Народная любоў, або Чаму ўяўленні пра беларускі народ не супадаюць з аб'ектыўнай рэальнасцю?
Пакуль уяўная вайна з NATO была ўяўнай, для асабістай нацыянальнай бяспекі ўлады хапала красаўцаў. Народныя сімпатыі тут былі неабавязковыя. Нашто раптам спатрэбілася ўзаемная народная любоў, разважае аўтар тэлеграм-канала «Лісты да дачкі».
Я табе нядаўна распавядаў, як сёй-той вырашыў пайсці пашукаць агульную мову з народам, таму што яму востра хочацца вялікай і чыстай народнай любові.
Так сакратар Вальфовіч днямі патлумачыў, навошта тое трэба. Ну, таму што гэта сапраўды невідавочна.
А народная любоў патрэбна таму, што, як сказаў сакратар Вальфовіч, згодна з найноўшым навуковым распрацоўкам у галіне палітычных тэорый і практык, ад узроўню народнай любові залежыць узровень іх нацыянальнай бяспекі.
І глядзі, як яно цікава атрымліваецца. Раней іх нацыянальнай бяспецы таксама шмат чаго пагражала. І вайна з NATO ў тэлевізары, і павышаны ўзровень экстрэмізму сярод беларускага народа.
Але нічога. Выдатна іх нацыянальная бяспека абыходзілася без народнай любові. Генацыду беларускага народа для іх нацыянальнай бяспекі цалкам хапала.
Глядзіце таксама
А цяпер нацыянальнай бяспецы спатрэбілася народная ўзаемнасць. Так спатрэбілася, што камусьці дзеля гэтай узаемнасці не шкада нават фігурантаў беларускага ўрада.
Як я табе ўжо ў мінулы раз казаў, я думаю, што для гэтага ёсць вельмі важкая прычына. Таму што сёй-той разам з саюзнікам ужо намаляваў карты, з якіх на Беларусь рыхтуецца напад.
Пакуль уяўная вайна з NATO была ўяўнай, яго асабістай нацыянальнай бяспекі хапала красаўцаў. Народныя сімпатыі для асабістай нацыянальнай бяспекі былі неабавязковыя.
Але хаўруснікі сваю гібрыдную вайну супраць NATO ўжо пачалі. Урэшце NATO гэтую гібрыдную вайну заўважыць і адкажа ў асіметрычнай форме. А калі вайна з NATO выйдзе з віртуальнай прасторы беларускага тэлевізара, то красаўцаў для гарантый ужо не хопіць. Ды і не будуць красаўцы нікому нічога гарантаваць у выпадку пагрозы іх асабістай бяспекі. Красаўцы на пагрозы сваёй бяспекі не падпісваліся.
Так што без народных сімпатый тут, вядома, не абысціся. Ці, хоць бы, без паніжанага ўзроўню народных антыпатый.
Глядзіце таксама
Але ведаеш, што я табе скажу? Я думаю, што ў пошуках народнай любові беларускія ўлады знойдуць сабе толькі яшчэ больш народнай непрыязнасці. А ведаеш чаму? Таму што камусьці дастаўся няправільны народ, які не ведае слоў любові.
І сёй-той доўга, вядома,
не вытрымае, каб не выказаць народу ўсё, што ён пра народ думае.
Ды ён ужо не вытрымлівае.
Літаральна ўчора скардзіўся, што беларускі народ не ўмее працаваць так, як працуюць кітайцы. Таму што калі б беларускі народ працаваў як кітайцы, то ён жыў бы «значна багацей». А беларускі народ не ўмее.
А яшчэ, таму што з беларускім народам сёй-той даўно ўжо не знаёмы. Беларускі народ сёй-той бачыць толькі на экране свайго персанальнага тэлевізара, чуе ў пераказах сведак стабільнасці вышэйшага ўзроўню і сустракае ў асобе старанна адабраных прадстаўнікоў. Таму яго ўяўленні пра беларускі народ не супадаюць з аб'ектыўнай рэальнасцю.