Цяпер афіцыйна: ЗША і Канада абвясцілі новыя санкцыі супраць рэжыму Лукашэнкі

У гадавіну пачатку пратэстаў у Беларусі, 9 жніўня, прэзідэнт ЗША Джозэф Байдэн абвясціў новыя санкцыі ў дачыненні да рэжыму Лукашэнкі. 

«Шкодная дзейнасць і даўнія злоўжыванні беларускага рэжыму, накіраваныя на падаўленне дэмакратыі і ажыццяўленне правоў чалавека і асноўных свабод у Беларусі, — у тым ліку незаконная і рэпрэсіўная дзейнасць, звязаная з фальсіфікацыяй прэзідэнцкіх выбараў у Беларусі 9 жніўня 2020 года і іх наступствамі — такімі, як ліквідацыя палітычнай апазіцыі і арганізацый грамадзянскай супольнасці, а таксама парушэнне рэжыму і пагроза міжнародным грамадзянскім паветраным перавозкам — уяўляюць сабой незвычайную і надзвычайную пагрозу нацыянальнай бяспецы і знешняй палітыцы Злучаных Штатаў», — гаворыцца ў паведамленні Белага дома.
Санкцыі ўключаюць у сябе блакаванне актываў афіцыйных асоб і замарожваюць усе доларавыя актывы дзяржустаноў Беларусі. Яны таксама закрануць абаронны сектар, энергетыку і транспарт, а таксама Нацыянальны алімпійскі камітэт Беларусі, які ўзначальвае Віктар Лукашэнка.

Поўны спіс (https://home.treasury.gov/policy-issues/financial-sanctions/recent-actions/20210809) фіз- і юрыдычных асоб, якія сёння трапілі пад санкцыі ЗША. Усяго санкцыі закранулі 23 фізічныя асобы і 21 юрыдычную асобу.
Хто трапіў пад санкцыі ЗША:
Аляксей Алексін, Аляксей Аўраменка, Сяргей Аземша, Андрэй Бунакоў, Канстанцін Бычак, Леанід Чура, Генадзь Давыдзька, Глеб Дрыль, Алег Гайдукевіч, Дзмітрый Гара, Ігар Кенюх, Вячаслаў Харанека, Уладзімір Лапір, Ігар Ляшэнка, Андрэй Рыбакоў, Дзмітрый Шакута, Алег Шандаровіч, Яўген Шапецька, Дар'я Шманай, Арцём Сікорскі, Мікалай Варабей, Анатоль Васільеў і Карыч Небойша.
Юрыдычныя асобы, якія патрапілі пад санкцыі ЗША:
«Белнафтагаз», «Беларуськалій», «Белказтранс», «Белказтранс Украіна», «Абсалютбанк», «Энерга-Ойл», «Новая нафтавая кампанія», «Dana Holdings», АУС Гомельскага рэгіянальнага выканаўчага камітэта, «Dana Astra», Нафтабумны завод, Следчы камітэт, «Bremino Group», «Белінтэст-Робаба», «Zomex Investment», «Інтэр табака», «Новая нафтавая кампанія "Усход"», НАК РБ, «Інтэрсервіс», тытунёвая фабрыка «Нёман», «Спартыўны клуб "Шок"».
У адказ на «грубыя і сістэматычныя парушэнні правоў чалавека ў Беларусі» сектаральныя санкцыі супраць улад Беларусі ўвяла і Канада, паведамляе прэс-служба Міністэрства міжнародных спраў Канады.
Абмежавальныя меры датычацца ключавых сектараў беларускай эканомікі — калійных угнаенняў і нафтапрадуктаў. Канада таксама зводзіць да мінімуму доступ беларускіх дзяржарганізацый да міжнародных фінансаў. Гэта значыць, ім забараняецца размяшчаць каштоўныя паперы і карыстацца іншымі сродкамі фінансавага рынку, закрываецца доступ да даўгавога фінансавання, страхавання і перастрахавання. Гэтыя меры прымаюцца ў знак салідарнасці з дзеяннямі міжнародных партнёраў, гаворыцца ў прэс-рэлізе ведамства.
Раней пра новыя санкцыі абвясціла Вялікабрытанія.