Аляксей Арастовіч: Лукашэнка стварае «народнае апалчэнне» супраць Расіі, на тое ёсць прамая логіка

Аляксандр Лукашэнка стварае «народнае апалчэнне» Беларусі з-за Расійскай Федэрацыі. Украіна дакладна не будзе ўрывацца на беларускую тэрыторыю. Пра гэта заявіў дарадца кіраўніка Офіса прэзідэнта Аляксей Арастовіч падчас размовы з юрыстам Маркам Фейгіным, піша unian.net.

«А супраць каго ён стварае гэтае «народнае апалчэнне»? Вядома, супраць Расіі стварае. І на тое ёсць прамая логіка таго, што адбываецца. Мы дакладна не збіраемся ўрывацца ў Беларусь ні пры якіх абставінах. Якая ж сіла можа прымусіць Лукашэнку, які перад гэтым лупіў народ дубінкамі, выдаваць гэтаму народу зброю? Нейкая вельмі сур'ёзная пагроза», — заявіў дарадца кіраўніка ОПУ.

«Гэта нейкая вельмі сур'ёзная прычына павінна была паставіць наогул гэтае пытанне. У нас ёсць інфармацыя, якая прыйшла да нас з Еўропы, з адкрытых крыніц, што беларускі бок вельмі моцна актывізаваў кантакты з Захадам. Агульная канва: вы ж не дасцё нам згінуць пад пуцінскім рэжымам?» — падсумаваў палітык.

Нагадаем, нядаўна Аляксандр Лукашэнка даручыў стварыць «народнае апалчэнне» Беларусі. У Мінску хочуць паказаць «ворагам», «што не трэба сунуцца».