Літва супраць кітайскіх тэлефонаў — існуюць рызыкі сачэння

Пры выкарыстанні кітайскіх прылад існуе рызыка страты асабістых дадзеных і магчымага абмежавання свабоды слова, паведамляе korrespondent.net.

Мабільныя тэлефоны з Кітая даўно абвінавачваюць у тайным сачэнні за карыстальнікамі. Хоць, напрыклад, для кітайскага вытворцы смартфонаў Хіаоmі апошнія некалькі месяцаў былі вельмі паспяховымі. Пакуль кампанія-канкурэнт Huawei знаходзіцца пад санкцыямі ЗША, у другім квартале канцэрн Xiaomi змог павялічыць сваю долю на рынку да 17% — прычым яго прылады карыстаюцца попытам і ў Еўропе. Але заявы з Літвы могуць нашкодзіць бізнесу.

Уразлівасць

Урад Літвы папярэдзіў пра ўразлівасць сістэмы бяспекі і ўбудаваныя функцыі цэнзуры ў кітайскіх мабільных тэлефонах, у тым ліку і мадэлях ад Xiaomi. Паводле звестак Дзяржаўнага цэнтра кібербяспекі ў Вільні, аналіз трох смартфонаў з падтрымкай 5G вытворчасці Huawei, Xiaomi і Oneplus выявіў некалькі рызык кібербяспекі. У выпадку з тэлефонамі Huawei існуюць асцярогі з нагоды афіцыйнай крамы прыкладанняў, што перанакіроўвае на небяспечных правайдараў.

Пры выкарыстанні іншых прылад існуе рызыка страты асабістых даных і магчымага абмежавання свабоды слова, заявіла ведамства, якое падпарадкоўваецца Міністэрству абароны Літвы.

Тэхналагічныя кампаніі павінны выконваць у Кітаі строгія патрабаванні, каб ім дазвалялі прадаваць свае прадукты. Яны ўключаюць у сябе і цэнзуру кантэнту. Кіраўнік аддзела міжнароднай палітыкі кібербяспекі ў фондзе “Новая адказнасць” Свен Херпіг лічыць папярэджанне літоўскага ўрада абгрунтаваным.

«Цалкам верагодна, што на прыладах кітайскіх вытворцаў усталёўваецца праграмнае забеспячэнне для цэнзуры», — сказаў Херпіг у інтэрв'ю выданню Handelsblatt.

У выпадку са смартфонам ад Xiaomi літоўскае ведамства па кібербяспецы заявіла, што прылада валодае тэхнічнымі магчымасцямі для цэнзуры загружанага на яе кантэнту. Яна можа распазнаваць і блакаваць такія выразы, як «свабодны Тыбет», «Няхай жыве незалежнасць Тайваня» ці «дэмакратычны рух».

Вялікая палітыка

Вынікі аналізу з'яўляюцца выбуханебяспечнымі і ў палітычным плане. Апошнім часам адносіны паміж Літвой і Кітаем пагоршыліся. У мінулым месяцы Кітай запатрабаваў ад Літвы адклікаць свайго амбасадара ў Пекіне і абвясціў пра намер адклікаць свайго амбасадара ў Вільні. Прычына палягае ў тым, што Тайвань абвясціў, што будзе называць сваё дыпламатычнае прадстаўніцтва ў Літве «прадстаўніцтвам Тайваня».

Паводле ўрадавага дакладу, функцыя цэнзуры ў прыладзе Xiaomi мусіць быць адключаная ў тэлефонах, якія прадаюцца ў Еўропе, але яе можна ўключыць аддалена ў любы час. Эксперт па кібербяспецы Херпіг таксама звяртае на гэта ўвагу. Да таго ж узнікае пытанне, чаму функцыя цэнзуры адключаная толькі на прыладах для еўрапейскага рынку і чаму ад яе не адмовіліся наогул. Таму існуе не толькі «рызыка таго, што функцыя будзе актываваная, напрыклад, праз абнаўленне праграмнага забеспячэння вытворцам, але і таго, што яна будзе падключана, нават калі раней яе не было на прыладзе».