«Вінаваты Дзярждэп». У РПЦ пракаментавалі адлучэнне УПЦ ад Масквы

У РПЦ адрэагавалі на рашэнне Сабора Украінскай праваслаўнай царквы Маскоўскага патрыярхата аб поўнай незалежнасці. Першы намеснік старшыні Сінадальнага аддзела Маскоўскага патрыярхата па ўзаемаадносінах Царквы з грамадствам і СМІ Аляксандр Шчыпкоў лічыць, што на такі крок УПЦ падштурхнуў Дзярждэпартамент ЗША. І што рашэнне Сабора — ні што іншае, як раскол і аб'яўленне аўтакефаліі.

«УПЦ МП ухілілася ў раскол. Усе кананічныя нормы парушаны. Аб'ява поўнай самастойнасці — гэта абвяшчэнне аўтакефаліі. Мітрапаліт Ануфрый не выкарыстоўвае тэрмін «аўтакефалія». Але абвяшчае пра «аднаўленне міраварэння ва Украінскай Праваслаўнай Царкве». Міраварэнне — галоўная прыкмета аўтакефальнасці, — упэўнены Шчыпкоў. — 27 траўня 2022 года Украінская праваслаўная царква знікла. ​​Заказчык — Дзярждэпартамент ЗША».

Кіраўнік аддзела знешніх царкоўных сувязей Маскоўскага патрыярхата мітрапаліт Валакаламскі Іларыён у сваю чаргу запэўнівае, што РПЦ працягвае ўмацоўваць і захоўваць адзінства з УПЦ. Аднак, паводле яго слоў, УПЦ «не залежыць ад Масквы ні адміністрацыйна, ні фінансава, ні ад якіх-небудзь яшчэ адносінаў».

«Учорашнімі рашэннямі УПЦ яшчэ раз засведчыла, што яна з'яўляецца цалкам самакіравальнай, што яе царкоўны цэнтр знаходзіцца не ў Маскве, а ў Кіеве», — дзеліцца меркаваннем іерарх.

Кіраўнік Сінадальнага аддзела па ўзаемаадносінах Царквы з грамадствам і СМІ Маскоўскага патрыярхата Уладзімір Легойда запэўнівае, што РПЦ не атрымлівала нейкіх паведамленняў ад УПЦ і працягвае маліцца аб захаванні адзінства і аб спыненні кровапраліцця.

«Украінская праваслаўная царква знаходзіцца ў вельмі цяжкім становішчы і адчувае ціск з розных бакоў: з боку ўладаў, раскольнікаў, нацыяналістычна настроеных прадстаўнікоў пэўнай часткі грамадскасці, з боку сродкаў масавай інфармацыі», — гаворыць Легойда.

Ён лічыць, што ў «у сітуацыі, калі знешнія сілы спрабуюць разбурыць адзінства Рускай праваслаўнай царквы», каментаваць рашэнні, якія прымаюцца «ў самакіравальнай Украінскай праваслаўнай царкве ў вышэйшай ступені безадказна».

Сабор УПЦ МП, на якім абмяркоўваліся пытанні царкоўнага жыцця, якія ўзніклі з пачаткам вайны ва Украіне, заявіў, што асуджае вайну як парушэнне Божай запаведзі «Не забі!». УПЦ звярнулася да ўладаў Украіны і Расіі з просьбай працягваць перамовы.

Таксама Сабор УПЦ выказаў нязгоду з пазіцыяй Патрыярха Маскоўскага і ўсяе Русі Кірыла наконт вайны ва Украіне. У Статут УПЦ былі прынятыя праўкі, якія сведчаць аб яе поўнай самастойнасці і незалежнасці.

Паводле «Еўрарадыё».