У Літве адбываецца другі тур выбараў прэзідэнта

У Літве 26 траўня праходзяць прэзідэнцкія выбары. На пасаду кіраўніка дзяржавы прэтэндуюць 44-гадовая экс-міністр фінансаў Інгрыда Шыманіце 54-гадовы эканаміст Гітанас Наўседа.

Першы тур прэзідэнцкіх выбараў прайшоў у Літве 12 траўня. У ім удзельнічалі 9 кандыдатаў. Шыманіцэ ў першым туры набрала 31,31% галасоў, а Наўседа — 30,94%. Шыманіце падтрымлівае тая ж партыя, што вылучала Далю Грыбаўскайтэ дзесяць гадоў таму — «Саюз бацькаўшчыны — Хрысціянскія дэмакраты». Наўседа — беспартыйны кандыдат. Ён уваходзіў у кіраўніцтва Банка Літвы і працаваў у бізнэсе.
У папярэднім галасаванні прынялі ўдзел 10,74% выбаршчыкаў.
Другі тэрмін паўнамоцтваў цяперашняга прэзідэнта Літвы Далі Грыбаўскайтэ заканчваецца ў ліпені.

Што кандыдаты ў прэзідэнты гавораць аб супрацоўніцтве з Беларуссю

Перад першым турам выбараў тэлеканалу «Белсат» ўдалося задаць абодвум будучым фіналістам гонкі пытанні аб адносінах з Беларуссю. Рыторыка Наўседы выглядае мякчэй.
Ён заявіў, што тэма БелАЭС не павінна поўнасцю зацямніць адносіны паміж Вільняй і Мінскам, таму што Літве важна захаваць Беларусь незалежнай ад Расіі.
— Перабудова энергетычнай або вытворчай сістэмы Беларусі, якая будзе карыстацца электрычнасцю з БелАЭС, павысіць узровень незалежнасці Беларусі ад Расіі. І гэта вельмі важна, каб мы маглі рэальна казаць пра незалежнасць беларускай эканомікі і незалежнасць яе энергетычнай сістэмы.
Інгрыда Шыманіце падтрымала сённяшнюю пазіцыю Вільні, назваўшы яе «адзінай пазіцыяй, якую мы можам мець у Літве».
— Беларускія ўлады парушылі шэраг міжнародных законаў пачынаючы ад выбару пляцоўкі. Міжнародныя інстытуты прызналі, што былі здзейснены парушэнні міжнародных канвенцый. Так што я не ведаю, як у гэтай краіне можна мець нейкую іншую пазіцыю па гэтай справе.
Палітык таксама заявіла, што ёсць умовы для таго, каб Літва і Беларусь былі добрымі суседзямі:
— Гэта беларускі падыход да дэмакратычных каштоўнасцяў, тое, чаго мы тут, у Еўрасаюзе, не прымаем. Напрыклад, тое, што адбылося нядаўна ў Курапатах, — гэта вандалізм! Кіраваны дзяржавай вандалізм! Яшчэ адна ўмова — гэта пытанне вельмі шчыльнай ваеннай кааперацыі паміж Расіяй і Беларуссю.
Абодва кандыдаты не выключаюць кантактаў з Мінскам на вышэйшым узроўні, але Наўседа зрабіў больш разгорнутую заяву на гэты конт:
— Мы б хацелі вельмі дружалюбных адносін, заснаваных на эканамічным развіцці, заснаваных на лагістыцы, заснаваных на транспартнай інфраструктуры. Я лічу, што ёсць шмат пытанняў, якія мы маглі б абмеркаваць на розным узроўні — міністэрстваў, міністраў і, магчыма, не магу гэта выключаць, магчыма, і на вышэйшым палітычным узроўні.
Шыманіце сказала толькі, што не супраць «павітацца» з Лукашэнкам, калі ён прыедзе на цырымонію перапахавання астанкаў Кастуся Каліноўскага.
tut.by