Анатоль Лябедзька — пра Ўсебеларускі народны сход: гэта з’езд незарэгістраванай партыі «Ябацька»

11-12 лютага ў Мінску мусіць адбыцца Ўсебелаускі народны сход. Сваім меркаваннем адносна мерапрыемства падзяліўся былы старшыня Аб'яднанай грамадзянскай партыі, вядомы палітык Анатоль Лябедзька.

— Я стаўлюся да Ўсебеларускага народнага сходу як да з’езду незарэгістраванай партыі «Ябацька», як да сходу прыхільнікаў былога прэзідэнта Беларусі, — распавёў Лябедзька «Белсату». — Мяне, як, зрэшты, і мільёнаў беларусаў, катэгарычна не задавальняе, што палітычная сіла, якая ва ўмовах сумленных выбараў балансавала б на мяжы праходжання ў парламент, запускае сваю ліпкую руку ў бюджэт і маю кішэню. Я не жадаю фінансаваць тых, хто завёў краіну ў тупік.

Таксама мяне не задавальняе той факт, што непапулярная палітычная сіла навязвае сваё бачанне праблемы, свае рашэнні мне як грамадзяніну, выбарцу, падаткаплатніку. Наступствы прадказальныя: паглыбленне канфліктаў, крызісу і рост супрацьстаяння.

Што тычыцца Васкрасенскага, ён не мае ніякага дачынення ні да амністыі, ні да дыялогу. У яго іншая місія і прызначэнне. Па-першае, адбельваць улады, ухваляць здраду і іншыя брыдоты гэтага рэжыму. Па-другое, спрабаваць уносіць раскол у стан прыхільнікаў пераменаў.

Няхай тыя, хто спрабуе пранікнуць на Ўсебеларускі народны сход праз галоўны ці чорны ўваход, самі адкажуць сабе на шэраг пытанняў. Што вы жадаеце сказаць сёстрам Груздзевым і Баскаву? У чым вы маеце намер пераканаць Наталлю Эйсмант ці Лідзію Ярмошыну? Якія аргументы ў вас ёсць для Марзалюка або Караева?

Лукашэнка нелегітымны. Гэта зафіксавалі большасць беларусаў і ўвесь цывілізаваны свет. Дык навошта сваім суўдзелам ствараць ілюзію адваротнага?

Давайце ўжываць сілы, рэсурсы і час для рэалізацыі пазітыўных пераменаў. Цяпер трэба засяродзіцца на рэалізацыі плану, які забяспечыць вызваленне палітвязняў і затрыманых, транзіт улады, а таксама правядзенне сумленных выбараў і канстытуцыйнай рэформы. Гэта прыярытэт.