БНФ не падаваў дакументы на перарэгістрацыю партыі

Выконваючы абавязкі кіраўніка Партыі БНФ Вадзім Саранчукоў патлумачыў «Народнай Волі», чаму партыя не падавала дакументы на перарэгістрацыю.

55b222e2_f7b5_4b32_8b83_e0d096b50117_w1200_r1_1_1.jpg

Вадзім Саранчукоў, які цяпер выконвае абавязкі кіраўніка Партыі БНФ, распавёў, што 5 чэрвеня прадстаўнікі апазіцыйных партый зробяць сумесную заяву.

Нагадаем, што ў Беларусі заканчваецца падача дакументаў на перарэгістрацыю палітычных партый. Хтосьці з тых арганізацый, якія лічаць сябе апазіцыйнымі, падаваў дакументы, нехта не бачыць у гэтым сэнсу…

— Мы не падавалі дакументы на перарэгістрацыю, — кажа Вадзім Саранчукоў, які два гады таму з’ехаў з Беларусі за мяжу. — Які ў гэтым сэнс? Я ўжо неяк казаў, што нармальнай працы ў партыйных арганізацыях не магло быць ужо досыць даўна. Тым больш цяпер.

Любая актыўнасць у Беларусі не толькі не вітаецца, а губіцца на самым корані. Самыя, здаецца, законныя праявы такой актыўнасці трапляюць пад рэпрэсіі.

Таму цяпер для нас галоўнае — бяспека тых актывістаў партыі, якія знаходзяцца ў Беларусі. Ні пра якую падачу спісаў сябраў партыі размова нават не ідзе.

Дарэчы, 5 чэрвеня ў Вільнюсе адбудзецца прэс-канферэнцыя, падчас якой прадстаўнікі беларускіх пакуль што зарэгістраваных апазіцыйных партый зробяць сумесную заяву з нагоды перарэгістрацыі партый.

— Партыя БНФ будзе ліквідавана?

— Ад нас тут нічога не залежыць, бо зараз адбываецца зачыстка палітычнага поля. І няма ніякіх прагнозаў, што нават пасля падачы дакументаў на перарэгістрацыю, застануцца хоць нейкія дэмакратычныя партыі. На гэты конт ілюзій няма.

— Але, напрыклад, партыя Сяргея Калякіна і “Зялёныя” ўсё-такі падалі дакументы на перарэгістрацыю…

— Агульная ацэнка сітуацыі аднолькавая і ў нашай партыі, і ў тых жа “Зялёных” ці партыі “Справядлівы свет”. Але кожны сам абірае лінію паводзін. І я не маю ні маральнага, ні этычнага права крытыкаваць ці ўхваляць ініцыятывы тых ці іншых арганізацый. Яны вырашылі падаць дакументы на перарэгістрацыю? Гэта іх права. А ў нас свая пазіцыя.

 

Нагадаем, як пісаў «НЧ», беларускі кіраўнік падпісаў закон «Аб асновах грамадзянскай супольнасці» 14 лютага. Гэта закон змяніў некаторыя ўмовы дзейнасці палітычных партый: так, павялічваецца мінімальны парог колькасці заснавальнікаў (чальцоў) з 1 да 5 тысяч чалавек, цяпер партыі абавязкова мусяць мець арганізацыйныя структуры ва ўсіх абласцях і Мінску, а таксама не менш чым у адной траціне раёнаў кожнай з абласцей і не менш чым у адной траціне раёнаў Мінска. Міністэрства юстыцыі на працягу шасці месяцаў пасля ўступлення гэтага закона ў сілу павінна перарэгістраваць палітычныя партыі. Калі партыю не перарэгіструюць або яна сама не прыняла рашэння аб ліквідацыі, яе дзейнасць будзе спынена па рашэнні Вярхоўнага суда.