Хронікі рэпрэсій. Затрымалі вядомага дзіцячага трансплантолага, працягваюць хапаць за «абразу Лукашэнкі»

Грамадства

Сабралі інфармацыю ад праваабаронцаў і медыя пра палітычны пераслед беларусаў 6 кастрычніка.

unknown_yl47y.png

У Мінску затрымалі дасведчанага дзіцячага трансплантолага Аляксея Аляксейчыка.

Як распавялі калегі лекара, увесну 2022 года спецслужбы атрымалі доступ да ўнутранага чату медпрацаўнікоў РНПЦ дзіцячай анкалогіі і гематалогіі. У ім адкрыта вялося абмеркаванне палітычнай сітуацыі ў Беларусі, працы незалежнага прафсаюза «Панацэя» і г. д. Магчыма, затрыманне Аляксейчыка звязана з гэтым чатам, адзначае «Н*ша Ніва».

Затрыманы доктар Аляксейчык лічыцца адным з самых дасведчаных і прафесійных трансплантолагаў цэнтра. Ён мае стаж больш за 20 гадоў, праводзіў аперацыі па перасадцы касцявога мозгу.

У судзе Ленінскага раёна Гродна вынесены прысуд Аляксандру Ваўчку. Яго прызналі вінаватым паводле двух артыкулаў Крымінальнага кодэкса — ч. 2 арт. 367 (паклёп на Лукашэнку) і ч. 1 арт. 368 (абраза Лукашэнкі). Суддзя Наталля Горбач прысудзіла Аляксандру 2,5 года пазбаўлення волі ў калоніі агульнага рэжыма.

Згодна з пазіцыяй абвінавачання, 35-гадовы мужчына размяшчаў у «Аднакласніках» публікацыі з абразамі Лукашэнкі, якія ўтрымлівалі «недакладныя сведчанні, спалучаныя з абвінавачаннем яго ў здзяйсненні цяжкіх і асабліва цяжкіх злачынстваў». Абвінавачанне было ўпэўненае, што гэтым Ваўчок зняважыў ягоныя гонар і годнасць.

Таксама мужчына размясціў у «Вконтакте» тэкставы каментар і відэаролік, дзе выказваўся ў бок Лукашэнкі «з парушэннем этычных нормаў».

Яшчэ 23 жніўня суд Савецкага раёна Мінска вынес прысуд палітвязню Міраславу Сабчуку — сябру незалежнага прафсаюза, які працаваў на Мінскім трактарным заводзе. Яго прызналі вінаватым паводле арт. 342 КК і асудзілі на 1,5 года абмежавання волі без накіравання ў ПУАТ — «хатняй хіміі». Палітвязня вызвалілі ў залі суда.

Яго прызналі вінаватым ва ўдзеле ў адным з Маршаў, падчас якога ён «дзейнічаў узгоднена з групай асобаў». Ягоныя дзеянні нібыта пацягнулі за сабой парушэнне работы транспарта. Падчас акцыі пратэста палітвязень выкрыкваў лозунгі, дэманстраваў пратэсныя сімвалы і плакат.

Міраслаў прызнаў віну і распавёў, што прыняў удзел у Маршы з удзелам супрацоўнікаў МТЗ. Доказам па справе праходзілі відэа і фотаздымкі палітвязня, якія былі зробленыя падчас мерапрыемства.

Праўладныя тэлеграм-каналы паведамляюць пра затрыманне 26-гадовага жыхара Гомеля Андрэя Карпенкі. Паводле іх, хлопец у 2020 годзе ў сацсетках апублікаваў запіс, у якім сілавікі ўбачылі паклёп на Лукашэнку. Затрымалі Андрэя пасля вяртання ў Беларусь.

«Пакаяльнае відэа» хлопца доўжыцца 4 хвіліны, большую частку з якіх хлопец яўна пад прымусам расказвае пра тое, як дрэнна ў Еўропе і Канадзе, што там да беларусаў ставяцца як да людзей «другога гатунку», а маёмасць каштуе вялікіх грошаў. І таму, нягледзячы на тое, што там танныя прадукты, ён вырашыў, што будзе жыць у Беларусі ці Расіі.

Праўладныя тэлеграм-каналы паведамляюць пра затрыманне 26-гадовага Паўла Далгакова. На «пакаяльным відэа» хлопец кажа, што ўдзельнічаў у паслявыбарчых акцыях пратэсту і перакрываў рух транспарту.

Паведамляецца, што да выбараў Павел працаваў на чыгунцы, але пасля звольніўся і з'ехаў у Польшчу. Затрымалі яго пасля вяртання ў Беларусь.

У Ваўкавыску быў затрыманы Аркадзь Навумчык.

Па інфармацыі з праўладных каналаў, яго затрымалі нібыта за рэгістрацыю ў «Плане Перамога».

Паведамляецца, што раней мужчына чатыры разы прыцягваўся да адміністрацыйнай адказнасці за ўдзел у пратэстах.

Напярэдадні гадавіны прэзідэнцкіх выбараў у магілёўскіх вайскоўцаўсілавікі правяралі тэлефоны.

У верасні 2022 года ў судзе Магілёўскага раёна прайшло адразу два працэсы над вайскоўцамі, якіх абвінавацілі ў распаўсюджванні «экстрэмісцкіх матэрыялаў» (арт. 19.11 КаАП).

Вядома, што ў вайсковую частку 63615 (в. Галынец Магілёўскага раёна) напярэдадні 9 жніўня 2022 года прыязджалі сілавікі з контрвыведкі і ГУБАЗіК. У вайскоўцаў праглядалі тэлефоны. У выніку, мінімум у двух чалавек — Руслана М. (ужо не працуе ў вайсковай частцы) і Рамана Х. — былі знойдзены матэрыялы «экстрэмісцкай накіраванасці».

Першапачаткова суд Магілёўскага раёна адправіў адміністрацыйныя справы абодвух вайскоўцаў на дапрацоўку. У далейшым суды па гэтых справах або праводзіліся таемна, без паведамлення аб іх правядзенні, або справы «спусцілі на тармазах».

4 кастрычніка ў Мінску быў праведзены вобшук дома і на лецішчы ў 43-гадовага Мікалая Нямковіча. Вядома, што мужчыну затрымалі. Цяпер ён знаходзіцца ў ІЧУ на Акрэсціна.

Таксама ў сталіцы 5 кастрычніка быў затрыманы Сяргей Кабзенка.

Праўладныя тэлеграм-каналы паведамілі пра затрыманне Ксеніі Котавай, якую яны называюць анархісткай. На «пакаяльным відэа» дзяўчына кажа, што мела татуіроўку «АСАВ», была на Пушкінскай 9-10 жніўня 2020 года, а таксама нібыта далучылася да плана «Перамога».

У Глыбокім учора быў затрыманы фатограф і відэааператар Леанід Юрык.

Паводле папярэдняй інфармацыі, мужчына затрыманы паводле адміністрацыйнай справы.

У Глыбокім учора быў затрыманы актывіст Вадзім Хлус.

А сёмай раніцы да яго прыехалі сілавікі, дома быў праведзены ператрус.

Вадзім Хлус шмат год быў апазіцыйным актывістам, назіральнікам на выбарах. У 2020 годзе двойчы сядзеў на «сутках». У 2022 годзе да яго неаднаразова прыходзілі з міліцыі і пракуратуры, пісьмова папярэджвалі пра адказнасць за апазіцыйную актыўнасць.

Таксама вядома пра візіт сілавікоў да яшчэ аднаго глыбачаніна, які раней прыцягваўся за палітыку — але яго не затрымлівалі.

У пачатку студзеня жыхар Ліды Л. ў стане алкагольнага ап'янення выкрыкнуў каля навагодняй елкі абразу ў адрас Лукашэнкі. Гэта пачулі супрацоўнікі міліцыі, пасля чаго мужчыну затрымалі. Яму паставілі ў віну ч. 1 арт. 368 КК.

24 лютага 2022 падчас закрытага судовага пасяджэння Лідскага суда былі агучаны высновы экспертаў-псіхіятраў. Паводле экспертызы, жыхар Л. мае «лёгкую разумовую адсталасць са значнымі парушэннямі паводзінаў».

У выніку суд пастанавіў вызваліць мужчыну ад крымінальнай адказнасці і накіраваць на прымусовае лячэнне ў псіхіятрычным стацыянары.

Улады закрылі школу пры каталіцкім Хрысціянскім сацыяльным цэнтры ў Мінску.

Пра закрыццё адукацыйнай арганізацыі, якая фарматам падобная да групы падоўжанага дня або прыватнай школы ці садка, паведаміў «Св*бодзе» прэсавы сакратар Беларускага каталіцкага касцёлу айцец Юры Санько.

Хрысціянскі сацыяльны цэнтр — рэлігійная арганізацыя, якая падпарадкоўваецца кіраўніку Каталіцкай царквы ў Беларусі. У ім ёсць капліца, жылыя пакоі для ксяндзоў, а таксама прыватная каталіцкая школа.