Афіцыйна «Пагоня» — не «экстрэмісцкі» сімвал
Але ў краіне, дзе «часам не да законаў» і ў лепшыя часы жыццё, законы і законапрымяняльная практыка — далёка не адно і тое ж.
Гомельскі валанцёр Ілля Міронаў напярэдадні апошняга арышту атрымаў ліст з Міністэрства інфармацыі наконт таго, ці з’яўляецца герб «Пагоня» «экстрэмісцкім», піша выданне «Гомель Штодзень».
Намеснік міністра інфармацыі пералічвае некалькі пунктаў дзеючага заканадаўства і прапаноўвае паглядзець спіс «экстрэмісцкіх матэрыялаў», які выкладаецца ў свабодны доступ на сайце Мінінфармацыі. Паколькі ў апошняй версіі «Спісу» няма беларускага герба, то можна зрабіць выснову, што захоўванне і дэманстрацыя «Пагоні» не з’яўляецца супрацьпраўным дзеяннем, што, аднак, супярэчыць практыцы рэпрэсіўных органаў, якія пераследуюць грамадзян за наяўнасць гістарычных сімвалаў.
«У СМІ часам публікуюцца навіны, калі людзей прыцягваюць да адміністрацыйнай адказнасці за выкарыстанне дзяржаўнага ў 1991-1995 гадах герба «Пагоня». Паколькі вядзенне спісу «экстрэмісцкіх матэрыялаў» ажыццяўляецца Міністэрствам інфармацыі, то я хачу атрымаць адказ менавіта ад гэтай інстанцыі», — каментаваў «Штодню» свой зварот у Мінінфармацыі Ілля.
Згадванне Гомеля ў дакуменце з пячаткай «Пагоня» і подпісам караля Стэфана Баторыя, 1583 г. Фота: Міхаэль Энцін
На дадзены момант бел-чырвона-белы сцяг, за які сілавікі пераследуюць грамадзян, не з’яўляецца афіцыйна забароненай сімволікай. А гербу «Пагоня» ўвогуле ў 2007 годзе рашэннем Савета міністраў Беларусі нададзены статус «нематэрыяльнай гісторыка-культурнай каштоўнасці».
Нагадаем, як пісаў «НЧ», актывіст і валанцёр Ілля Міронаў яшчэ ў лютым 2023 года імкнуўся атрымаць афіцыйны пісьмовы адказ, ці забаронены герб «Пагоня». Пра гэта актывіст спрабаваў даведацца ў Міністэрстве інфармацыі.
Ілля накіраваў у Мінінфарм адпаведны запыт са спасылкамі на дзеючае беларускае заканадаўства. Ён хацеў тлумачэнняў ад чыноўнікаў, ці можна цяпер захоўваць нацыянальную сімволіку дома і выкарыстоўваць у грамадскіх месцах.