«Два састарэлыя саюзнікі пачалі сваю вайну супраць NATO. Альянс пра гэта яшчэ нават не здагадваецца, а яны ўжо ваююць»

«Красаўцы» пастараліся і зрабілі ўсё, каб ніякіх непатрэбных памежных пераходаў не адкрылася, піша ТГ-канал «Лісты да дачкі». Ведучы такую гібрыдную вайну, яны наўрад ці гатовыя да таго, што адказ можа «прыляцець» — і зусім нават не з тэлевізара.

Учора міністэрства нібыта замежных спраў выказала спачуванні ў сувязі са смерцю польскага салдата, забітага мігрантам на мяжы. Зрабіла як умее нібыта міністэрства. Сказала, што Польшча ва ўсім вінаватая. А ўсё чаму? Таму што Польшча не хоча рабіць «узаемапаважлівы дыялог» і крокі насустрач.

І я нават не буду цяпер вам гаварыць бескарысныя словы пра цынізм і паняцце пра прыстойнасць. Я толькі вам нагадаю, што на салдата напалі літаральна адразу пасля таго як, польскі прэм'ер Туск сказаў, што думае пра адкрыццё яшчэ аднаго памежнага пераходу. Вось варта было польскім уладам задумацца пра крок насустрач, як беларускія ўлады пачалі закідваць мяжу мігрантамі з падвоенай стараннасцю.

Памёр польскі вайсковец, якога параніў мігрант на мяжы з Беларуссю (абноўлена)

Паводле ацэнкі польскіх памежнікаў, нападаў на мяжу стала ў паўтара раза больш, чым раней. І загінулы салдат быў жа не адзіным. За гэтыя дні мігранты паранілі некалькі польскіх салдатаў і памежнікаў. У панядзелак з гэтай нагоды збярэцца пасяджэнне польскай Рады бяспекі. І, як я разумею, дазвол польскім вайскоўцам страляць на паражэнне — гэта цяпер ужо вельмі нават верагодны варыянт.

Карацей, калі беларускія ўлады хацелі сапсаваць адносіны з Польшчай, то ў іх гэта атрымалася. Хоць, здавалася б, гэтыя адносіны знаходзяцца ў такім стане, што псаваць там ужо не было чаго. Але калі хто стараецца і шукае, то ён абавязкова знойдзе.

І вось я думаю, што беларускія ўлады якраз стараліся. Што мігрантаў стала больш, мігранты сталі агрэсіўней — не таму што «красаўцы» не ўмеюць кантраляваць сваіх мігрантаў. А наадварот. Таму што яны сваіх мігрантаў якраз вельмі добра кантралююць.

Гэта раней беларускія ўлады былі б не супраць, калі б Польшча адкрыла які-небудзь памежны пераход. А цяпер беларускім уладам адкрытыя памежныя пераходы ўжо больш не патрэбныя. Таму што цяпер сёй-той думае ўжо не пра тое, як зарабіць сабе капейчыну. У яго цяпер думкі больш глабальнага геастратэгічнага маштабу.

Таму што два састарэлыя саюзнікі пачалі сваю вайну супраць NATO. Вось NATO пра гэта яшчэ, можа, нават не здагадваецца, а яны ўжо ваююць. Толькі пакуль трошкі ў такой гібрыднай форме.

«Лукашэнка ведае сваё месца і робіць тое, што яму загадаў Пуцін»

І не мігрантамі адзінымі гэтая вайна вядзецца. У Польшчы ўжо арыштавалі больш за дзясятак чалавек, якія рыхтавалі падпалы і дыверсіі па заданні беларускіх і расійскіх уладаў.

Вядома, адкрыццё памежнага перахода было б у гэтай сітуацыі зусім недарэчным. Калі б Польшча адкрыла памежны пераход, то было б трошкі складаней знайсці месца на мапе, адкуль яны рыхтавалі на нас напад. Таму пастараліся мігрантамі, каб ніякага памежнага пераходу нідзе неспадзявана не адкрылася.

Толькі вось нават гібрыдная вайна супраць NATO патрабуе прынцыпова іншых навыкаў, чым вайна супраць NATO ў тэлевізары. Таму што калі ты гібрыдна ваюеш, то табе ж могуць гібрыдна і адказаць. І не «экстрэмісцкім» лайкам. А чым-небудзь больш адчувальным. Супраць чаго «красаўцы» не падпісваліся.