Беларускія арганізацыі дапамогі рэпрэсаваным стварылі «Службу хуткай гуманітарнай дапамогі»
BYSOL, BY_help, Dissidentby і фонд «Краіна для жыцця» стварылі службу хуткай гуманітарнай дапамогі, паведаміў на першым беларускім бізнес-форуме ў Вашынгтоне сузаснавальнік BY_help і BYSOL Андрэй Стрыжак.
«Нашыя арганізацыі паўсталі ў розныя часы і ў розных умовах, але гэта не замінае нам мець агульную мэту — падтрымка пацярпелых ад рэпрэсій і салідарнасць з імі. Аб’яднанне ў «Службу хуткай гуманітарнай дапамогі» – беспрэцэдэнтная каардынацыя высілкаў, якой раней ніколі не было», — зазначыў ён.
«Выступаючы разам, мы прадстаўляем інтарэсы беларускай гуманітарнай супольнасці перад партнёрамі і знешнімі гульцамі. Дзякуючы шчыльнай каардынацыі мы аптымізуем падтрымку ва ўмовах абмежаванасці фінансаў. Мы даводзім, што ў стане дамаўляцца, каб дасягнуць агульнай мэты», — сказаў Стрыжак.
Ён дадаў, што Служба адкрытая для супрацы з іншымі структурамі грамадзянскай супольнасці, што займаюцца дапамогай рэпрэсаваным.
Па стане на 4 сакавіка 1407 чалавек прызнаныя ў Беларусі палітвязнямі. Гэтая колькасць можа быць значна большай, бо не пра ўсе факты палітычнага пераследу вядома праваабаронцам.
Глядзіце таксама
