ААН заклікае расследаваць прымяненне сілы дзяржавай да дэманстрантаў у Казахстане

Эксперты ААН па правах чалавека 11 студзеня асудзілі «неабмежаванае прымяненне сілы супраць пратэстоўцаў» у Казахстане, у тым ліку «прымяненне смяротнай зброі», і заклікалі забяспечыць незалежнае расследаванне такіх выпадкаў, паведамляе «Азаттык».
Бронемашыны на плошчы ў Алматы. 5 студзеня 2022 года

Бронемашыны на плошчы ў Алматы. 5 студзеня 2022 года

Спецдакладчык па пытаннях заахвочвання і абароны правоў чалавека ва ўмовах барацьбы з тэрарызмам Фіануала Ні Аолэйн адзначыла ў сваёй заяве, што шырокае прымяненне тэрміна «тэрарысты» супраць дэманстрантаў, грамадзянскіх актывістаў, праваабаронцаў, журналістаў і прадстаўнікоў палітычных партый «можа пераследаваць мэту пасеяць у грамадстве страх» і «выклікае сур'ёзную занепакоенасць».

Іншыя эксперты ААН па правах чалавека таксама выказалі занепакоенасць тым, што прэзідэнт Казахстана Касым-Жамарт Такаеў загадаў сілавікам «страляць на паражэнне» па дэманстрантах, якіх ён назваў «бандытамі і тэрарыстамі».

Эксперты ААН па правах чалавека заклікалі забяспечыць «незалежнае і заснаванае на правах чалавека расследаванне выпадкаў прымянення дзяржавай сілы супраць пратэстоўцаў» у Казахстане.

Эксперты ААН нагадалі, што прымяненне смяротнай зброі дапушчальнае толькі ў выпадку самаабароны і тады, калі вычарпаныя ўсе іншыя метады. Гэты прынцып, як адзначылі эксперты ААН, у роўнай меры датычыцца і замежных сілаў, што дзейнічаюць на тэрыторыі Казахстана са згоды ўладаў гэтай краіны. Гаворка ідзе пра войскі краін Арганізацыі Дамовы аб калектыўнай бяспецы (АДКБ), місія якой у краіне, па словах Такаева, завяршылася.

Паводле звестак МУС Казахстана на 11 студзеня, па ўсёй краіне былі затрыманыя амаль 10 тысяч чалавек. Прэс-сакратар Упраўлення вярхоўнага камісара ААН па правах чалавека Элізабэт Тросел адзначыла, што, згодна з міжнародным правам, людзі не павінны знаходзіцца пад вартай выключна за рэалізацыю свайго права на ўдзел у мірных акцыях пратэсту і выказванне сваёй пазіцыі. «Тыя, хто быў затрыманы, павінны быць неадкладна выпушчаныя на волю», — сказала Тросел.


Хочаце ведаць больш? Сачыце за нашымі публікацыямі ў Telegram і Facebook!

  • Апошняе на сайце
,

Больш цікавага на «Новым Часе»: