Чычваркін: «Лукашэнка абапіраецца выключна на сілавікоў, ніякага рэйтынгу ў яго няма»
Бізнесовец і расійскі апазіцыянер разважае, ці самастойны Лукашэнка ў сваіх дзеяннях, чаму ён не ўступае ў вайну наўпрост, як рэйтынг Уладзіміра Пуціна звязаны з курсам расійскага рубля, і ці ёсць нейкі рэйтынг у Лукашэнкі.
— Лукашэнка — цалкам несамастойная фігура, — цытуе Яўгена Чычваркіна «Салідарнасць» са «спасылкай на канал «Звычайны ранак». — Зразумела, што ядзерную зброю на тэрыторыі Беларусі кантралююць расійскія войскі.
Намеснікі на ўсіх ключавых прадпрыемствах Беларусі — супрацоўнікі ФСБ, у кожным міністэрстве на адной з вышэйшых пасад — супрацоўнікі ФСБ. Так Пуцін кантралюе амаль усе былыя рэспублікі СССР.
Асноўная праблема, з-за якой пачалася вайна, і была ў тым, што Украіна паспрабавала адпаўзці ад гэтай схемы. Усё пачалося праз страту Расіяй кантролю.
А адносна Беларусі яшчэ дадайце ўсе падачкі, якія яна атрымала ад Пуціна, і па гэтых даўгах, зразумела, разлічыцца не так лёгка.
Думаю, што Арменія і Беларусь цяпер — самыя падкантрольныя краіны.
Пры гэтым Лукашэнка для Пуціна — вельмі зручны. Быў бы нязручны, яго б замянілі. А ў вайну Лукашэнка не ўступае наўпрост толькі таму, што яны баяцца паўтарэння 2020 года. Народ гэтага дакладна не падтрымае. І ім патрэбныя ўсе сілавікі ўнутры на выпадак, калі эканоміка праваліцца і санкцыі даб'юць беспрацоўем і зніжэннем узроўню жыцця.
Ваганні расійскага рубля бізнесовец лічыць наўпрост звязанымі з рэйтынгам Пуціна. А вось з нагоды рэйтынгу Лукашэнкі ў яго меркаванне асаблівае.
— У РФ не могуць усталяваць любы курс, які не пацвердзяць наяўнымі колькасцю. Яны не могуць, як у савецкі час, паставіць 63 капейкі за долар, у той час як дэ-факта ў прастытутак яго скуплялі па 3 рублі, а прадавалі з'язджаючым па 5. Так не атрымаецца.
Зразумела, што ім было выгадна, каб курс адступіў на больш выгадныя абарончыя пазіцыі. І вось калі ён акуратненька споўз з 80 да 103 рублёў, завібраваў народ, бізнес, кітайскія машыны падаражэлі, цэны на прадукты пачалі паўзці ўверх.
І заўсёды, калі курс долара падымаецца, прапарцыйна рэзка падае падтрымка ўладаў. А Пуцін — раб рэйтынгу, як раб лямпы.
Рэйтынг яго вельмі турбуе. Адна справа — фармальнае абгрунтаванне наступнага тэрміну, іншая справа — рэйтынг.
Гэта ядро, якое гатовае падтрымаць Пуціна, яно насамрэч не такое вялікае. І яно пачынае моцна вібраваць, калі падае курс. І нават тыя, хто Пуціна не любяць, але гатовыя трываць — вось гэтая маўклівая маса, якіх 80% — яны пачынаюць агрэсіўна рэагаваць на сацапытанні, калі падае курс.
А калі курс не падае: ваюйце колькі ўлезе — усім усё роўна. Каб расіяне былі галодныя, іх трэба перастаць карміць.
Рэйтынг не турбуе толькі Лукашэнку. Ён абапіраецца выключна на сілавікоў, ніякага рэйтынгу ў яго няма. Ён разумее, што толькі гэтая дубіна, якая ў яго ёсць у выглядзе Акрэсціна, трымае яго ва ўладзе, — мяркуе Чычваркін.
Глядзіце таксама
