Байдэн даручыў распячатаць стратэгічны нафтавы запас ЗША

ЗША выдзеляць 50 млн барэляў нафты з рэзерву для зніжэння сусветных коштаў. Намаганні таксама падтрымаюць Кітай, Індыя, Японія, Рэспубліка Карэя і Вялікабрытанія, паведамляе www.dw.com.

Фота: TASS/EPA

Прэзідэнт ЗША Джозэф Байдэн загадаў распячатаць стратэгічны нафтавы запас (СНЗ) для зніжэння коштаў на сыравіну. Пра гэта ў аўторак, 23 лістапада, паведамілі ў прэс-службе Белага дома.

«Амерыканскія спажыўцы — гэтак жа, як і амерыканскія прадпрыемствы, — адчуваюць уплыў росту коштаў на нафту на запраўках і пры атрыманні рахункаў за ацяпленне, таму што прапанова не паспявае за попытам па меры выхаду сусветнай эканомікі з пандэміі», — адзначаецца ў заяве.

З СНЗ выдзеляць 50 млн барэляў

«Міністэрства энергетыкі выдзеліць 50 млн барэляў нафты з СНЗ, каб знізіць кошты для амерыканцаў і вырашыць праблему неадпаведнасці паміж попытам і прапановай ва ўмовах выхаду з пандэміі»,  — падкрэслілі ў Белым доме.

Пры гэтым 32 млн барэляў будуць пасля замешчаныя за кошт новых паступленняў. Яшчэ 18 млн барэляў увядуць у абарачэнне шляхам паскарэння гандлёвых аперацый, санкцыянаваных раней Кангрэсам ЗША.

Кітай, Індыя, Японія, Рэспубліка Карэя і Вялікабрытанія таксама пусцяць на рынкі нафту з запасаў

Нароўні з Вашынгтонам частку нафты з рэзерваў на рынкі пусцяць Кітай, Індыя, Японія, Рэспубліка Карэя і Вялікабрытанія. «Гэта — кульмінацыя кансультацый, якія доўжыліся некалькі тыдняў з краінамі па ўсім свеце, і мы ўжо бачым, як эфект гэтай працы адбіваецца на цэнах на нафту», —падкрэслілі ў Белым доме. «У апошнія некалькі тыдняў, калі стала вядома пра гэтыя намаганні, цэны ўпалі амаль на 10 працэнтаў», — сцвярджаюць там.

Германія распячатваць рэзерв не плануе

Між тым у Германіі няма аналагічных планаў, каб карыстаць нафтавыя рэзервы. Гэта можа адбыцца толькі ў тым выпадку, калі Міжнароднае энергетычнае агенцтва мэтанакіравана будзе прасоўваць падобны крок. «На міжнародным узроўні цяпер падобнага звароту да Германіі няма», — падкрэсліла прадстаўніца Міністэрства эканомікі і энергетыкі ФРГ.

Краіны АПЕК+, якіх Байдэн раней заклікаў больш актыўна нарошчваць здабычу нафты, не палічылі патрэбным прыслухацца да гэтага закліку. У пачатку лістапада яны прынялі рашэнне прытрымлівацца вызначанага плана і не павялічваць здабычу больш актыўна, чым было прадугледжана да гэтага.


Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: