Хронікі рэпрэсій. Вернік Сергій Мельянец і былая палітзняволеная Крысціна Чаранкова эмігравалі

З дапамогай інфармацыі праваабаронцаў і незалежных медыя сабралі звесткі пра палітычны пераслед у Беларусі за 18 красавіка.

BYSOL эвакуіраваў з Беларусі былую палітзняволеную Крысціну Чаранкову, паведаміў сузаснавальнік фонду Андрэй Стрыжак.

Актывістка адбыла ўвесь тэрмін зняволення і з’ехала праз пагрозу паўторнага пераследу.

Дзяўчыне прысудзілі 2,5 года пазбаўлення волі за допісы ў Instagram пра міліцыянтаў — Крысціну абвінавацілі ў «распальванні іншай сацыяльнай варожасці» (ч. 1 арт. 130 КК). На судзе Чаранкова патлумачыла, што ў жніўні 2020 году міліцыя затрымала бацькоў яе мужа, іх білі. Таму яна пачала негатыўна ставіцца да сілавікоў. Напачатку красавіка Крысціна выйшла на волю.

У судзе Савецкага раёна Мінска 28 сакавіка да 2,5 гадоў «хатняй хіміі» за ўдзел у акцыі пратэсту ў жніўні 2020 года асудзілі мінчука Вадзіма Пятроўскага. Яго прызналі вінаватым паводле ч. 1 арт. 342 КК (актыўны ўдзел у дзеяннях, што груба парушаюць грамадскі парадак). Асноўнымі доказамі віны мужчыны сталі фота і відэа з акцыі пратэсту з яго тэлефоне.

«І тут наляцеў АМАП і паклаў нас тварам у падлогу»

Сілавікі затрымалі жыхара Брэста Дзмітрыя Постнікава. Яго абвінавачваюць ва ўдзеле ў акцыі пратэста, якая праходзіла ў горадзе 10 жніўня 2020 года.

У Мінску затрымалі хлопца за ўдзел у пратэстах 2020 года. Праўладныя тэлеграм-каналы пішуць, што затрыманы «стаяў на барыкадах» каля гандлёвага цэнтру «Рыга» ў Мінску.

Евангельскі прапаведнік Сергій Мельянец пакінуў Беларусь разам са сваёй вялікай сям’ёй. Бацька сямі дзяцей, які быў затрыманы 19 сакавіка і адбыў два адміністратыўныя арышты агульнай працягласцю 25 сутак, выйшаў на волю і знаходзіцца ў бяспецы, паведамляе «Хрысціянская візія».

Яго затрымалі ў Мінскім гарадскім судзе, дзе адбываўся разгляд справы журналіста Ігара Карнея. Сергій прыйшоў на судовае пасяджэнне, каб малітоўна падтрымаць Ігара.

Класкоўскі: Шанцы на вызваленне Пачобута не нулявыя

У Мінскім гарадскім судзе распачаўся суд над Валерыем Залівакам. Яго судзяць за данаты і абвінавачваюць павдле арт. 361-2 (фінансаванне дзейнасці экстрэмісцкага фармавання) і ч. 1 арт. 361-2 (фінансаванне экстрэмісцкай дзейнасці).

Сутнасць абвінавачвання і абставіны справы праваабаронцам пакуль невядомыя. Справу разглядае суддзя Яўген Пісарэвіч.

Валерыю Заліваку 32 гады. Ён мінчук. Вучыўся на біялагічным факультэце БДУ, пісаў дыплом пра жукоў-лістаедаў. Таксама мужчына захапляецца фантастыкай і Sci-Fi, малюе на камп'ютары і любіць музыку ў стылі метал.

У Гомельскім абласным судзе пачаўся разгляд крымінальнай справы ў дачынені да Анатоля Сяргеевіча Кірэйчыка — пенсіянера з Хойнікаў. Судовы працэс вядзе суддзя Шаршнёў Яўген.

Паводле звестак следства, з кастрычніка 2020 года па люты 2022 года 74-гадовы мужчына сістэматычна размяшчаў каментары пад фатаграфіямі прадстаўнікоў улады, дзе, «не саромеючыся ў выразах, абражаў, публічна прыніжаў і ганьбіў іх гонар і годнасць». Падчас ператрусу ў яго дома знайшлі боепрыпасы. Пенсіянер расказаў следчым, што калекцыянаваў іх.

Сцвярджаецца, што Кірэйчык «бразіў» ажно 135 пасадавых асобаў — супрацоўнікаў КДБ, пракуратуры, міліцыі, Следчага камітэта, Міністэрства абароны і судовай сістэмы.

Дзеянні мужчыны кваліфікавалі паводле арт. 188 КК (паклёп), арт. 369 КК (публічная абраза прадстаўніка ўлады), арт. 391 КК (абразасуддзі) і ч. 2 арт. 295 КК (незаконнае захоўванне боепрыпасаў).

«Абвінавацілі, што я дапамагала «ворагам дзяржавы». Гісторыя беларускі, якая ледзь уратавалася

У Мінскім абласным судзе 18 красавіка распачаўся суд над 29-гадовым Ігарам Парункевічам, які быў уладальнікам бара ў Паставах, дзе збіралі грошы пацярпелым ад рэпрэсій.

Мужчына знаходзіцца за мяжой, яго судзяць завочна.

Ігара у абвінавачваюць паводле чатырох артыкулаў Крымінальнага кодэкса: арт. 130 (распальванне іншай сацыяльнай варожасці), арт. 368 (абраза Лукашэнкі), арт. 364 (пагроза прымянення гвалту ў дачыненні да міліцыянта), ч. 1 арт. 361-4 (садзейнічанне экстрэмісцкай дзейнасці).

У лютым Следчы камітэт паведамляў пра ўзбуджэнне крымінальнай справы ў парадку спецвытворчасці ў адносінах да Ігара па трох артыкулах. За два месяцы да суда да справы дадалі яшчэ адзін артыкул — «садзейнічанне экстрэмісцкай дзейнасці».

Справу разглядае Алена Бачышча.

Сёння ў Мінскім гарадскім судзе пачалі судзіць Івана Краўцова. Таксама завочна, бо палітычны актывіст, архітэктар, менеджар, выканаўчы сакратар Каардынацыйнай рады, сябра аргкамітэта па стварэнні партыі «Разам» і каманды кандыдата ў прэзідэнты Беларусі на выбарах 2020 года Віктара Бабарыкі знаходзіцца па-за межамі Беларусі.

Справу разглядае суддзя Анжэла Касцюкевіч. Крыўцову інкрымінаваныя: ч. 3 арт. 130 КК (распальванне варожасці), ч. 4 арт. 209 КК (махлярства ў буйным памеры), ч. 1 арт. 357 КК (змова ці іншыя дзеянні, здзейсненыя з мэтай захопу дзяржаўнай улады), ч. 1 арт. 361-1 КК (стварэнне экстрэмісцкага фармавання альбо ўдзел у ім).

Спаліліся на мове. З’явілася чарговае сведчанне, як сілавікі фабрыкуюць палітычныя справы

Палітзняволены Вячаслаў Лазараў у калоніі захварэў на пнеўманію. Яго змясцілі ў ШІЗА. Пра гэта паведаміў праваабаронца Павел Левінаў, піша БАЖ: «Вячаслаў ляжаў у лякарні, цяпер хвароба адступіла, ён пачуваецца лепей, настрой у яго бадзёры. Аднак ёсць і не такія добрыя навіны: верагодна, што з 11 красавіка яго накіравалі ў штрафны ізалятар. За якія правіны і на які тэрмін, невядома».

Нагадаем, палітзняволеным сужэнцам Таццяне Пыцько і Вячаславу Лазараву прысудзілі 3 і 5,5 гадоў зняволення адпаведна.

У выніку апеляцыі Вярхоўны суд прызначыў Таццяне той жа тэрмін, але з адтэрміноўкай выканання пакарання на тры гады. Вячаславу зменшылі тэрмін на паўгады. Цяпер ён адбывае тэрмін у папраўчай калоніі № 15.

Памерла шматдзетная жыхарка Бабруйска Ірына Сурыгіна, якую раней неаднаразова затрымлівалі пасля выбараў. Ёй было ўсяго 39 гадоў.

У 2021 годзе жанчыну затрымлівалі як мінімум тройчы — ёй прызначалі «суткі» і больш за 10000 рублёў штрафаў. Пасля аднаго з судоў сям'і Ірыны далі статус сацыяльна-небяспечнай. Міліцыянты пагражалі тром дзецям бабруйчанкі, што пасадзяць яе ў турму, а іх забяруць у прытулак.

На волю выйшлі тры палітзняволеныя жыхары Брэста. Паводле падлікаў праваабаронцаў, 14 красавіка на волю выйшлі Андрэй Тарасавец, Максім Імхавік і Іван Пацяйчук. Яны цалкам адбылі свае тэрміны.

Палітвязняў асудзілі 12 ліпеня 2021 года да трох гадоў калоніі па справе аб «масавых беспарадках» у Брэсце 10 жніўня 2020 года. Пасля прысуду хлопцаў узялі пад варту ў зале суда. На момант прысуду Максім і Іван былі непаўнагадовыя, таму адбывалі пакаранне ў бабруйскай выхаваўчай калоніі. У зняволенні хлопцы знаходзіліся больш за 2 гады і 9 месяцаў.