Шпіёнскі скандал: выведка Бельгіі абвінаваціла сталага прадстаўніка Расіі пры ЕС
Пра падазрэнне ў шпіянажы прадстаўніка Расіі пры ЕС паведаміў Spiegel. МЗС РФ прапанаваў выданню раскрыць усіх агентаў нямецкіх спецслужбаў.
Артыкул у Der Spiegel
Служба дзяржаўнай бяспекі Бельгіі падазрае, што выканаўца абавязкаў сталага прадстаўніка Расіі пры Еўрасаюзе Кірыл Логвінаў працуе на Службу замежнай выведкі РФ, піша «Медуза».
Пра гэта гаворыцца ў расследаванні, якое выпусцілі De Tjid і Der Spiegel у партнёрстве з іншымі СМІ. Журналісты спасылаюцца на крыніцы ў розных краінах.
Бельгійская выведка падазрае 48-гадовага Логвінава і іншых супрацоўнікаў прадстаўніцтва РФ у Еўрасаюзе ў тым, што яны займаюцца «сакрэтнай дзейнасцю супраць еўрапейскіх інтарэсаў».
Логвінава пачалі падазраваць у працы на расійскія спецслужбы ў 2022 годзе, калі ён займаў пасаду намесніка пастаяннага прадстаўніка РФ пры ЕС.
Выведка Бельгіі настойвала, што Логвінава трэба выслаць з краіны, але супраць выступіла Еўрапейская знешнепалітычная служба — як мяркуецца, праз боязь, што ў яе прадстаўнікоў у Расіі могуць узнікнуць цяжкасці. Па выразе аўтараў расследавання, ЕС трывае шпіянаж дзеля «дыпламатычнай далікатнасці».
Глядзіце таксама
Афіцыйны прадстаўнік МЗС Расіі Марыя Захарава ў адказ на публікацыю Spiegel пра Кірыла Логвінава рэкамендавала выданню «апублікаваць спіс агентаў нямецкіх спецслужбаў ва ўсім свеце». «Як гэта зрабіць? Запытаць урад ФРГ і правесці ўласнае расследаванне. Калі расейскія дыпламаты будуць падвяргацца цкаванню ў заходніх СМІ, заходнія дыпламаты адчуюць на сабе, як гэта», — заявіла Захарава ў гутарцы з ТАСС.
Прадстаўнік службы дзяржбяспекі Бельгіі адмовіўся ад каментароў. Кірыл Логвінаў і пастаяннае прадстаўніцтва Расіі ў ЕС не адказалі на запыт журналістаў.
Глядзіце таксама
У Еўрапейскай замежнапалітычнай службе заявілі, што не каментуюць інфармацыю аб канкрэтных дыпламатах, але супрацоўнічаюць са спецслужбамі і сочаць за пагрозамі шпіянажу.
Пасля пачатку поўнамаштабнага ўварвання войскаў РФ ва Украіну краіны Еўрасаюза выслалі сотні расійскіх дыпламатаў. У Бруселі персонамі нон грата абвясцілі 19 супрацоўнікаў сталага прадстаўніцтва РФ у ЕС, а таксама 21 супрацоўніка амбасады РФ у Бруселі. Германія выслала 40 супрацоўнікаў расійскіх дыпламатычных місій.