«Білі прыкладам, душылі пятлёю, прымянялі абцугі». Ва Украіне расказалі пра катаванні азоўцаў у палоне РФ

Замежжа

Украінскі амбудсмен Людміла Дзянісава распавяла пра здзекі расійцаў з украінскіх ваеннапалонных, у тым ліку жанчын. Пра гэта распавялі вызваленыя з палону абаронцы, якія цяпер знаходзяцца на лячэнні. Большасць з іх былі ўзятыя ў палон пад Марыупалем, піша unian.net.

a00775c4_b425fc5170a0cc8b0d54bb1660587f5f.jpg

Паводле словаў Людмілы Дзянісавай, з асаблівай жорсткасцю катаванні ўжываліся да афіцэрскаму складу і байцоў палка «Азоў». Падчас допытаў украінскіх ваеннапалонных ставілі на калені, білі прыкладам ад аўтамата па пальцах ног і адкрытых ранах, ужывалі абцугі, закідвалі пятлю на шыю і душылі. Акрамя таго, катавалі электратокам, збівалі дубінкамі і нагамі.

Украінскія вайскоўцы паведамілі, што расійцы ім уводзілі невядомыя прэпараты на літару «М», пасля чаго яны гублялі прытомнасць і гублялі памяць.

Акупанты прымушалі ўкраінскіх жаўнераў вучыць верш «Простите нас, родные россияне», гімн РФ, гісторыю стварэння герба і сцяга РФ, інакш ужывалі катаванні.

Украінскія жанчыны-ваеннапалонныя, якія ўтрымліваліся ў Данецкім СІЗА, распавялі, што ў камерах, разлічаных на 2-3 чалавекі, іх знаходзілася не менш 17-20. Замест санвузла — вядро. Жанчыны былі пазбаўленыя сродкаў гігіены і магчымасці памыцца. На іх аказваўся псіхалагічны ціск — на іх вачах жорстка збівалі ўкраінскіх палонных мужчын. Таксама палонніц прымушалі да палавых актаў.

Украінцам не давалі ваду, усяго 1,5 літра на 30-40 чалавек, абмяжоўвалі ў харчаванні. Дзённы рацыён складаўся з кавалка хлеба і сала. Часам, даючы мяса, рашысты здзекаваліся і казалі, што яно «чалавечае».

Нагадаем, што падчас штурму Марыупаля войскамі РФ абаронцы горада занялі сутарэнні металургічнага камбіната «Азоўсталь». Калі ў іх амаль скончыліся харчаванне і боепрыпасы, а таксама медыкаменты для лекавання параненых, яны з дазволу вышэйшага кіраўніцтва Украіны здаліся ў палон. Украінскі бок спадзяецца, што палонных абаронцаў Марыупаля (акрамя азоўцаў, у іх ліку таксама марпехі, памежнікі і іншыя вайскоўцы) атрымаецца абмяняць на паланёных расійскіх жаўнераў.