Як упрыгожылі галоўныя плошчы двух найбліжэйшых сталіц да зімовых святаў — 2024

Адлегласць паміж беларускай і літоўскай сталіцамі складае ўсяго 172 кіламетры — гэта меней за тое, каб дабрацца з Мінску ў любы абласны горад. Але, гледзячы на фотаздымкі калядных плошчаў, цяжка ўявіць, што яны зроблены ў суседніх краінах, ды яшчэ і ў адзін прамежак часу.

У першым выпадку мясцовыя ўлады прапануюць гараджанам еўрапейскую прастору, прапітаную водарам абляпіхавага глінтвэйну і бельгійскіх вафляў, а ў другім — духам «савецкай эстэтыкі». 

Калядная ялінка

Канцэпцыя галоўнай ялінкі Вільні штогод абіраецца публічным адкрытым конкурсам, пераможцы якога даводзіцца ўпрыгожыць Катэдральную плошчу сваім шэдэўрам. У 2023-ім горад адзначаў юбілей: на 700 гадоў муніцыпалітэт раскашэліўся на вялізную каркасную ялінку ў выгляде торта з 700 свечкамі. Кошт такога праекта склаў рэкордную 231 тысячу еўра, у той час як цяпер — менш за 90 тысяч. 

Сёлета мясцовыя ўлады ўсіх паветаў Літвы вырашылі поўнасцю адмовіцца ад штучных галінак і конусападобных каркасаў на карысць жывых ялінак. У Вільні гэта паўнацэннае дрэва на тоўстым ствале, абгорнутае агляднай пляцоўкай у выглядзе калядных падарункаў. Ялінку ўпрыгожылі залацістымі шарыкамі і агенчыкамі цёплага адцення, каб перадаць гараджанам утульнасць, адчуванне шчодрасці і напаміны пра традыцыі. Дрэва размясцілі такім чынам, каб цень ад яго галінак падала па Катэдральную вежу.

У Мінску ж традыцыйна ўсталяваны тыповы конус з так званым «светавым шоў» на піксельнай сетцы. Звычайна гэта набор кідкіх неспалучальных колераў, але ў мінулыя гады па ім дэманстравалі ў тым ліку і чырвона-зялёны сцяг. Больш нічога прывабнага ў гэтай ялінцы няма, адзінае што, у адрозненне ад праспекта Незалежнасці ўвянчаная яна каляднай віфлеемскай зоркай. 

Галоўны праспект

Праспект Гедыміна ў Вільні летась дэкараваны мінімалістычнымі беласнежнымі фігурамі ў выглядзе патокаў завірухі, а сама праезная частка перакрытая на перыяд усіх святаў. Што да Мінску, праспект Незалежнасці гэтай зімой «упрыгожылі» савецкімі зоркамі і полымем вечнага агню, колеры якога яшчэ і выклікаюць асацыяцыі з георгіеўскай стужкай, што стала адным з сімвалаў уварвання Расіі ва Украіну.

Калядны гарадок і забавы

Вакол віленскай ялінкі размясцілася даволі сціплая, але гарная ды ўтульная зона адпачынку. На святочным кірмашы можна не толькі выпіць кубачак глінтвэйну на любым соку ці віне, але і набыць мноства падарункаў: калядныя пернікі, ледзянцы, шакоцісы, печаныя ялінкі ў шакаладзе, каўбасы і вырабы з каноплі. У мінусавую тэмпературу (з гэтым ёсць праблемы) гараджанам даступны лядовы каток ва ўнутраным дворыку палаца Вялікіх Князёў. 

На Кастрычніцкай плошчы ўсталяваныя толькі некалькі нязграбных дэкаратыўных дамоў у стылі а-ля «Амстэрдам», сабраныя з танных матэрыялаў абсалютна бесталковымі майстрамі, і ўжо класічныя металічныя дрэвы, якія даўно можна ўбачыць у розных частках горада.