Усаў: Можа адбыцца «напад» на членаў камісій, «дваровая змова», могуць раскрыць «замах на губернатара»
У расійскіх заявах наконт асцярогі правакацый падчас рэферэндуму ў Беларусі палітолаг Павел Усаў бачыць не толькі нагнятанне абстаноўкі паміж Масквой і Захадам, але і спробу пашырэння ваеннай прысутнасці РФ у Беларусі.
Павел Усаў
— Расія падобныя ўкідкі выкарыстоўвае як элемент сваёй уласнай інфармацыйнай вайны супраць Захаду, абвінавачваючы яго ў эскалацыі абстаноўкі ў суседніх краінах, у тым ліку Беларусі. Хоць, вядома, ніякіх аб'ектыўных перадумоў для гэтага няма, — адзначыў Усаў у экспрэс-каментары «Салідарнасці». — Зразумела, што такія ўкіды робяць нарастаючым напружанне паміж Масквой і Захадам.
А калі гэтую інфармацыю звязаць з тым, што ў Беларусі будзе новы расійскі амбасадар Грызлоў, цяжкавагавая фігура, то не выключана, што Расія, напрыклад, пад выглядам забеспячэння правядзення рэферэндуму можа накіраваць туды нейкі дадатковы сілавы кантынгент, накшталт таго, як было ў жніўні 2020 года.
Заяўляць будуць, што хочуць дапамагчы Лукашэнку ў рэалізацыі яго добрых намераў, каб гэтым, па сутнасці, прыкрыць пашырэнне сваёй ваенна-стратэгічнай прысутнасці ў рэгіёне ў адказ на дзеянні НАТА, якія абавязкова будуць па выніку ўкраінскага крызісу.
Таму, што да Масквы, то яна яшчэ больш нагнятае спіраль напружання і, хутчэй за ўсё, спрабуе легітымізаваць сваю далейшую ваенную прысутнасць у Беларусі.
Нібыта «асцярогі правакацый» з боку Захаду, на думку палітолага, не выключаюць і правакацыі з боку саміх беларускіх уладаў.
— Навучаныя праблемамі 2020 года, беларускія ўлады, каб не ўзнікла ніякіх нечаканасцяў, несумненна, працягнуць рэпрэсіі, тэрор будзе мець папераджальны, прэвентыўны характар. Нават найменшы намёк на незадаволенасць будзе спыняцца сур'ёзнымі дзеяннямі — ад звальненняў да затрыманняў і арыштаў.
Правакацыямі могуць апраўдаць узмацненне жорсткасці рэпрэсіўных метадаў, як гэта заўсёды робяць аўтарытарныя рэжымы, абвінавачваючы ў гэтым Захад. Спектр магчымых дзеянняў беларускіх уладаў на сёння не абмежаваны. Бо для Лукашэнкі зусім не мае ніякага значэння прызнанне гэтага рэферэндуму Захадам.
Можа адбыцца, напрыклад, «напад» на якіх-небудзь членаў камісій, зноў якая-небудзь «дваровая змова», могуць раскрыць «замах на губернатара»», ды што заўгодна могуць прыдумаць. Пытанне, ці будзе ім гэта трэба і з якой мэтай, таму што ў сённяшніх рэаліях іх і так ніхто і нішто не абмяжоўвае ў арганізацыі тэрору, — кажа палітолаг.
Што да самога рэферэндуму, ён упэўнены, вынікі будуць сфальсіфікаваныя, магчыма, нават без удзелу камісій.
— Пляцоўку для правядзення рэферэндуму, групы выбаршчыкаў, камісіі — усё трэба будзе падрыхтаваць ва ўмовах інфармацыйнага ціску і, магчыма, маральных выклікаў. Гэта зрабіць будзе не так лёгка. Фальсіфікацыі будуць праходзіць паўсюдна, не выключана, што проста шляхам замены скрыняў ці ўвогуле агучвання нарыхтаваных вынікаў.
Камісіі будуць створаны для праформы. Бо нават на выбарах у жніўні 2020 года галасы ўжо не лічылі. Цяпер асноўная задача ўладаў — папярэдзіць якое-небудзь абурэнне, нават пры ўмовах, якія не спрыяюць гэтаму абурэнню, таму што ўсе каналы, сувязі, структуры разбураныя, — сказаў на заканчэнне Усаў.