«Экспартны цуд» скончыўся? Беларускія флагманы паклалі на склады 5,5 млрд BYN

Валаўтваральныя прадпрыемствы прамысловасці паведамілі аб памерах складскіх запасаў. У параўнанні з мінулымі перыядамі зафіксаваны рост паказчыкаў.

Да 1 снежня 2021 года складскія запасы ў флагманаў прамысловасці склалі 5,469 млрд BYN. Такія аператыўныя дадзеныя па Белстаце. Адносна аналагічнай даты ў 2020-м грашовая ацэнка запасаў вырасла — тады на складах ляжала прадукцыя на 5,282 млрд BYN, пішуць banki24.by.

У параўнанні з сярэднямесячным аб'ёмам вытворчасці складскія запасы на справаздачную дату склалі 53,6%. Месяцам раней (на 1 лістапада) адносны ўзровень запасаў гатовай прадукцыі быў ніжэйшы (53,1%), 2 месяцамі раней — яшчэ менш (51,9%).

Уздым адноснага паказчыка па складскіх запасах звязаны з тармажэннем у прамысловасці. За лістапад валавая дададзеная вартасць у апрацоўчых галінах вырасла толькі на 2%. Прамысловая вытворчасць па выніках лістапада паднялася да 2020 года ўсяго на 2,7%. Пры гэтым апрацоўчыя галіны прамысловасці плюсанулі толькі на 1,3%.

Сярод адкрытых пазіцый у лістападзе скарацілі выпуск да ўзроўню 2020 года легпрам (на 0,5%), металургі (на 0,1%), вытворцы транспартных сродкаў і абсталявання (на 24,6%). У рэгіянальным разрэзе за лістапад 2021-га знізілася прамысловая вытворчасць у Брэсцкай (на 2,1% да 2020 года), Віцебскай (на 3,4%), Гомельскай (на 1,4%) і Магілёўскай (на 1,5%) абласцях.

У першай палове 2021 года справы ў беларускай прамысловасці ішлі істотна лепш. За 1 квартал рост прамысловай вытворчасці склаў 9,2%, за 2 квартал — 11,6%. Але ўжо ў 3 квартале тэмпы росту затармазіліся да 2,9%: эфект нізкай базы мінулага года вычарпалі — індэксы выпуску флагманаў упалі.

У снежні ўступілі ў сілу санкцыі ЗША ў дачыненні да «Беларуськалія», а ў красавіку ўступяць у сілу санкцыі па Беларускай калійнай кампаніі і яе «дачцы» ва Украіне. Увесну-улетку 2022 года гэта можа ўнесці негатыўны ўклад у дынаміку выпуску і павысіць адносны ўзровень складскіх запасаў.

Больш за 46% складскіх запасаў краіны сканцэнтравалі Мінск і Мінская вобласць — 1,106 і 1,429 млрд BYN адпаведна. Акрамя таго, на гэтых тэрыторыях да 1 снежня назіраўся самы высокі адносны ўзровень запасаў — 79,2% і 74,3% ад сярэднямесячнага выпуску.

Сярод галін прамысловасці найбуйнейшыя па грошах запасы гатовай прадукцыі ляжалі на складах харчпрама (1,149 млрд BYN), машынабудавання (751,4 млн BYN) і легпрама (668,2 млн BYN).