Нягледзячы на заклік Макея. Святлана Ціханоўская выступіла ў ААН

Святлана Ціханоўская выступіла з відэазваротам перад удзельнікамі пасяджэньня 48-й сэсіі Рады правоў чалавека ААН. Яна звярнула ўвагу на колькасць палітвязняў і тысячы беларусаў, арыштаваных з палітычных прычынаў, эскалацыю рэпрэсій, у тым ліку супраць журналістаў, распавядае «Свабода».

c0e0638d_7576_473a_a714_8cef2dadc3a8_w1023_r1_s.webp

Як паведамляе прэсавая служба Ціханоўскай, яна заявіла, што рэжым Лукашэнкі стаў «пагрозай рэгіянальнай і міжнароднай бяспецы, і гэты тэрор мусіць быць спынены».

Ціханоўская заклікала падтрымаць спецыяльны мандат Вярхоўнага камісара ААН у правах чалавека для вывучэння парушэнняў правоў чалавека ў Беларусі і прыцягнення да адказнасці вінаватых. У межах гэтага мандату Вярхоўны камісар прызначыла трох экспертаў высокага ўзроўню — Карыну Маскаленку (Расія), Сюзан Базыллі (Канада) і Марка Міланавіча (Сербія).

Таксама яна адзначыла працу спецдакладчыка ААН аб правах чалавека ў Беларусі. Ціханоўская прапанавала ўключыць беларускае пытанне ў парадак Рады Бяспекі ААН і разгледзець у Трэцім камітэце Генеральнай асамблеі.

Макей выступаў супраць альтэрнатыўных галасоў у ААН

27 верасня на сэсіі Генеральнай асамблеі ААН міністр замежных спраў Беларусі Уладзімір Макей выступіў супраць «прасоўвання галасоў грамадзянскай супольнасці» ў ААН.

«Разглядаем гэтыя дзеянні як спробу надаць няўрадавым арганізацыям (якія, дарэчы, створаны і выкармлены пры падтрымцы асобных зацікаўленых краін) статус, ідэнтычны суверэнным дзяржавам — сябрам ААН. Гэта катэгарычна непрымальна. Хацелася б нагадаць усім пра існаванне ключавога прынцыпу дзейнасці ААН: «Адна дзяржава — адзін голас». Выступаем супраць размыцця суверэнітэту дзяржаў — сяброў ААН і стварэння марыянетачных удзельнікаў у выглядзе няўрадавых арганізацый, якія будуць здольныя заглушыць думку самастойных дзяржаў. Бескантрольнае навадненне сістэмы ААН меркаваннем НДА не толькі не дазволіць належным чынам улічыць і нават пачуць іх галасы, але і ўскладніць дасягненне кансенсусу».

Раней кіраўнік МЗС Беларусі Уладзімір Макей сустрэўся з генеральным сакратаром ААН Антонію Гутэрышам. Падчас размовы ён заявіў аб датычнасці прадстаўнікоў ААН у Беларусі да фінансавання пратэстаў і дадаў, што лічыць недапушчальным выкарыстанне «асобных структур ААН для дэманізацыі Беларусі, дыскрэдытацыі Беларусі з абсалютна надуманых палітызаваных матываў».

Што гаварылі аб Беларусі ў Радзе правоў чалавека ААН

24 верасня на 48-й сэсіі Рады правоў чалавека ААН адбыўся інтэрактыўны дыялог наконт прамежкавай абноўленай інфармацыі Упраўлення Вярхоўнага камісара аб сітуацыі ў Беларусі напярэдадні прэзідэнцкіх выбараў 2020 году і пасля іх.

Вярхоўны камісар ААН у правах чалавека Мішэль Бачэлет пачала сустрэчу заявай, у якой падкрэсліла, што сітуацыя з правамі чалавека ў краіне працягвае пагаршацца.

«Я глыбока занепакоеная з нагоды ўсё больш жорсткіх абмежаванняў прасторы для грамадзянскай супольнасці і асноўных свабодаў, у тым ліку працягу аперацый спецслужбаў супраць арганізацый грамадзянскай супольнасці і незалежных СМІ, а таксама арыштаў і крымінальнага пераследу праваабаронцаў і журналістаў праз абвінавачанні, якія адно за адным аказваюцца палітычна матываванымі», — спасылаецца на дакладчыцу цэнтр «Вясна».

«Я ўстрывожаная бясконцымі паведамленнямі пра масавыя і сістэматычныя катаванні і жорсткае абыходжанне ў кантэксце адвольных арыштаў і затрыманняў удзельнікаў акцый. На сённяшні дзень у нас няма доказаў якіх-небудзь сапраўдных і бесстаронніх расследаванняў на падставе паведамленняў аб інцыдэнтах, якія адбыліся падчас разгону дэманстрацый у наступныя дні пасля 9 жніўня 2020 году», — сказала Вярхоўны камісар.

У дыялогу ўдзельнічалі прадстаўнікі 46 краін і міжнародных арганізацый, якія ўздымалі пытанні рэпрэсій, катаванняў і адвольных затрыманняў, а таксама прызначэння вялікіх тэрмінаў у палітычна матываваных крымінальных справах, у тым ліку датычна Віктара Бабарыкі, Марыі Калеснікавай і Максіма Знака, прымусовай пасадкі самалёта Ryanair, міграцыйнага крызісу на мяжы Беларусі з Еўрасаюзам.