Сяргей Калякін: «Улада з перарэгістрацыяй палітычных партый здзяйсняе вялікае глупства»
Людзі, якія маюць свае інтарэсы, сваю пазіцыю, пункт гледжання, нікуды не падзенуцца, нават калі партыю ліквідуюць, кажа кіраўнік «Справядлівага свету» Сяргей Калякін.
Старшыня Беларускай партыі левых «Справядлівы свет» распавёў «Народнай волі», што дакументы на перарэгістрацыю партыі збіраецца падаваць 2 чэрвеня.
— Мы правялі з'езд і ў пятніцу маем намер адправіць дакументы ў Мінюст, — сказаў Сяргей Іванавіч. — Апошні тэрмін — 2 чэрвеня, таму мы не спяшаемся, час ёсць. Мы падрыхтавалі пратакол нашага нядаўняга з'езду — яго таксама трэба прыкладаць, іншыя дакументы, і ў пятніцу ўсё адправім па пошце.
— Вы падаяце дакументы са спісамі заснавальнікаў? Пытаюся, бо «Зялёныя» падалі без іх…
— Не, персанальныя даныя людзей мы не выдаём.
Дзяржава, калі запытвае ў вас персанальныя даныя, лічыць, што з'яўляецца як бы аператарам і не падпадае пад устаноўленыя ёй жа правілы. Хоць ёсць норма, што персанальныя даныя можна распаўсюджваць і апрацоўваць толькі са згоды самога чалавека. Не ўсе сябры нашай партыі хочуць, каб Мінюст ведаў іх адрас, месца працы, тэлефоны…
Наогул, я лічу, што ўлада з перарэгістрацыяй палітычных партый здзяйсняе вялікае глупства, наступствы якога выявяцца праз некаторы час…
— Удалося вам сабраць 5000 сябраў партыі, як патрабуе закон?
— Не. Мы падаём тую колькасць, якая ў нас ёсць.
Мы не хочам самаліквідавацца, таму накіроўваем дакументы ў Мінюст, і хай яны прымаюць рашэнне.
Я лічу, што закон зваротнай сілы не можа мець, а ўлада фактычна заднім днём для зарэгістраваных арганізацый увяла новую норму па колькасці заснавальнікаў партыі. Гэта супярэчыць і заканадаўству, і здароваму сэнсу.
— Што будзеце рабіць, калі не пройдзеце перарэгістрацыі?
— Не пройдзем — будзем думаць, што рабіць.
Мы правялі ў партыі анкетаванне — большасць людзей нават у выпадку спынення дзейнасці партыі жадаюць працягваць палітычную дзейнасць. Значыць, будзе стварацца нешта іншае, новае, у іншай якасці. У любым выпадку, людзі, якія маюць свае інтарэсы, сваю пазіцыю, пункт гледжання, нікуды ж не падзенуцца, нават калі партыю ліквідуюць. Іншае пытанне, у якой форме ўсё гэта будзе існаваць далей. Улада не разумее, што гэта можа быць для яе небяспечна. Але гэта іх галаўны боль, хай яны і думаюць…
Нагадаем, як пісаў «НЧ», беларускі кіраўнік падпісаў закон «Аб асновах грамадзянскай супольнасці» 14 лютага. Гэта закон змяніў некаторыя ўмовы дзейнасці палітычных партый: так, павялічваецца мінімальны парог колькасці заснавальнікаў (чальцоў) з 1 да 5 тысяч чалавек, цяпер партыі абавязкова мусяць мець арганізацыйныя структуры ва ўсіх абласцях і Мінску, а таксама не менш чым у адной траціне раёнаў кожнай з абласцей і не менш чым у адной траціне раёнаў Мінска. Міністэрства юстыцыі на працягу шасці месяцаў пасля ўступлення гэтага закона ў сілу павінна перарэгістраваць палітычныя партыі. Калі партыю не перарэгіструюць або яна сама не прыняла рашэння аб ліквідацыі, яе дзейнасць будзе спынена па рашэнні Вярхоўнага суда.