«Калі ўсё застанецца без зменаў, праз 5 гадоў Беларусь стане часткай Расіі»

Шчыльная інтэграцыя паміж Беларуссю і Расіяй будзе нарошчваць тэмп, у тым ліку ў сферы ўзаемадзеяння спецслужбаў, дыслакацыі расійскіх ваенных і ядзернай зброі на беларускай тэрыторыі, лічыць эксперт па бяспецы Лешак Сыкульскі.

Хто адказны за развязанне беларуска-польскага крызісу? Над гэтым пытаннем падчас адкрытай сустрэчы ў беластоцкім кінатэатры TON, разважае ў каментары «Радыё Рацыя» эксперт па бяспецы і геапалітыцы Лешак Сыкульскі.

— Польшча зараз мае вельмі абмежаваныя магчымасці, калі размова ідзе пра ўрэгуляванне гэтага крызісу. Тым больш, што ў гэтым крызісе па-над галовамі Польшчы пачынаюць размаўляць французы, немцы.

Памежны крызіс паміж Польшчай і Беларуссю, на маю думку, выкліканы праз спецслужбы Рэспублікі Беларусь і Расійскай Федэрацыі. І можа нават іначай – Саюзнай дзяржавы Расіі і Беларусі.

Палітычны даследчык выказаўся і пра будучы рэферэндум у Беларусі як сродак легітымізацыі расейскай прысутнасці і далейшага «паглынання» беларускай тэрыторыі:

— Думаю, што рэферэндум, які мае адбыцца да канца траўня 2022 года, з’яўляецца элементам надання бяспекі Лукашэнку і яго сям’і, каб не падзяліць лёс лівійскага варыянту ці варыянту Кадафі. А з другога боку, гэта элемент замены часткі палітычнай эліты на тых, хто мае, скажам так, добры піяр на Захадзе. Якія маглі б ініцыяваць скасаванне часткі санкцый Саюзнай дзяржавы Беларусі і Расіі.

На думкку Лешэка Сыкульскага, шчыльная інтэграцыя паміж Беларуссю і Расіяй будзе нарошчваць тэмп, у тым ліку ў сферы ўзаемадзеяння спецслужбаў, дыслакацыі расійскіх ваенных і ядзернай зброі на беларускай тэрыторыі. Аналітык падкрэслівае, што паўплываць на такі працэс могуць толькі ЗША.