Павел Усаў: у геапалітычным плане мы ўжо ў Трэцяй сусветнай вайне

Новая вайна ў чарговы раз прымусіла свет дзяліцца на супрацьлеглыя лагеры. Толькі гэты падзел моцна нагадвае папярэдні — з нагоды расійска-ўкраінскай вайны. Усё гэтак жа разам Расія, Беларусь, Іран, усё тую ж палітыку праводзіць Кітай... У свеце фарміруецца «вось зла», якая будзе атакаваць усё мацней заходні дэмакратычны свет?

Палітолаг Павел Усаў, аўтар змрочных, але цікавых прагнозаў, распавёў у эфіры «Еўрарадыё», як «таемныя спружыны геапалітыкі» сплятаюць розныя рэгіёны свету ў сетку ўзаемазвязаных інтарэсаў. У некаторых месцах гэтая сетка пачынае іскрыць, і разрад, вобразна кажучы, можа перадавацца на вялікую адлегласць, запальваючы ваеннымі канфліктамі аддаленыя адзін ад аднаго рэгіёны. І потым не варта здзіўляцца, што словы «Ізраіль» і «Украіна» так часта гучаць побач. А за ўсім гэтым бачыцца цень якога-небудзь буйнога гульца, напрыклад, Расіі.

Такім чынам эксперт падводзіць да думкі, што мы ўжо жывём у стане Трэцяй сусветнай вайны.

Каму гэта выгадна?

У Заходняй Еўропе прайшоў шэраг тэрактаў, растуць антыізраільскія настроі. Мусульманскія супольнасці ўнутры заходніх краін будуць далей радыкалізавацца, асабліва калі пачнецца наземная аперацыя ў сектары Газа, мяркуе Усаў.

«Ужо відавочна, як рэагуюць мусульманскія супольнасці ва ўсіх краінах Заходняй Еўропы: Германія, Вялікабрытанія — у Лондане вялікія мітынгі, Францыя — там ужо бойкі з дэманстрантамі, якія масава падтрымліваюць дзеянні ХАМАС. Антыяўрэйскія рухі ўзмацняюцца ў Еўропе. Праязджаў міма амбасады Палесціны ў Варшаве — нават там кветкі, вянкі ляжаць, здымкі драматычных падзей, як Ізраіль бамбіць Газу».

Салідарнасць праісламскіх, прапалесцінскіх груп у Еўропе вельмі высокая, што пагражае дэстабілізацыяй унутранай сітуацыі ў еўрапейскіх краінах. А гэта ўжо выгадна для Расіі.

«Дэстабілізацыя, хаос у Заходняй Еўропе, перш за ўсё ў Еўрасаюзе — гэта тое, на што спадзяецца сёння Расія, тое, чаго яна чакае. Яна гэты працэс будзе ўзмацняць».

Як менавіта? Правакуючы новыя хвалі бежанцаў. Так ужо было падчас войнаў у Сірыі, у Паўднёвай Афрыцы. Беларусь можа быць тут інструментам гібрыднага ўздзеяння, як гэта было ў 2021 годзе.

Усаў прыводзіць цікавую версію, чаму пачалася новая палесціна-ізраільская вайна. Ізраіль сумесна з Егіптам цяпер распрацоўвае адно з найбуйнейшых радовішчаў газу «Левіяфан» у Міжземным моры. Гэта магло б знізіць залежнасць Захаду ад расійскага газу. Некаторыя аналітыкі адзначаюць, што менавіта ў гэты момант і пачалася вайна. Яна можа зноў падвысіць кошты на газ, запатрабаваць дадатковых крыніц газу з той жа Расіі.

Вайна Ізраіля з ХАМАС — гэта падарунак нябёсаў для Расіі

Кансалідацыя супраць «ізраільскай ваеншчыны»

«У гібрыдным фармаце мусульманскія краіны, такія як Іарданія, Саудаўская Аравія, Іран, ужо ўключыліся, — мяркуе палітолаг. — Сірыя актыўна бярэ ўдзел не ў адкрытых баявых дзеяннях, але, прынамсі, у пастаўках узбраення, улічваючы, што там размешчаны расійскія вайскоўцы. Ну і, вядома, Ліван. Гэты вузел ужо так проста не развяжаш, нават шляхам наземнай аперацыі».

Што ж тычыцца бежанцаў з Газы, то, па здагадцы Усава, і ХАМАС, і суседнія арабскія дзяржавы імкнуцца стварыць гуманітарны крызіс, каб паказаць «нялюдскасць» Ізраіля, які бамбіць мірных жыхароў. Магчыма, таму, а не толькі з-за тэрарыстычнай пагрозы, тых жа мірных жыхароў Газы неахвотна прымаюць «брацкія» мусульманскія дзяржавы. Выгляд шматлікіх ахвяр «ізраільскай ваеншчыны» яшчэ мацней узбуджае радыкальныя настроі ў арабскіх дыяспарах Еўропы.

Пры гэтым Расія не спыняе інфармацыйны ўплыў, вяшчаючы і на еўрапейскіх, і на арабскіх мовах. Кантэнт прыкладна такі ж, як і па Украіне.

Чаканні Расіі, што блізкаўсходняе абвастрэнне адцягне ўвагу ад Украіны, пакуль не моцна апраўдаліся: Украіна ўсё ж такі атрымала дальнабойныя ракеты «ATACMS» і ўжо атакавала расійскі аэрапорт у захопленым Бярдзянску. Але надзеі застаюцца.

«Антыізраільскія настроі ў мусульманскім свеце будуць цалкам кансалідаваны вакол Расіі як асноўнага «антыімперскага» цэнтра. Мы бачым, як разгортваецца і расце нестабільнасць у Афрыцы. Там таксама даволі шмат краін, якія абапіраюцца на ісламскую веру. Яны збольшага антызаходнія. Гэта будзе ўзмацняць геапалітычны ўплыў Расіі ў краінах, як раней называлі, трэцяга свету, асабліва мусульманскіх краінах Блізкага Усходу, якія будуць імкнуцца падтрымліваць Расію».

Ці ўмяшаецца Іран, калі Ізраіль пачне наземную аперацыю ў Газе?

Свет апынуўся на парахавой бочцы?

Альянс Расія — Іран вельмі моцны. «Мы бачым, як у вайсковым аспекце Іран дапамагае Расіі. Тут проста няма пра што казаць. Гэтая вось сфарміравалася даволі даўно. Як толькі Расія акрэсліла свае геапалітычныя інтарэсы і прыярытэты, яна стала абапірацца на такіх ключавых гульцоў, як Іран у Азіі».

Трэба ўлічваць і тое, што на баку Палесціны стаіць Кітай, для якога таксама выгадная дэстабілізацыя. Калі яго галоўны праціўнік і канкурэнт — ЗША — засяродзіцца на дзвюх гарачых кропках (Украіне і Ізраілі), то ў Кітая з'явіцца больш свабоды дзеянняў адносна Тайваня.

«Я ўвесь час успамінаю словы былога дарадцы Пуціна Суркова пра экспарт хаосу. Вось Пекін-Тэгеран-Масква цяпер можа экспартаваць нестабільнасць у свет, асабліва ў напружаныя кропкі. Можа зноў загарэцца Афганістан — гэта небяспечная прастора, і «Талібан» рвецца ў бой. Раней ці пазней вернецца пытанне Афганістана. Індыйска-пакістанскі канфлікт пакладзецца на лязо нажа. Гэта ўсё будзе тлець, пакуль не выбухне».

Тэрарыстычныя арганізацыі ў гэтай сітуацыі атрымліваюць магчымасць актыўнага дзеяння. Арганізацыі, якія яшчэ засталіся ў Сірыі, могуць перанакіраваць сваю ўвагу і актыўнасць на Ізраіль.

«Сітуацыя выглядае вельмі небяспечнай. У геапалітычным плане мы ўжо ў Трэцяй сусветнай вайне. Гэта не вайна з выкарыстаннем ядзернай зброі, гэта вайна з выкарыстаннем іншых сродкаў. Але, улічваючы той факт, колькі на сённяшні момант дзяржаў у тым ці іншым аспекце задзейнічаны ў ваенных канфліктах, у вайне непасрэдна, ужо можна казаць пра Трэцюю сусветную вайну».

Паводле BG.Media