Сто беларусаў агучылі больш за сотню гісторый дыскрымінацыі беларускай мовы

Культура

Праекты audiobooks.by і «Кніжны Воз» у Дзень роднай мовы прэзентавалі аўдыёкнігу «Мова 404» Аліны Нагорнай. У ёй сабраны 127 гісторый пра моўную дыскрымінацыю беларусаў і беларусак. Агучылі кнігу сто простых людзей.

dsc_3056__1__logo_1.jpg


Кніга названа па аналогіі з паняццем «памылка 404». З ім сустракаешся ў інтэрнэце, калі сервер не можа знайсці запытаны вэб-сайт, і ў такім выпадку надпіс на старонцы кажа «Not Found» — «не знойдзена». Так, паводле Аліны Нагорнай, адбываецца і з беларускай мовай: хаця яна і дзяржаўная, але знайсці прыклады яе выкарыстання ў Беларусі не так і проста.

Раней выйшла папяровая версія кнігі, але сярод гісторый, прадстаўленых цяпер, ёсць і тыя, што не былі ў яе ўключаны. Іх агучылі 100 беларусаў — жыхары 15 краін ва ўзросце ад 17 да 60 гадоў, а таксама адна ўкраінка. Усяго прэтэндэнтаў на ўдзел у агучцы было больш за 200.

Кожны з удзельнікаў атрымаў адну ці дзве гісторыі і агучыў іх у сябе дома.


«Больш за сотню штодзённых перапісак, тысячы правак, дзясяткі гадзін працы гукарэжысёраў прынеслі фантастычны вынік. Няхай жа яна будзе нарэшце пачутая», — так кажуць пра свой праект стваральнікі аўдыёкнігі «Мова 404».

Складальніца кнігі Аліна Нагорная разам з мужам Ігарам Случакам заснавала ініцыятыву «Умовы для мовы». Раней Аліна выпусціла дапаможнік «Абаронім мову!» пра тое, як адстойваць моўныя правы. Ігар Случак, юрыст, выступіў рэдактарам «Мовы 404». Яны вядомыя тым, што шукалі спосабы прыцягнення да адказнасці за парушэнне моўных правоў у розных сферах — ад заканадаўства да спорту.

Паслухаць аўдыёкнігу можна тут.

Паводле «НН»