Толькі ў канцы мая гэтага года адбылася доўгачаканая сустрэча — саміт лідараў азіяцкіх краін Паўднёвай Карэі, Японіі і Кітая, на якой абмеркавалі трохбаковае супрацоўніцтва ў такіх сферах, як эканоміка, гандаль, устойлівае развіццё, ахова здароўя, навука і тэхналогіі, кіраванне надзвычайнымі сітуацыямі і бяспека. Зносіны прадстаўнікоў Паўднёвай Карэі і Кітая, якія адбыліся ў Сеуле, — працяг дыялогу, распачатага ў маі на саміце. 

Ад прымусовых абортаў да забароны глядзець уверх. Праваабаронцы распавялі пра катаванні ў КНДР

Будуць супярэчнасці

Нягледзячы на тое, што Кітай спрабуе падыгрываць, як кажуць, і вашым, і нашым, ён усё роўна фактычна з'яўляецца галоўным у сваім рэгіёне і зусім не вораг ні КНДР, ні Расіі. Сумнеўна, што ён будзе хадайнічаць пра нешта па просьбе іншай краіны. Аднак калі Пуцін падчас свайго турнэ ў Паўночную Карэю і В'етнам не абмяжуецца вырашэннем пытання пастаўкі зброі і паспрабуе атрымаць для сябе асаблівы статус і кантроль над усёй постсавецкай прасторай, то яго чакае вялікае расчараванне.

«У Пуціна тут могуць узнікнуць супярэчнасці з Кітаем, паколькі Пекін прэтэндуе на ўплыў у Цэнтральнай Азіі, а таксама і з Турцыяй, якая прэтэндуе на ўплыў на Паўднёвым Каўказе і, у пэўнай ступені, таксама ўплывае на сітуацыю ў Цэнтральнай Азіі. Але ў цэлым пуцінская ідэя аб «архітэктуры роўнай і непадзельнай бяспецы ў Еўразіі» лішні раз дэманструе яго глабальныя планы», — адзначыў палітолаг, старшыня праўлення Цэнтра прыкладных палітычных даследаванняў «Пента» Уладзімір Фясенка ў каментары Фокусу.

Між тым генеральны сакратар NATO Енс Столтэнберг заявіў у інтэрв'ю BBC, што Пекін дарма спрабуе ўседзець на дзвюх крэслах, падтрымліваючы ваенныя намаганні Расіі, а таксама спрабуючы наладзіць сяброўскія адносіны з еўрапейскімі саюзнікамі і некаторымі іншымі краінамі.

Ён нагадаў, што Кітай дзеліцца многімі тэхналогіямі, такімі як мікраэлектроніка, якія маюць ключавое значэнне для Расіі ў стварэнні ракет і зброі, якую яна выкарыстоўвае супраць Украіны. І дадаў, што на нейкім этапе прыйдзецца падумаць аб нейкім эканамічным уплыве, калі Кітай не зменіць сваіх паводзін.

«Мэта NATO — не весці вайну, а прадухіліць вайну», — заявіў Столтэнберг.