8 абяцанняў, якія летась не выканаў Лукашэнка

Прыгожыя словы, якія кардынальна разышліся са справай, заўважыла «Салідарнасць».

Праект новай Канстытуцыі «усенародна» абмяркуюць «на працягу года»

У лютым 2021-га Аляксандр Лукашэнка паабяцаў: «На працягу гэтага года праект Канстытуцыі будзе гатовы, і ён будзе на працягу года абмеркаваны ўсенародна».

Па факце публікацыю праекта новай Канстытуцыі пераносілі некалькі разоў, а апублікавалі — за некалькі дзён да Новага года. Да гэтага моманту ўсякія ілюзіі аб «ўсенародным абмеркаванні» ўжо развеяліся. З улікам святочных дзён у пачатку студзеня рэальнае сур'ёзнае абмеркаванне праекта выглядае нерэальным — рэферэндум пройдзе ўжо ў лютым.

Мяняць Канстытуцыю будуць «не пад Лукашэнку»

Нягледзячы на абяцанне кіраўніка, эксперты, вывучыўшы новы праект Асноўнага закона, сышліся ў меркаванні: Канстытуцыі мяняюць як раз пад Лукашэнку.

Каб у выпадку, калі яму ўсё ж давядзецца з часам сысці з пасады прэзідэнта, ён змог утрымліваць уладу ўжо з пасады старшыні Усебеларускага народнага сходу.

Да канца года ў Беларусі вакцынуюць ад каронавіруса 60% насельніцтва

Увесну Лукашэнка запэўніваў: «Мы дамаўляліся, што ў будучым годзе ўжо атрымаем уласную вакцыну. А да гэтага часу мы правакцынуем практычна ўсё сваё насельніцтва — 60% на першым этапе. Трэба — дадамо больш».

І вось звесткі Міністэрства аховы здароўя, апублікаваныя 31 снежня: поўным курсам вакцынацыі ў краіне ахоплена 39,8% насельніцтва. Гэта адзін з самых нізкіх паказчыкаў у Еўропе. Шмат у чым такому становішчу спраў спрыяла пазіцыя кіраўніцтва краіны: улады адмовіліся не толькі ад прымусовых мер, але і ад шырокай рэкламнай кампаніі.

Для беларусаў закупяць заходнія вакцыны

Яшчэ адно абяцанне Лукашэнкі, зробленае вясной: «Людзі хочуць атрымаць вакцыну. Яны яе атрымаюць. Хтосьці хоча хутчэй, вакцыну іншых краін, добра, закупім. Хай на платнай аснове».

У гэтых словах чытаўся намёк на прышчэпкі з заходніх дзяржаў. Аднак ужо ў кастрычніку кіраўнік выказаў зусім іншае меркаванне: няма сэнсу завозіць заходнія вакцыны, бо кітайская і расійскія лепшыя.

— Слухайце, у нас у краіне няма замежных вакцын. У нас, акрамя «Спутника» і кітайскай вакцыны, няма іншых. І гэтыя вакцыны не горш. Нам падкідваюць гэтыя «оппы», завезці «Пфайзер», «Джонсан і Джонсан», «Мадэрну» і іншыя. Для чаго? Каб яны маглі прышчапіцца, атрымаць пашпарт і ехаць туды, да сваіх, інструкцыі атрымліваць. Каб выехаць на Захад. Вось для чаго ім трэба, — заявіў Лукашэнка.

Беларусь арганізуе «лепшы» чэмпіянат свету па хакеі, а Мінск стане «сталіцай ЗША»

На 2021 год кіраўнік планаваў грандыёзныя спартыўныя спаборніцтвы. Але з-за гвалту і парушэнняў правоў чалавека з боку ўлады ў Беларусі права на іх правядзенне адабралі.

У 2020-м Лукашэнка заявіў кіраўніку Міжнароднай федэрацыі хакея Рэнэ Фазелу:

— Вы можаце не сумнявацца: мы разам з нашымі суседзямі (Латвіяй) на годным узроўні правядзем гэты чэмпіянат. Гэта будзе адзін з лепшых чэмпіянатаў свету. Я вам цвёрда абяцаю.

Яшчэ раней ён запланаваў, што ў 2021-м у Мінску зноў пройдзе лёгкаатлетычны матч Еўропа — ЗША і запрасіў на яго Дональда Трампа:

— Я абяцаю вам, што праз два гады Мінск стане сталіцай Злучаных Штатаў Амерыкі.

Крым прызнаюць расійскім толькі «пасля алігархаў»

Яшчэ ў жніўні кіраўнік запэўніваў расійскіх журналістаў:

— Калі апошні алігарх у Расіі прызнае Крым і пачне пастаўляць туды прадукцыю, за мной справа не заржавее, хоць мяне многае звязвае. Будапешцкая дэкларацыя... Але я і праз гэта пераступлю.

Але ўжо праз некалькі месяцаў, не чакаючы прызнанняў з боку расійскіх алігархаў, кіраўнік у інтэрв'ю РІА «Новости» сказаў, што лічыць паўвостраў дэ-факта і дэ-юрэ тэрыторыяй РФ.

Праўда, у Крым ён пакуль не даляцеў: украінскія ўлады словы Лукашэнкі сур'ёзна ўспрымаць адмаўляюцца.

Візіт на Далёкі Усход

Восенню 2020-га кіраўнік Беларусі запэўніваў расійскую дэлегацыю:

— Я ўжо дзецям паабяцаў, што ў наступным годзе выберу час і абавязкова. Возера Байкал, Алтай, Прымор'е, Сахалін, натуральна, Камчатка — усё ж такі трэба пабываць і паглядзець на гэты цуд прыроды. У мяне такія рамантычныя ўражанні. Я ва Уладзівастоку быў адзін раз. Дык я ўяўляю, што такое Уладзівасток. А вось Далёкі Усход — рамантыка і не болей. Хацелася б паглядзець, што на самой справе ўяўляе сабой гэты край.

Але ў мінулым годзе аб гэтых планах Лукашэнка не ўспомніў.

У Беларусі з'явіцца новы Нацыянальны выставачны цэнтр

Пра гэта казаў Лукашэнка ў 2019 годзе: «Давайце вызначацца і зробім так, каб ужо ў 2021 годзе мы мелі падобны цэнтр».

За мінулы год яго будаўніцтва так і не пачалі.