Гомельскаму журналісту і краязнаўцу Яўгену Меркісу прысудзілі чатыры гады калоніі

30 траўня Гомельскі абласны суд агучыў прысуд журналісту, гісторыку і краязнаўцу Яўгену Меркісу — чатыры гады пазбаўлення волі ў калоніі агульнага рэжыму. Суддзя Аляксей Хлышчанкоў прызнаў Меркіса вінаватым на падставе ч. 1 і ч. 2 артыкула 361-4 («Садзейнічанне экстрэмісцкай дзейнасці»), а таксама паводле ч. 3 артыкула 361-1 КК («Удзел у экстрэмісцкім фармаванні») Крымінальнага кодэксу. Пра гэта паведамляе Б*Ж.

Суд праходзіў у закрытым рэжыме. Агулам адбылося сем судовых пасяджэнняў. Закрытым быў і апошні выступ Яўгена Меркіса, які суд заслухаў сёння а 14:15. Невядома, ці прызнаў ён сваю віну. З адваката ўзята падпіска пра невыдаванне сутнасці справы. Адкрытым зрабілі толькі агалошванне выраку. Яўген трымаўся бадзёра, вонкава выглядаў няблага: сваю інтэлегентную бародку ён пагаліў, хутчэй за ўсё на патрабаванне адміністрацыі СІЗА.

Паводле праваабаронцаў і сяброў журналіста, абвінавачанне звязаны хіба што з перадачай фотаінфармацыі інтэрнэт-рэсурсам, аднесеным да «экстрэмісцкіх», наконт знаходжання і перамяшчэння ў рэгіёне расійскай вайсковай тэхнікі.

За кратамі ў следчым ізалятары Яўген Меркіс знаходзіцца ўжо дзявяты месяц. Адзін дзень у СІЗА судом залічаны як паўтара дня ў калоніі. Сілавікі затрымалі яго 13 верасня 2022 года. Тады па месцы жыхарства журналіста правялі ператрус з выняткам носьбітаў інфармацыі. Вобшукі адбыліся ў жыллі яго бацькі, а таксама ў сяброў.

Праваабарончая супольнасць прызнала Яўгена Меркіса палітвязнем.

Сёлета ў сакавіку пасля заканчэння следства Яўген меў кароткатэрміновую сустрэчу з роднымі. На здароўе не скардзіўся, хоць прастудных захворванняў не мінаваў. У снежні правёў чацьвёра сутак у карцары. Больш жорсткімі ўмовамі ўтрымання яго пакаралі за тое, што ён нібыта не пагаліўся.

Яшчэ да арышту Яўген Меркіс пакінуў журналісцкую дзейнасць з прычыны таго, што шэраг незалежных СМІ, з якімі супрацоўнічаў, улады аднеслі да «экстрэмісцкіх фармаванняў».

«Яго пазнавалі на вуліцах». Пяць фактаў пра палітзняволенага журналіста і краязнаўцу Яўгена Меркіса

Паводле адукацыі Меркіс гісторык, скончыў гістфак Белдзяржуніверсітэта. Таму засяродзіўся на краязнаўстве, атрымаў сертыфікат экскурсавода, у тым ліку і для працы з замежнікамі на нямецкай мове. Добра валодае беларускай мовай. Засвоіў і ангельскую. У СІЗА спрабаваў вывучыць яшчэ і французскую, але, наколькі вядома, меў цяжкасці з атрыманнем падручнікаў.

Папулярызаваць гісторыю, мову і культуру роднага краю ды этнаграфічныя вандроўкі Яўген пачаў яшчэ ў студэнцкія гады. Пазней заснаваў сайт «Краязнаўства Гомеля і Гомельшчыны», ачольваў гомельскае моладзевае грамадскае краязнаўчае аб'яднанне «Талака», быў таксама рэгіянальным каардынатарам грамадска-культурнай кампаніі «Будзьма!».

Калі ў Гомелі ды іншых гарадах Беларусі ў 2017 годзе праходзілі пратэсты так званых «дармаедаў», Меркіс вёў стрымы з масавых акцый і стаў адным з самых пазнавальных рэгіянальных журналістаў-вядоўцаў.

Да затрымання Яўген характарызаваў сябе гэтак: «Праваслаўны, прыхільнік заходніх каштоўнасцяў і патрыярхальнасці ў сям’і, люблю панк, рок і рэтра 1950-х – 1970-х, творчасць «трушных паэтаў» — Анатоля Сыса і Васіля Стуса. Люблю Гомель. У людзях цаню сапраўднасць. Але ідэя — галоўнае і першаснае. Дэпрэсіўны аптыміст. Выклікаюць захапленне персоны кшталту кіраўніка «Тэсла Мотарс» Ілана Маска, якія сягаюць сваімі ідэямі і дзейнасцю ў далячынь, змяняюць свет».