ІП прымушаюць не закрывацца і пагражаюць штрафамі, але і працаваць бізнес баіцца
У Гомелі з ІП сустрэлася мясцовая адміністрацыя і прымушала выйсці на працу. Але прадпрымальнікі не разумеюць, як правільна аформіць тавар, і баяцца праверак і яшчэ большых штрафаў, бо многія выплаціць іх не здольныя.
Частку гомельскіх ІП прымусілі працаваць пад пагрозай штрафаў. Пра гэта блогеру Матольку распавялі крыніцы. «Хто сёння не працаваў — патрапіць пад адміністрацыйны штраф. Калі толькі не было ўважлівай прычыны і не паведамілі за 5 дзён пра тое, што сёння працаваць не будуць», піша «Еўр*радыё».
Нагадаем, сёння, 27 кастрычніка, у многіх гарадах Беларусі індывідуальныя прадпрымальнікі вырашылі не адкрываць свае павільёны. Яны заявілі, што не будуць працаваць, пакуль не атрымаюць зразумелага тлумачэння наконт цэн.
У Гомелі, напрыклад, з ІП сустрэлася мясцовая адміністрацыя.
«Іпэшнікі не ведаюць, як працаваць з цяперашнімі пастановамі, і невядома, ці будуць многія працаваць увогуле. Сядзім і чакаем. Прадпрымальнікі, іх сем'і і работнікі на грані беспрацоўя. Гэта сотні тысяч чалавек ва ўмовах ахавай эканомікі і коштаў кратных двум і больш у параўнанні з лютым», — кажуць прадпрымальнікі.
27 кастрычніка раніцай баранавіцкая газета «Наш край» напісала, што прадпрымальнікі чакаюць дакладнага тлумачэння, як далей выкарыстоўваць механізм цэнаўтварэння. Да таго часу аднаўляць працу не хочуць. Гэтую акцыю ўжо пачынаюць называць страйкам.
Прадпрымальніца аднаго з абласных цэнтраў распавяла, што пасля выхаду новай пастановы аб рэгуляванні коштаў на рынках і ў ГЦ горада падалі дакументы на скасаванне дамовы арэнды памяшкання ад 5 да 10% прадпрымальнікаў, якія гандлююць нехарчовымі таварамі. Відаць, менавіта столькі ІП у горадзе сёння не выйшла на працу, адзначае «Люстэрка»:
— У нас цяпер — як у 2014-2015 гадах, калі масава закрываліся рынкі. Цяпер ІП з кожным днём становіцца менш. Колькі іх цалкам закрылася, даведацца немагчыма. Сёння прадпрымальнікі сыходзяць у «адпачынак», але не адпачываць, а для таго, каб перачакаць у надзеі, што ўлады іх пачуюць і ўнясуць змены ў новы дакумент, пасля чаго можна будзе зноў працаваць.
Прадпрымальніца кажа, што цяпер больш за ўсё яе і калег палохае тое, што яны павінны аформіць рэестры на тавар і пераацаніць яго рэшткі за вельмі кароткі тэрмін. «Але ў дробнага бізнесу ніколі не было такіх дакументаў, яны не фарміравалі цэны як юрыдычныя асобы, не рабілі калькуляцыю. Простаму чалавеку без бухгалтарскай адукацыі (а большасць ІП яе не маюць) зрабіць гэта складана… Да таго ж, як разлічыць цэны, калі дакументаў на тавар з указаннем кошту не было? Як разлічыць цану тавару, які ляжыць даўно і завезены да дэнамінацыі? Як вызначыць артыкул?» — тлумачыць суразмоўца.
Прадпрымальнікі цяпер вельмі баяцца зрабіць няправільны крок, бо за парушэнне ім пагражае штраф да 40 базавых велічынь — 1280 рублёў. Для многіх з іх гэта велізарная сума, якую яны выплаціць не ў стане.